იზაბელ გორსთი
6 ოქტომბერი 2008
ამ შაბათ-კვირას გაერთიანებული ერების ორგანიზაციამ განგაში ატეხა საქართველოში ძალადობის ფაქტების ესკალაციაზე და მოუწოდა რუსეთს 10 ოქტომბრამდე საკუთარი ჯარების გაყვანაზე შეთანხმება შეასრულოს.
რუსულმა ჯარებმა 20 კილომეტრიანი ბუფეული ზონის საზღვართან ბლოკპოსტი მოხსნეს. ამ ტერიტორიის დაკავებით ისინი გარს ერტყმოდნენ სამხრეთ ოსეთს საქართველოსთან კონფლიქტის დასრულების შემდეგ. რუსებმა პირობა დადეს, რომ კიდევ ორ ბლოკპოსტს გააუქმებენ, რაც პოზიტიურ სიგნალად წარმოჩინდა.
როგორც გაეროს გენერალური მდივნის თანაშემწემ, ქვეყნის შიგნით გაადადგილებულთა დაცვის საკითხებში, უოლტერ კალინმა განაცხადა, "შეიარაღებული ძალების მხრიდან ძალადობა და გორის (ქალაქი საქართველოს ცენტრში) ჩრდილოეთით ბუფერულ ზონაში გავრცელებული მოროდიორობა მიუღებელია და სასწრაფოდ უნდა შეწყდეს". მისი თქმით, გასულ კვირას საქართველოში ევროკავშირის დამკვირვებელთა მისიის განლაგებამ, რაც ცეცხლის შეწყვეტის შესახებ შეთანხმებით იყო გათვალისწინებული, და რომელმაც დაავალდებულა რუსეთი ქვეყნიდან ჯარები გაეყვანა, კანონის და წესრიგის აღდგენის გზაზე "მნიშვნელოვანი წინ გადადგმული ნაბიჯია".
ევროკავშირის მისიის ცნობით, კვირას რუსმა ჯარისკაცებმა ბუფერულ ზონებში დამკვირვებლებს შეუზღუდავი მოქმედების საშუალება მისცეს, თუმცა სამხრეთ ოსეთში შესასვლელი დახურული დარჩა.
კრემლმა კონფლიქტის დასრულება სამხრეთ ოსეთის და მეორე სეპარატისტული რეგიონის აფხაზეთის დამოუკიდებლობის აღიარებით აღნიშნა, რითაც საერთაშორისო საზოგადოების პროტესტი გამოიწვია.
შინაგან საქმეთა სამინისტროს წარმომადგენლის, შოთა უტიაშვილის განცხადებით, რუსულმა ჯარებმა პირობა დადეს, რომ დღეს კიდევ ორ ბლოკპოსტს მოხსნიან და 10 ოქტომბრისთვის ბუფერულ ზონას დატოვებენ. "საეჭვოა, მათ გასვლა გადადონ" – თქვა მან.
როგორც კალინმა აღნიშნა, "შიშის ატმოსფერო", რომელიც ბუფერულ ზონებში სუფევს, ხელს შეუშლის ხალხის საკუთარ სახლებში დაბრუნებას.
იგი მიესალმა იმ ფაქტს, რომ საქართველომ დაიწყო მუდმივი საცხოვრებელი სახლების შენება დაახლოებით 30 ათასი ადამიანისთვის, რომლებიც კონფლიქტის ზონიდან გამოდევნეს, და მოუწოდა მთავრობას იმ 200 ათასზე მეტი ქართველის ინტეგრირებაზეც იფიქროს, რომლებმაც თავიანთი სახლ-კარი 1990-იანი წლების სამოქალაქო ომში დაკარგეს "ბევრი მათგანი დღესაც კოლექტიურ თავშესაფრებში, აბსოლუტურად მიუღებელ პირობებში ცხოვრობს".
No comments:
Post a Comment