ალესია ვართანიანი და ელენ ბარი
7 ოქტომბერი 2008
ორშაბათს რუსეთმა საქართველოს მთავრობა "ახალი საბრძოლო მოქმედებების პროვოცირებაში" დაადანაშაულა, იმის მიუხედავად, რომ რუსები სეპარატისტული რეგიონების მიღმა არსებულ ძირითად საგუშაგოებს აუქმებენ.
აფხაზეთის ხელისუფლებაში აცხადებენ, რომ ორშაბათს ქართველ შეიარაღებულ ბოევიკებთან ორმხრივი სროლის შედეგად აფხაზი მესაზღვრე დაიღუპა. პარასკევს ავტომობილის აფეთქების შედეგად, სამხრეთ ოსეთის დედაქალაქში, ცხინვალში, რვა რუსი ჯარისკაცი და სამი ოსი სამოქალაქო პირი დაიღუპა.
რუსეთმა განაცხადა, რომ სადაო რეგიონში ბოლო დროს მომხდარ შეტევებზე, ისევე როგორც დანარჩენ სამზე - საქართველოა პასუხისმგებელი. საგარეო საქმეთა მინისტრმა სერგეი ლავროვმა ორშაბათს თავის ფრანგ კოლეგას ბერნარ კუშნერს მიმართა და მოუწოდა ევროკავშირს სიტუაციის სტაბილიზაციისთვის შესაბამისი ზომები მიიღოს. სარკოზის სამშვიდობო გეგმის მიხედვით, პარასკევი - ბუფერული ზონებიდან რუსული არმიის გაყვანის ბოლო ვადაა.
შოთა უტიაშვილმა, საქართველოს შინაგან საქმეთა სამინისტროს მაღალჩინოსანმა, ამ თავდასხმებთან საკუთარი ქვეყნის კავშირი უარყო და ამტკიცებს, რომ საქართველო ჯარების გაყვანის შეფერხების წინააღმდეგია.
"ეს აბსოლუტურად აფსურდული ბრალდებაა", - აღნიშნა მან.
სოფელ კარალეთში, რომელიც გორიდან ჩრდილოეთით, ორი მილის დაშორებით მდებარეობს, ვიდრე ჯარისკაცები საგუშაგოს შლიდნენ და პირად ნივთებს ალაგებდნენ, ეთნიკურმა ქართველებმა რუსული საკონტროლო გამშვები პუნქტი უპრობლემოდ გადალახეს.
ადგილობრივმა გლეხმა, 34 წლის ვიტალი შავშაშვილმა, შეიტყო, რომ რუსები მიდიან, მაგრამ მოინდომა ამაში თავად დარწმუნებულიყო. მართალია კარალეთში მშვიდობაა, მაგრამ მის მეზობლებს დაბნელებასთან ერთად სახლების დატოვების ეშინიათ, ის ქართული პოლიციის დაბრუნებისთვის ლოცულობს.
მისი თქმით, აგვისტოს ომის შემდეგ, ორი ქვეყანის საზღვარზე მისი ხილის და ბოსტნეულის მოსავალი გაფუჭდა, რამაც მას სამ ნახევარი ათასი დოლარი დააკარგვინა, რომლითაც მას მთელი წელი უნდა ეცხოვრა. "ახლა ჩვენ მხოლოდ ღმერთის იმედად ვართ, - თქვა მან. – ჩვენ საარსებო წყარო აღარ გაგვაჩნია".
68 წლის გალინა გოგიაშვილი, რომელმაც თავისი ურმით, საგუშაგო გაიარა, გვითხრა, რომ საკუთარ სახლში უსაფრთხოდ თავს ვეღარასდროს იგრძნობს. მას ქართული ხელისუფლების დაბრუნებისაც ეშინია.
"იარაღი მაინც დაგვირგონ, რომ თავის დაცვა შევძლოთ", - ამბობს იგი.
რუსი სამხედროები უკვე რამდენიმე დღეა ევროკავშირის 200 დამკვირვებლის მეთვალყურეობის ქვეშ საგუშაგოებს აუქმებენ. დამკვირვებელებმა ბუფერული ზონების გაკონტროლება გასულ კვირას დაიწყეს. გენერალ-მაიორმა მარატ კულახმეტოვმა, სამხრეთ ოსეთში რუსი მშვიდობისმყოფელების მეთაურმა, ორშაბათს განაცხადა, რომ სამხრეთში განლაგებულ ექვს პოსტს 24 საათში მოხსნის.
იმავდროულად აფხაზეთის ხელისუფლებამ განაცხადა, რომ მესაზღვრე სასიკვდილოდ დაიჭრა ორმხრივი სროლის დროს სოფელ ნაბაკევში, საქართველოს საზღვართან. აფხაზეთის სამხედრო წარმომადგენელბმა ასევე განაცხადეს, რომ სამშვიდობოების კონტიგენტი, რომელიც ტერიტორიას ცლიდა და უკან იხევდა, აფეთქებას ძლივს გადაურჩა.
საგარეო საქმეთა სამინისტრომ საკუთარ განცხადებაში საქართველო თავდასხმებში დაადანაშაულა. "შთაბეჭდილება რჩება, რომ ზოგიერთი ძალები თბილისში, რომლებსაც არ აწყობთ უსაფრთხოების ზონებში ფუნქციების გადაცემა ევროკავშირის დამკვირვებლებისთვის, შეგნებულად ამწვავებენ სიტუაციას რეგიონში და ტერაქტებით ახალი საბრძოლო მოქმედებების პროვოცირებას ცდილობენ", - ნათქვამია განცხადებაში.
მაგრამ უტიაშვილის თქმით "ქართულ ძალებთან არანაირი ორმხრივი სროლა არ მომხდარა", და რომ საქართველო არცერთ თავდასხმაში არ მონაწილეობდა.
რუსულ მედიაში გამოქვეყნებულ ბრალდებებს, რომ ცხინვალში პარასკევს აფეთქებული მანქანა, თითქოს ტერიტორიაზე ეუთოს ბადრაგის ფარგლებში გადაადგილდებოდა, ევროპის უსაფრთხოების და თანამშრომლობის ორგანიზაციაც გამოეხმაურა. ელჩმა ტერჰი ჰაკალამ, საქართველოში მისიის ორგანიზაციის ხელმძღვანელმა განაცხადა, რომ ამ ინფორმაციით "აღშფოთებულია".
"მისიაზე ცრუ პროპაგანდის გავრცელება – მანამდე, ეუთოს თანამშრომლებზე გავრცელებული არასწორი ცნობების ჩათვლით, - სერიოზული საკითხია, ეს მისიის პერსონალს საფრთხის ქვეშ აყენებს და აღიქმება, როგორც სიგნალი, რომ მათ ვისაც პასუხისმგებლობა ეკისრება, კონსტრუქციული თანამშრომლობა არ სურს", - აღნიშნა მან.
No comments:
Post a Comment