8 ოქტომბერი 2008
ვაშინგტონი - ამერიკის შეერთებული შტატების დეპარტამენტმა რუსული შეიარაღებული ძალების გაყვანა საქართველოს სეპარატისტული რეგიონების, სამხრეთ ოსეთისა და აფხაზეთის მიმდებარე ტერიტორიებთან განლაგებული ბუფერული ზონებიდან "პოზიტიურ" მოვლენად დაახასიათა.
"თქვენ ხედავთ, რომ რუსეთი რეალურად ასრულებს ევროკავშირთან დადებული 8 სექტემბრის შეთანხმებას" - უთხრა ჟურნალისტებს სახელმწიფო დეპარტამენტის სპიკერმა შონ მაკკორმაკმა და რეგიონის რუქაზე მიუთითა.
8 სექტემბრის სამშვიდობო გეგმის მიხედვით, რომელიც საფრანგეთის პრეზიდენტის ნიკოლა სარკოზის შუამავლობით დაიდო, რუსულ ჯარს ბუფერული ზონები პარასკევს უნდა გაეთავისუფლებინა. პროცესი უფრო ადრე დაიწყო.
"მომავალ კვირას ჩვენ შევაფასებთ სიტუაციას. რუსებმა თქვეს, რომ ისინი დაასრულებენ ოპერაციას" - თქვა მაკკორმაკმა.
"ჩვენ გავივლით კონსულტაციებს ევროკავშირთან იმასთან დაკავშირებით, თუ რამდენად ზუსტად აღასრულა რუსეთმა 8 სექტემბრის შეთანხმება და შევძლებთ თქვენთვის ახალი ინფორმაციის მოწოდებას" - თქვა მან.
როდესაც ჰკითხეს, არის თუ არა ჯარების გაყვანა კარგის ნიშანი, მაკკორმაკმა უპასუხა: "კი, ეს პოზიტიური ნიშანია".
რუსული ჯარების გაყვანა სამხრეთ ოსეთში ორი თვის წინ დაწყებულ ომს მოყვა, რამაც დასავლეთსა და რუსეთს შორის ურთიერთობები გააფუჭა.
პარიზში, პრეზიდენტ მედვედევთან შეხვედრისას, სარკოზიმ განაცხადა, რომ ჯარების გაყვანამ შესაძლებელი გახადა რუსეთსა და ევროკავშირს შორის პარტნიორობის "ამბიციური" შეთანხმების გარშემო მოლაპარაკებების აღდგენა.
მოლაპარაკებები გასულ თვეში შეაჩერეს საქართველოში რუსეთის ქმედებების გამო პროტესტის ნიშნად.
No comments:
Post a Comment