ფილიპ ბოლოპიონი და ნატალი ნუგაირედი
26 სექტემბერი 2008
ეს საერთაშორისო დიპლომატიის ერთ-ერთი ყველაზე ცნობილი საიდუმლოა: რუსეთის საგარეო საქმეთა მინისტრი სერგეი ლავროვი და მისი ამერიკელი კოლეგა კონდოლიზა რაისი ერთმანეთს ვერ იტანენ, რაც კიდევ უფრო წამლავს ამ ორი ქვეყნის ისედაც დაძაბულ ურთიერთობას. "მათი ურთიერთობა აუტანელია, და რაც დრო გადის, უფრო რთულდება" – ამბობს Washington Post-ის ჟურნალისტი გლენ კესლერი, რომელიც იმავდროულად ამერიკის სახელმწიფო მდივანზე გამოცემული წიგნის ავტორია.
მას შემდეგ რაც მოსკოვმა აფხაზეთის და სამხრეთ ოსეთის დამოუკიდებლობა აღიარა, რაისი სამი კვირის მანძილზე ლავროვთან დალაპარაკებაზე უარს ამბობდა. "მას უბრალოდ არ უნდოდა ლავროვთან დარეკვა" – გვიხსნის კესლერი. შეხვედრა როგორც იქნა 24 სექტემბერს გაეროს გენერალური ასამბლეის ფარგლებში გაიმართა.
დომპლომატები რუსი მინისტრისა და ამერიკელი ქალბატონის მტრული ურთიერთდამოკიდებულებით ხსნიან იმ ფაქტსაც, რომ ლავროვმა ხუთშაბათს გაეროში დაგეგმილი შეხვედრა ჩაშალა, რომელზეც ირანის მიმართ ახალი სანქციების თემა უნდა განეხილათ. ერთი კვირით ადრე, რაისმა თავის გამოსვლაში რუსეთი "ბნელ მისწრაფებებსა" და "პარანოიდალური და აგრესიული ” ტენდენციებისკენ მიბრუნებაში დაადანაშაულა.
ამის ნიშნები ჯერ კიდევ 2005 წელს ანკარაში, მათი პირველი შეხვედრის დროს გაჩნდა. სერგეი ლავროვი მაშინ მთელი მოლაპარაკების მანძილზე უკმაყოფილო იყო. ის სახელმწიფო მდივანზე უპირატესობის მოპოვებას მეორეხარისხოვანი საკითხებით ცდილობდა. "ლავროვს რაისის მიმართ აშკარა სიძულვილი ამოძრავებს. ზოგიერთები იმასაც ფიქრობენ, ხომ არ აიხსნება ამგვარი დამოკიდებულება სექსიზმით და შესაძლოა რასიზმითაც" – ამბობს კესლერი. როგორც ჩანს რუს დიპლომატს მიაჩნია, რომ, რაისი, რომელიც საბჭოთა კავშირის საკითხების სპეციალისტია, თანამედროვე რუსეთს ცუდად იცნობს".
როგორც ჩანს, ლავროვმა ნელ-ნელა რაისის გაღიზიანების ხელოვნება დახვეწა, იმდენად რომ ამერიკელი კოლეგა მასთან ხშირად უხეშობს და ხანდახან ზედმეტად ემოციურიც კია". დიპლომატების თქმით, ლავროვი, რომელმაც 10 წელიწადზე მეტხანს გაეროში რუსეთის ელჩად იმუშავა, მოლაპარაკებების დროს ხან "მშვიდი და სასტიკია", ხან კი "საშიში და უბრალოდ არასასიამოვნო".
"წვრილმანი გამოხტომები"
ასეთი დამოკიდებულება ერთხელ საჯაროც გახდა, როდესაც 2006 წლის ივნისში, შემთხვევით დარჩენილი ჩართული მიკროფონის გამო ჟურნალისტები მათი ჩხუბის უშუალო მოწმენი გახდნენ. "ბავშვებივით ჩხუბობდნენ" – გვითხრა იქ მყოფმა ერთ-ერთმა რეპორტიორმა. დიპლომატები, მართალია ერთმანეთს სახელებით - "სერგეი" და "კონდი"-თ – მიმართავდნენ, მაგრამ ყოველწუთს ერთმანეთს საუბარს აწყვეტინებდნენ და ერაყთან დაკავშირებული დეკლარაციის უმნიშვნელო დეტალებზე გაცხარებით კამათობდნენ, მაშინ როდესაც დანარჩენი მინისტრები მათ მორიგებას უნდებოდნენ.
დიპლომატები შეწუხებულები არიან, რომ მათი ცუდი ურთიერთობის გამო დღეს ირანის ბირთვულ პრობლემაზე მოლაპარაკებები ზარალდება. "ეს დოსიეს ერთ-ერთი ფაქტორია" – ამბობს ანონიმური წყარო. მოწმეები ყვებიან, რომ 2006 წელს ერთ-ერთ შეხვედრაზე ლავროვი და რაისი საათზე მეტხანს კამათობდნენ, და მხოლოდ ამის შემდეგ დაუბრუნდნენ მათი თანაშემწეების მიერ სკურპულოზურად მომზადებულ შეთანხმებას. რაისი "ყველაფერს აკეთებს ამ რთული ურთიერთობების გადასალახად" – ამბობს გლენ კესლერი, რომელიც დარწმუნებულია, რომ ლავროვი მისი "სარკასტული კომენტარებითა და წვრილმანი გამოხტომებით" ამერიკელ კოლეგას სხვა გზას უბრალოდ არ უტოვებს და პერიოდულად მისი მოთმინების ფიალა ივსება.
ორიგინალი
No comments:
Post a Comment