ტონი ბარბერი ბრიუსელიდან
10 ოქტომბერი 2008
მომავალ კვირას ევროკავშირის ლიდერები იმსჯელებენ - განაახლონ თუ არა კრემლთან გრძელვადიანი პარტნიორობის შეთანხმებაზე მუშაობა, იმის პასუხად, რომ რუსეთმა საქართველოში უსაფრთხოების ზონებიდან საკუთარი ჯარები დროულად გაიყვანა.
ეს არგუმენტი საფრანგეთს, გერმანიას, იტალიას და ესპანეთს, რომლებიც მზად არიან რუსეთთან ურთიერთობის ნორმალიზებისთვის, სხვა ქვეყნებთან აპირისპირებს, როგორებიც არიან ბალტიის სახელმწიფოები, უნგრეთი, პოლონეთი, შვედეთი და დიდი ბრიტანეთი, რომლებიც ამბობენ, რომ ასეთი შეფასებების გაკეთება ჯერ ადრეა, რადგან ექვს კვირაზე ნაკლები დროა გასული.
1 სექტემბერს გამართულ საგანგებო სამიტზე ევროკავშირის ქვეყნებმა გადაწყვიტეს, რომ რუსეთთან პარტნიორობაზე მოლაპარაკებებს გადადებდნენ, ამ უკანასკნელის საქართველოში შეჭრის და სეპარატისტული რეგიონების სამხრეთ ოსეთის და აფხაზეთის დამოუკიდებელ სახელმწიფოებად ცნობის გამო.
ევროკავშირის საგარეო საქმეთა მინისტრები ამ საკითხს მომავალ ორშაბათს ლუქსემბურგში დაგეგმილ შეხვედრაზე განიხილავენ, მაგრამ საბოლოო გადაწყვეტილება მიღებული იქნება ბლოკის სახელმწიფოთა და მთავრობების მეთაურთა შეხვედრაზე ბრუსელში, სადაც სამიტი ოთხშაბათს და ხუთშაბათს გაიმართება.
რუსეთმა გუშინ განაცხადა, რომ მან გაიყვანა თავისი ჯარები საქართველოს უსაფრთოხების ზონებიდან, რომლებიც აფხაზეთს და სამხრეთ ოსეთს ესაზღვრება.
მაგრამ, ევროკავშირის ქვეყნებს შორის უთანხმოება არსებობს – რამდენად სრულად შეესაბამება რუსეთის მოქმედება ცეცხლის შეწყვეტის შესახებ შეთანხმების პირობებს, რომელიც რუსეთს და საქართველოს შორის საფრანგეთის პრეზიდენტის, სარკოზის შუამავლობით დაიდო.
პირველ სექტემბერს ევროკავშირის ლიდერებმა განაცხადეს, რომ ისინი იმ დრომდე გადადებდნენ მოლაპარაკებებს რუსეთთან პარტნიორობის ხელშეკრულებაზე, ვიდრე მათი არმია 7 აგვისტომდე არსებულ პოზიციებს არ დაუბრუნდებოდა.
ამის მიუხედავად, ევროკავშირის მთავრობები აცნობიერებენ, რომ ასეთ მოკლე დროში ისინი ამაზე მეტის მიღწევას ვერ შეძლებდნენ, ვერ აიძულებდნენ მოსკოვს უარი ეთქვა საქართველოს ფაქტობრივ დაშლაზე და ვერ გააყვანინებდნენ მას ჯარებს აფხაზეთის და სამხრეთ ოსეთის ტერიტორიიდან.
ევროკავშირის ზოგიერთ სახელმწიფოს, მაგალითად გერმანიას და იტალიას, არ მოსწონთ რუსეთის “დასჯის“ იდეა, რადგან სამხრეთ ოსეთზე შეტევის ორგანიზებაში, ვიდრე რუსეთი საქართველოს ტერიტორიაზე შეიჭრებოდა, ისინი მიხეილ საკაშვილს, საქართველოს პრეზიდენტს ადანაშაულებენ.
მათთან ერთად, საქართველოსთვის ნატოს წევრობის შეთავაზების ფაქტი სხვა ევროპულ ქვეყნებსაც აშფოთებთ, რაც წინააღმდეგობაში მოდის აშშ-ს პოზიციასთან, რომელსაც სურს, რომ დეკემბერში ნატოს წევრი ქვეყნების შეხვედრაზე, ალიანსმა საქართველოს გაწევრიანების მხრივ რეალური ნაბიჯი გადადგას.
აზრთა სხვადასხვაობის მიუხედავად, ევროკავშირის მთავრობები ყველაფერს იღონებენ იმისთვის, რომ მომავალ კვირას საერთო პოზიცია შეიმუშაონ.
გარდა ამისა, ყველა მონდომებულია, ისეთი დიპლომატური პოზიციები გამოიმუშაონ, რომ ჟენევაში, საგანგებო ვითარებაში მოლაპარაკებების დაწყების დროს მოსკოვისთვის მათი წინადადებები მისაღები იყოს. რუსეთი ამბობს, რომ ჟენევის მოლაპარაკებებზე საქართველოს შეიარაღებაზე ემბარგოს დაწესების საკითხში მხარდაჭერას მოითხოვს.
ორშაბათის შეხვედრაზე, ევროკავშირის საგარეო საქმეთა მინისტრები ასევე რუსეთის სამ მეზობელთან - ბელორუსთან, მოლდოვასა და უზბეკეთთან ურთიერთობების განმტკიცებაზე იმსჯელებენ. მინისტრებმა შესაძლოა ბელორუსიის ზოგიერთი ჩინოვნიკისთვის ვიზების გაცემაზე შეზღუდვის მოხსნის საკითხიც განიხილონ.
No comments:
Post a Comment