კრისტინ რობერტსი
9 ოქტომბერი 2008
ბუდაპეშტი (Reuters) - აშშ ნატოს საქართველოსთვის მაპის მინიჭებას დეკემბერში სთხოვს - განაცხადა აშშ-ს თავდაცვის მდივანმა რობერტ გეითსმა სამშაბათს, მიუხედავად იმისა, რომ რუსეთთან ომის შემდეგ ქვეყნის უსაფრთხოებასთან დაკავშირებით შეშფოთება გაჩნდა.
ნატო უკრაინასა და საქართველოს საბოოლოდ თავის რიგებში მიღებას დაპირდა, თუმცა აპრილის სამიტზე არ დაეთანხმა ამ ქვეყნებისთვის მაპის მინიჭებას.
"მე მოვუწოდებ ჩვენს მოკავშირეებს მხარი დაუჭირონ დეკემბერში საქართველოსათვის მაპის მინიჭებას და მის მიერ აუცილებელი რეფორმების დასრულებას" - უთხრა გეითსმა ჟურნალისტებს ნატოს თავდაცვის მინისტრთა შეხვედრაზე ბუდაპეშტში.
აშშ-ს ოფიციალურ პირთა ცნობით, რუსეთ-საქართველოს კონფლიქტის შემდეგ ნატოს წევრ ქვეყანათა შორის ზოგიერთს მიაჩნია, რომ ალიანსის წევრთა რაოდენობის გაზრდა და საქართველოსა და უკრაინისთვის მაპის მინიჭება უნდა გადაიდოს.
მაგრამ ვაშინგტონს ძალიან უნდა, რომ რუსეთმა დაინახოს - მოსკოვის ქმედებებმა ვერ შეცვალეს აშშ-ს და, მით უფრო, ნატოს პოლიტიკა.
"ჩვენ მტკიცედ ვუჭერთ მხარს საქართველოს სუვერენიტეტს, დამოუკიდებლობასა და ტერიტორიულ მთლიანობას" - განაცხადა გეითსმა.
"ჩვენ რუსეთთან კონსტრუქციული ურთიერთობის მომხრე ვიყავით, მაგრამ, სამწუხაროდ, მოსკოვის ქმედებებმა საფრთხე შეუქმნეს მშვიდობას რეგიონში და გააჩინა სერიოზული შეშფოთება მისი განზრახვების გამო. რუსეთის შეჭრით საქართველოში, ჩემის აზრით, მოსკოვმა ვერ მიაღწია თავის სტრატეგიულ მიზნებს".
ომი აგვისტოს დასაწყისში დაიწყო მაშინ, როდესაც ქართულმა ჯარებმა სეპარატისტულ პრომოსკოვურ რეგიონზე კონტროლის აღდგენა ძალის გამოყენებით სცადეს. რეგიონი საქართველოს კონტროლიდან გასული საუკუნის ოთხმოცდაათიანი წლების დასაწყისში გამოვიდა. რუსეთმა კონტრშეტევით უპასუხა და თავისი ჯარები საქართველოს ტერიტორიაზე შეიყვანა, რამაც მსოფლიო თანამეგობრობის აღშფოთება გამოიწვია.
ნატომ პროტესტის ნიშნად რუსეთთან ურთიერთობები გაწყვიტა.
აშშ-ს და საქართველოს ხელისუფლების წარმომადგენლები ოქტომბრის ბოლოს შეხვდებიან ერთმანეთს და მოილაპარაკებენ იმაზე, თუ როგორ შეუძლია ვაშინგტონს ქართული ჯარის აღდგენის ხელშეწყობა. გეითსი და საქართველოს თავდაცვის მინისტრი, კეზერაშვილი ერთმანეთს ბუდაპეშტში შეხვდნენ, მაგრამ არ უმსჯელიათ შეიარაღებათა სისტემებზე, რომელიც საქართველოს სჭირდება.
No comments:
Post a Comment