ინგო მანტეუფელი
9 ოქტომბერი 2008
ევროპა არ უნდა განიმსჭვალოს რუსეთისადმი ზედმეტი ნდობით იმის გამო, რომ მას ბუფერული ზონებიდან ჯარები გაყავს. ინგო მანტეუფელს მიაჩნია, რომ მხოლოდ ამ ნაბიჯით რუსეთი ევროპის სანდო პარტნიორად ვერ ჩაითვლება.
ევიანში თავის ფრანგ პარტნიორთან ნიკოლა სარკოზისთან შეხვედრის წინ რუსეთის პრეზიდენტმა დიმიტრი მედვედევმა ამაყად განაცხადა, რომ საქართველოში ბუფერული ზონებიდან რუსეთი ჯარს დათქმულ ვადაზე ადრე გაიყვანს. განცხადება ერთ რამეს ისახავდა მიზნად - ევროპას უნდა დაენახა, რომ რუსეთი კონსტრუქციული და სტაბილური პარტნიორია და ამით ბოლო თვეებში მისადმი დაკარგული ნდობა უნდა აღედგინა.
პრეზიდენტ მედვედევს შეუძლია თავი მშვიდად იგრძნოს, რადგან რუსეთი ბუფერული ზონებიდან ჯარის გაყვანით დიდ დათმობებზე არ მიდის. სამხედრო სტრატეგიული თვალსაზრისით ეს ნაბიჯი ბევრს არაფერს წყვეტს. რუსული არმია სამხრეთ ოსეთისა და აფხაზეთის ტერიტორიას 7600 მეომრის მეშვეობით დაიცავს და მათ აქ დატოვებას დიდი ხნით გეგმავს.
დიპლომატიურ-პოლიტიკური თვალსაზრისითაც რუსეთი, ჯარების გაყვანით, ასევე ბევრს არაფერს კარგავს. რუსეთის მიერ სამხრეთ ოსეთისა და აფხაზეთის დამოუკიდებლობის ცნობით საქართველოს ტერიტორიული მთლიანობის პრინციპი შელახულია.
რუსეთის პოლიტიკა უცვლელია
ბუფერული ზონებიდან ჯარების გაყვანით რუსეთი თავისი პოლიტიკური კურსის დემონსტრირებას ცდილობს. მოსკოვმა დასახულ მიზნებს უკვე მიაღწია - სეპარატისტული რეგიონების, აფხაზეთისა და სამხრეთ ოსეთის დამოუკიდებლობა აღიარა და მათ სამხედრო ძალით დაიცავს. ახლა კრემლმა უფრო მეტი მოინდომა და ევროკავშირს თავს სანდო და კონსტრუქციულ პარტნიორად აჩვენებს.
მაგრამ ძირეული პრობლემები გადაუწყვეტელი რჩება. რუსეთმა სამხრეთ ოსეთის სეპარატისტული რეჟიმის წინააღმდეგ საქართველოს აგრესიით ისარგებლა და რეგიონების დამოუკიდებლობა აღიარა. ამით, მოსკოვმა პირველად, საბჭოთა კავშირის დაშლიდან 17 წლის შემდეგ ყოფილი საბჭოთა ტერიტორიების საყოველთაოდ აღიარებული საზღვრების ხელშეუხებლობა დაარღვია.
ეს კი, არა მხოლოდ საქართველოს უქმნის საფრთხეს და პრეზიდენტ მიხეილ სააკაშვილს აშფოთებს, არამედ მთელს ევრაზიაში მოვლენათა სახიფათო განვითარების წინაპირობას ქმნის.
კავკასიაში სიტუაციის სტაბილიზაციის პაკეტის შექმნა, რომელთა გარშემოც ჟენევაში მოლაპარაკებები იწყება და რომელშიც რუსეთის, ევროკავშირის, სამხრეთ ოსეთის, აფხაზეთის და საქართველოს წარმომადგენლებიც მიიღებენ მონაწილეობას, გადაუდებლად აუცილებელია. მხოლოდ ამ გზითაა შესაძლებელი კავკასიაში სტაბილური, გრძელვადიანი მშვიდობის მიღწევა. ამ მოლაპარაკებების დროს ევროპის კავშირის პოლიტიკა რუსეთის მიმართ ერთ პრინციპს უნდა დაეფუძნოს, მან რუსეთისგან კონსტრუქციული თანამშრომლობა უნდა მოითხოვოს და არა მხოლოდ რუსული ჯარის გაყვანა ბუფერული ზონებიდან, რომელიც მოსკოვმა ისევ სათავისოდ გააკეთა.
No comments:
Post a Comment