ივენ მაქასკილი
3 ოქტომბერი 2008
ბარაკ ობამას საარჩევნო შტაბი სულ უფრო მეტ საჩივარს იღებს ყალბი საზოგადოებრივი აზრის გამოკითხვების გამო, რომლის ორგანიზატორებიც დემოკრატი კანდიდატის დისკრედიტაციისთვის ათასგვარ ბინძურ ხრიკს იყენებენ.
დაზარალებულები აცხადებენ, რომ ყალბი მკვლევარები კითხვის დასმის დროს ისეთ ინსინუაციებს მიმართავენ, რომ როგორმე ობამას ზიანი მიაყენონ. ე.წ. "მერყევ შტატებში" გამოკითხულები არიან - ებრაელები, ევანგელისტი-ქრისიტიანები, კათოლიკები და ლათინელი ამერიკელები.
ერთ-ერთი ვინც ამ ფაქტმა აღაშფოთა დები მიდენია, რომელიც ებრაულ კვარტალში სქვირელ-ჰილში (ფითსბურგი, პენსილვანია) ცხოვრობს. მან The Guardian-ს უამბო, რომ ადამიანმა, რომელიც საზოგადოებრივი აზრის კვლევას ატარებდა, თავიდან ჩვეულებრივი კითხვებით დაიწყო - მის მდგომარეობასა და არჩევნებში პოლიტიკურ სიმპათიებზე.
მაგრამ შემდეგ, მიდენს, ებრაელ ქალბატონს ჰკითხეს, ვის მისცემდა იგი ხმას, რომ სცოდნოდა, რომ ობამას მხარს უჭერს "ჰამასი", პალესტინელ მებრძოლთა დაჯგუფება, რომელიც ღაზას სექტორს მართავს, და რომელიც პასუხისმგებელია ისრაელის წინააღმდეგ განხორციელებული ტერაქტების უდიდეს ნაწილზე. "ეს შეშინების ტაქტიკაა. ეს საშინელებაა" – თქვა მან.
რომელი ორგანიზაცია მართავს ამ გამოკითხვებს ჯერ უცნობია. ერთ-ერთმა რესპუბლიკურმა ორგანიზაციამ Republican Jewish Coalition (RJC), რომელიც მაკკეინის წინასაარჩევნო შტაბის სახელით მუშაობს, აღიარა რომ ებრაელ ამომრჩევლებში ობამასა და ისრაელზე გამოკითხვებს ატარებს, მაგრამ ირწმუნება, რომ მისი კვლევები ლეგიტიმურია და მიზნად ისახავს იმის გარკვევას, თუ როგორ მოქმედებს კამპანია ებრაელ ამომრჩევლებზე.
RJC-მა კატეგორიულად გააპროტესტა მისი კვლევის შედარება ე.წ. "ფუშ პოლ"-ებთან (ყალბი გამოკითხვების გამოყენების ტექნოლოგია ამომრჩევლების აზრის შესაცვლელად). მისი კვლევები 750 რესპოდენტით შემოიფარგლებოდა, მაშინ როდესაც "ფუშ პოლები" ათასობით ადამიანს ურეკავენ. ორგანიზაციამ 82 კითხვა დასვა და მათგან მხოლოდ 10% მიეძღვნა ობამას.
"ფუშ პოლების" ტექნოლოგია წინასაარჩევნო ბრძოლის ნაწილია იმ შტატებში, სადაც მანამდე ჩატარებულ არჩევნებზე კანდიდატების მონაცემებს შორის მინიმალური სხვაობაა ხოლმე.
2000 წელს ეს ტექნოლოგია ძალიან ეფექტურად გამოიყენეს რესპუბლიკელების პრაიმერების მზადების დროს სამხრეთ კაროლინაში, სადაც ადამიანები ყვებოდენ, რომ გამოკითხვის პროცესში მათ მინიშნებით ატყობინებდნენ, რომ მაკკეინმა, რომელიც მაშინ კანდიდატობის უფლებისთვის ბუშს ებრძოდა, უკანონოდ იშვილა შავკანიანი ბავშვი.
ბუშმა დაძლია პრაიმერებში მაკკეინის ლიდერობა, ისე რომ ზარების წარმოშობა ვერავინ გაარკვია.
წელს ეს ტაქტიკა რესპუბლიკელების პრაიმერებში ისევ გამოიყენეს, როდესაც ზარების დროს აქცენტი ერთ-ერთი კანდიდატის, მიტა რომნის აღმსარებლობაზე კეთდებოდა – ის მორმონია, ხოლო მემარჯვენე ქრისტიანული ბანაკის წარმომადგენლები ამ რელიგიას ეჭვით უყურებენ.
ობამას კამპანიის ორგანიზატორმა, ერთ-ერთი მერყევი შტატის მონაცემებზე დაყრდნობით განაცხადა, რომ "ფუშ-პოლებზე" უამრავი საჩივარი მიიღეს. კითხვებში ხშირად ისმოდა მინიშნებები ფართოდ გავრცელებულ ჭორზე, თითქოს ობამა მუსულმანია, იმის მიუხედავად რომ მან არაერთხელ განაცხადა რომ ქრისტიანია.
ორგანიზატორმა სხვა კითხვაც ახსენა: ობამას ხმას მისცემდით იმ შემთხვევაშიც, ისრაელს მთელი იერუსალიმის დათმობა რომ მოუწიოს? "ყველაფერი კარგად შეთითხნეს. მათ ეს კარგად გამოსდით. გაურკვეველი მსმენელი უცბად ვერ მიხვდება რომ ეს ტყუილია", - თქვა მან.
სკოლის ფსიქოლოგ მინდენთან, გასული თვის ერთ კვირას დღეს დარეკეს. "მერყევ" შტატში მცხოვრებ ადამიანს ეს არ გაკვირვებია. "ნორმალური კითხვა იყო. წავალ თუ არა არჩევნებზე, დემოგრაფია, ასაკი, ადგილი სადაც ვცხოვრობთ. შემდეგ იყო კითხვა, რომელ პარტიას ვუჭერ მხარს, ვის ვანიჭებ უპირატესობას ეკონომიკის კუთხით, საგარეო პოლიტიკაში, და ასე შემდეგ".
"მკითხეს: "თქვენ ებრაელი ხართ?", ვუპასუხე "დიახ". მერე მკითხეს: "თქვენ რომ იცოდეთ, რომ ობამას მხარს უჭერს "ჰამასი", თქვენს გადაწყვეტილებაზე ეს გავლენას მოახდენდა? თქვენს არჩევანზე იმოქმედებდა ის, რომ ობამას ეკლესია ანტისემიტურ განცხადებებს აკეთებდა?" და ყველა ცხელი კითხვა ისრაელთან დაკავშირებით". მისი თქმით ის ხმას მაინც ობამას მისცემს, როგორც აპირებდა.
იგივე გადახდა 71 წლის ჯოელნა მარკუსს, ფლორიდის შტატის პენსიონერ პროფესორს ქი-უესთიდან. მას კითხეს, შეცვლიდა თუ არა იგი საკუთარ არჩევანს, რომ სცოდნოდა, რომ ობამამ პალესტინის განთავისუფლების ორგანიზაციას ფული შეწირა.
მარკუსმა ტელეფონი დაკიდა.
ვებ-გვერდის Huffington Post-ის ინფორმაციით, მკითხველმა რეიჩელმა სტრონგსვილიდან (ოჰაიოს შტატი) დაიჩივლა, რომ "ფუშ-პოლის" მკვლევარემა ობამა რადიკალურ მემარცხენე ლიდერად წარმოადგინეს, რომელმაც კონგრესში ხმა მისცა პედოფილების ციხიდან დროზე ადრე განთავისუფლებას და მათთვის სკოლებთან ახლოს ცხოვრების უფლების მინიჭებას.
No comments:
Post a Comment