პელინმა პოპულარობა დაიბრუნა, მაგრამ ბაიდენმა დებატები მოიგო

მარკ პრესტონი
3 ოქტომბერი 2008

სენტ ლუისი, მისური (CNN)- სარა პელინმა ხუთშაბათს თავის ოპონენტს ჯო ბაიდენსა და დებატების მოდერატორს გვენ იფილს განუცხადა, რომ ვიცე-პრეზიდენტობის კანდიდატების დებატების მსვლელობის დროს დასმულ კითხვებს და განსახილველ საკითხებს მხოლოდ მისთვის სასურველი პირობების შესაბამისად უპასუხებს.

”მე არ გიპასუხებთ კითხვებზე ისე, როგორც თქვენ ამის მოსმენას ისურვებდით, მე პირდაპირ ამერიკელ ხალხს მივმართავ და ჩემი შესაძლებლობების შეფასების საშუალებას მივცემ”-განაცხადა პელინმა.

მას შემდეგ, რაც პრეზიდენტობის კანდიდატმა ჯონ მაკკეინმა, სარა პელინი ვიცე-პრეზიდენტობის კანდიდატად დაასახელა, მას ხშირად აკრიტიკებდნენ იმის გამო, რომ მედიაში მისი გამოსვლები სუსტია და კამპანიის პროცესში ყოველთვის წინასწარ დაწერილ ტექსტს წარმოთქვამს.

90 წუთიანი დებატების დროს პელინს არჩეული კურსისთვის არ გადაუხვევია, რამაც, როგორც ამას CNN-ის საზოგადოებრივი აზრის კვლევა ადასტურებს, ისევ აზარალა.

გამოკითხულთა შორის მხოლოდ 26%-მა მიიჩნია, რომ დებატების დროს პელინმა ბაიდენთან შედარებით მეტი საზრიანობა გამოავლინა მაშინ, როცა 611 გამოკითხული ზრდასრული ამერიკელიდან, ჯო ბაიდენი ასეთად 57%-მა დაასახელა. ცდომილების შესაძლო მაჩვნებელი 4%.

დებატების მაყურებელების 51%-მა პროცენტმა ჩათვალა, რომ ბაიდენმა დებატები კარგად წარმართა, ხოლო 36%-მა უპირატესობა პელინს მიანიჭა.

მიუხედავად ამისა, მაყურებელთა 84%-მა აღნიშნა, რომ პელინმა თავი უკეთ გამოავლინა, ვიდრე ამას ელოდნენ.

რესპუბლიკელებისა და დემოკრატების აზრით, დებატების მსვლელობისას პელინს ამომრჩეველი უნდა დაერწმუნებინა, რომ კარგად იცნობს რიგითი მოქალაქეების ყოველდღიურ ცხოვრებას, რომელიც მიმდინარე ფინანსური კრიზისის ფონზე უფრო გართულდა. ის და ბაიდენი ყოველდღიური პრობლემების განხილვისას ერთმანეთს ფეხდაფეხ მიყვებოდნენ - სანამ პელინი თავის მშობლიურ ქალაქზე, ვასილაზე (ალასკა) ლაპარაკობდა, ბაიდენი მას სკრენტონისა (პენსილვანია) და კლეიმონტის (დელავერი) მაგალითებით უპირისპირდებოდა.

CNN -ის მიერ გამოკითხულ მაყურებალთა 43%-მა 36%-ის საპირისპიროდ განაცხადა, რომ ბაიდენმა ოპონენტზე თავდასხმას მეტი დრო დაუთმო. მაგრამ, მიუხედავად იმისა, რომ ბევრს სენატორი დელავერიდან ზედმეტად აგრესიულად მიაჩნია, ამ ფაქტორს დებატების საბოლოო შედეგზე გავლენა არ მოუხდენია.

CNN-ის მიერ ჩატარებული გამოკითხვის შედეგები, რა თქმა უნდა, არ გაახარებს მაკკეინ-პელინის ბანაკს, მაგრამ რესპუბლიკელები იმანაც უნდა დაამშვიდოს, რომ პელინმა სერიოზული შეცდომები არ დაუშვა, რაც სავსებით მოსალოდნელი იყო.

დებატების კიდევ ერთი თემა ვაშინგტონში არსებული სიტუაციის ძირეულ შეცვლას ეხებოდა. პელინი და ბაიდენი მაყურებლებს ასეთ ცვლებებს დაპირდნენ. იმის გამო, რომ კონგრსისა და პრეზიდენტის რეიტინგი შემაშფოთებლად დაბალია, ეს თემა ყოველთვის დიდი პოპულარობით სარგებლობს. აქაც ბაიდენმა, სენატორმა 35 წლის სტაჟით, მაყურებელთა მეტი ნდობა მოიპოვა. გამოკითხულთა 53%-მა განაცხადა, რომ ბაიდენისგან რეალურ ცვლილებებს მოელიან, ხოლო პელინი 42%-მა არჩია.

პელინის კიდევ ერთი დიდი პრობლემა - მაყურებელთა მხოლოდ 46%-ს მიაჩნია, რომ ის პრეზიდენტის ფუნქციის შესრულებას შეძლებს, ხოლო დებატების დასრულების შემდეგ მაყურებელთა 87%-მა ამ თვალსაზრისით უპირატესობა ბაიდენს მიანიჭა.

და მაინც რესპუბლიკელებს შეუძლიათ შვებით ამოისუნთქონ, რადგან მათი პარტიის ვიცე-პრეზიდენტობის კანდიდატმა რესპუბლიკელებს საპრეზიდენტო არჩევნები არ მოაგებინება, მაგრამ არც წააგებინა. პელინი ისევ კონსერვატორების ფავორიტად დარჩება, ხოლო დებატებში მისმა გამოსვლამ შესაძლოა მათ დამატებითი ენერგია შთაბეროს.

ორიგინალი