მარი ჟეგო
10 ოქტომბერი 2008
26 აგვისტოს რუსეთის მიერ სამხრეთ ოსეთის და აფხაზეთის დამოუკიდებლობის აღიარებამ, სეპარატისტული ტერიტორიების მართმადიდებლებს, რუსულ ეკლესიასთან მიერთების იმედი გაუჩინა. რადგან კრემლი ასე მოიქცა, მაშინ ეკლესიაც იგივეს გააკეთებს, ფიქრობდნენ ისინი. მაგრამ იმედები გაუცრუვდათ. რუსეთის მართლმადიდებელ ეკლესიასთან მიერთება, რასაც უკვე დიდი ხნის განმავლობაში ითხოვდნენ აფხაზეთის და სამხრეთ ოსეთის საეკლესიო იერარქიები, არ განხორციელდა.
"დღესდღეობით საზღვრების გადახედვის არანაირი საფუძველი არ არსებობს. ჩვენ მოვითხოვთ ჩვენი კანონიკური საზღვრების პატივისცემას, შესაბამისად პატივს ვცემთ სხვების საზღვრებს", - განაცხადა 7 ოქტომბერს მოსკოვის პატრიარქის პრეს-მდივანმა მამა ვლადიმერ ვიგილიანსკიმ. ეს საკითხი არც კი განხილულა რუსული მართლმადიდებელი ეკლესიის წმინდა სინოდის ბოლო შეკრებაზე. რუსული ეკლესიის აზრით, "პოლიტიკური გადაწყვეტილებები საეკლესიო იურისდიქციის და მოძღვართა პასუხისმგებლობის საკითხებს არ განსაზღვრავენ".
"სტატუს-კვო-ს შენარჩუნება"
სინამდვილეში მოსკოვის საპატრიარქო სეპარატისტულ ტერიტორიებზე მრევლის ორგანიზებაში აქტიურად მონაწილეობს. ადგილობრივი სასულიერო პირები მთლიანად მოსკოვზე არიან ორიენტირებულნი, რომელიც მათ რელიგიური ცხოვრების ორგანიზებასა და საკულტო ადგილების აღდგენაში ფინანსურად ეხმარება. მაგალითად, აფხაზეთის ჩრდილოეთით მდებარე ახალი ათონის მონასტერს რესტავრაცია რუსული ფულით ჩაუტარდა. ეს ადგილი რუსეთის ფედერაციიდან მართლმადიდებელების მოლოცვის პოპულარულ ადგილად იქცა.
ფორმალურად ეს მრევლი ქართულ ეკლესიას ექვემდებარება, რომელმაც ამ ტერიტორიებზე გავლენა 1990-იანი წლების დასაწყისში დაკარგა. აფხაზეთის და სამხრეთ ოსეთის ქართულ არმიასთან შეტაკებების შემდეგ, ისინი თბილისს აღარ ექვემდებარებიან. ქართველი მღვდელთმსახურები, ისევე როგორც ქართული მოსახლეობა ამ ტერიტორიებიდან განდევნეს. მაშინ რატომ არ შეიძლება, რომ ისინი რუსული მართლმადიდებელი ეკლესიის იურისდიქციას დაექვემდებარონ? ადგილობრივი სასულიერო პირები ამას აქტიურად მოითხოვენ. კრემლიც არ იქნებოდა წინააღმდეგი.
პირველ რიგში, რუსული ეკლესია ცდილობს ქართველთა სულიერ ლიდერთან ილია II-სთან კარგი ურთიერთობა შეინარჩუნოს. ის და რუსეთის პატრიარქი ალექსი II ერთმანეთს დიდი ხანია იცნობენ. გარდა ამისა, მოსკოვის პატრქიარქი ქართულ ეკლესიაში გავლენით სარგებლობს, სადაც მის ანტიდასავლურ შეხედულებებს იზიარებენ. იმ დროს როდესაც რუსული მართლმადიდებელი ეკლესიის ავტორიტეტს უკრაინასა და სხვა ადგილებში ეჭვქვეშ აყენებენ, საქართველოში მხარდაჭერის შენარჩუნება მისთვის ძალიან მნიშვნელოვანია.
ამგვარი საქციელით "მოსკოვის პატრიარქი, ფაქტობრივად ბრძოლას ზევიდან დაჰყურებს და ყურადღების მიღმა ტოვებს სახელმწიფოებს შორის დაპირისპირებას. ის თავისი სტატუს-კვოს შენარჩუნებას ცდილობს", განაცხადა "რადიო თავისუფლების" ეთერში, რელიგიის საკითხების სპეციალისტმა, მარკ სმირნოვმა. მისი თქმით, აფხაზეთის და სამხრეთ ოსეთის ეპარქიების მიერთების ფაქტი პრეცედენტს შექმნიდა, რომლითაც უმალ ისარგებლებდნენ "განხეთქილების მომხრე ჯგუფები მოლდავეთში, უკრაინასა და ესტონეთში".
No comments:
Post a Comment