სტეფან ბოსი
10 ოქტომბერი 2008
ამერიკის შეერთებული შტატების თავდაცვის მინისტრმა, რობერტ გეითსმა განაცხადა, რომ როგორც ჩანს, რუსული ჯარები ტოვებენ საკვანძო პოზიციებს ყოფილი საბჭოთა კავშირის რესპუბლიკაში, საქართველოში. ეს პოზიციები რუსეთმა ორი თვის წინ საქართველოსთან ხანმოკლე ომის შემდეგ დაიკავა. გეითსმა კომენტარი ბუდაპეშტში ნატოს სამიტის თანმდევ შეხვერდაზე, ე.წ. საიდლაინზე გააკეთა. სამიტზე შეკრებილი თავდაცვის მინისტრები აცხადებენ, რომ საქართველოს პოლიტიკურ და პრაქტიკულ მხარდაჭერას აღმოუჩენენ, მაგრამ გამორიცხავენ ქვეყნის იარაღით მომარაგებას.
ნატოს ორდღიანი სამიტი ბუდაპეშტში მინისტერიალისა და საქართველო-ნატოს კომისიის პირველი შეხვედრით დასრულდა. კომისია დასავლურ სამხედრო ალიანსსა და ყოფილ საბჭოთა ქვეყანას შორის კავშირის განსამტკიცებლად შეიქმნა.
კომისია პირველად პარასკევს შეიკრიბა. ცეცხლის შეწყვეტის შესახებ შეთანხმების თანახმად, რუსეთს სწორედ ამ დღეს უნდა დაესრულებინა საქართველოს სეპარატისტული რეგიონების, სამხრეთ ოსეთისა და აფხაზეთის მიმდებარე ტერიტორიებიდან ჯარის გაყვანა.
შეხვედრის დაწყებამდე აშშ-ს თავდაცვის მინისტრმა რობერტ გეითსმა, ჟურნალისტებს უთხრა, რომ, როგორც ჩანს, რუსულმა ჯარმა, ცეცხლის შეწყვეტის ხელშეკრულების თანახმად, გასვლა დაიწყო.
მაგრამ მან, ამავე დროს, გააკრიტიკა რუსეთის სამხედრო ოპერაცია საქართველოში. “სამწუხაროდ, რუსეთის ქმედებებმა რეგიონის უსაფრთხოებას ზიანი მიაყენა” - განაცხადა გეითსმა - “მე კმაყოფილი ვარ, რომ რუსეთი, როგორც ჩანს, ასრულებს ცეცხლის შეწყვეტის შესახებ ხელშეკრულების პირობებს ჯარის გაყვანის ვადებთან დაკავშირებით”.
რუსეთმა ღიად განაცხადა, რომ ის აფხაზეთსა და სამხრეთ ოსეთში დატოვებს სამხედრო კონტინგენტს 8000 მეომრის შემადგენლობით. მოსკოვმა საქართველოსთან ხანმოკლე ომის შემდეგ, ორი რეგიონის დამოუკიდებლობა აღიარა.
ნატომ დაგმო რუსეთის მიერ ამ რეგიონების დამოუკიდებლობის ცნობა და ნატოს გენერალურმა მდივანმა იაპ დე ჰოპ სხეფერმა, განაცხადა, რომ ალიანსი მხარს უჭერს საქართველოს ტერიტორიულ მთლიანობას, თუმცა მან გამორიცხა რეგიონში სამხედრო ძალით ნატოს ჩარევის შესაძლებლობა.
”საქართველოს თავდაცვის მინისტრმა საქართველოს ტერიტორიული მთლიანობის მტკიცე მხარდამჭერის გამომხატველი განცხადებები მოისმინა” - თქვა დე ჰოპ სხეფერმა - “ჩვენ ვიმსჯელეთ ნატოს მიერ საქართველოს თავდაცვის რეფორმის ინტენსიურ ხელშეწყობაზე. უნდა გამოირიცხოს ჩემი განცხადების არასწორი ინტერპრეტაცია - ჩვენ არ მივწავდით საქართველოს იარაღს. მაგრამ გავუწევთ ექსპერტულ კონსულტაციას ნატოს პრიორიტეტების შესაბამისად”.
მან დაამატა, რომ ნატო დაეხმარება საქართველოს კონფლიქტით მიყენებული ზარალის აღდგენაში, მაგალითად, უზრუნველყოფს საჰარო სივრციდან ქვეყნის ტერიტორიის უკეთესს კონტროლს”.
დე ჰოპ სხეფერმა ხაზი გაუსვა იმას, რომ ბუდაპეშტის შეხვედრაზე არ შეფასებულა საქართველოს ალიანსში გაწევრიანების მზადყოფნა. მან განაცხადა, რომ პირველი შეფასებები გაკეთდება დეკემბერში,ბრიუსელში ნატოს საგარეო საქმეთა მინისტრების შეხვედრაზე.
საქართველოს თავდაცვის მინისტრმა დავით კეზერაშვილმა განაცხადა, რომ მის მთავრობას ნატოში სწრაფად გაწევრიანება სურს. ”ვიმედოვნებთ, რომ ჩვენს მიერ ნატოს პოლიტიკის საბაზისო მოთხოვნების კარგი შესრულებით, ჩვენ შევძლებთ ალიანსში გაერთიანებისკენ მიმავალი შემდგომი ნაბიჯის სწრაფად გადადგმას”.
მანამდე, პარასკევს, ნატოს თავდაცვის მინისტრებმა ავღანეთში მიმდინარე მოვლენებზე იმსჯელეს. მათ თავის შეირაღებულ ძალებს ნარკოტიკებით მოვაჭრეებზე შეტევა დაავალეს. ისინი ეჭვმიტანილნი არიან იმაში, რომ წელიწადში 100 მილიონ დოლარზე მეტით ამარაგებენ თალიბების სამხედრო შენაერთებს.
მაგრამ მეომრები ნარკოობიექტებზე შეტევას მხოლოდ მათი მთავრობების უშუალო დავალებით შეძლებენ. გარდა ამისა, მიზანში უნდა ამოიღონ მხოლოდ ნარკოტიკთა ის დამამზდებელი ობიექტები, რომლებიც მეამბოხეებს უჭერენ მხარს. ნატო ამ ამოცანას შეასრულებს მანამდე, სანამ ავღანეთის ჯარები საკუთარ თავზე ამ პასუხისმგებლობის აღებას შეძლებენ.
ნატოს თავდაცვის მინისტრები მისიას კიდევ ერთხელ პოლონეთში, თებერვლის შეხვედრაზე განიხილავენ.
დე ჰოპ სხეფერმა განაცხადა, რომ ის ნაკლებად კმაყოფილია ავღანეთის მისიის სხვა კომპონენტებით. კერძოდ, მას მიაჩნია, რომ საჭიროა ვერტმფრენების ხელახალი აღჭურვა. საქმე ისაა, რომ დაჭრილი მეომრები ბრძოლის ველზე ზედმეტად დიდხანს ელოდებიან სამედიცინო დახმარების მიღებას. საჭიროა ამ ხარვეზის გამოსწორება.
სამხედრო ალიანსმა განიხილა სხვა საფრთხეებიც, მათ შორის, სომალისთან დაკავშირებული. გადაწყდა, რომ იქ გაიგზავნება შვიდი სამხედრო გემი - გაეროს კვების პროგრამის უსაფრთხოების უზრუნველსაყოფად. მეკობრეები თავს დაესხნენ 12 გემს და ისინი დღემდე დატუსაღებული ყავთ. მათ შორისაა უკრაინული საბარგო გემი, რომელსაც მძიმე იარაღი გადაჰქონდა.
ორიგინალი
No comments:
Post a Comment