მაიკლ სკოტი
25 სექტემბერი 2008
მოსკოვი - საქართველოში შეჭრის შემდეგ დასავლეთმა მოსკოვი სამარცხვინო ბოძზე გააკრა. რუსეთში დასავლეთის ამ რეაქციამ უკიდურესი აღშფოთება გამოიწვია, რაც დასავლეთის, და არა მხოლოდ დასავლეთის, უსაფრთხოებას სერიოზულ საფრთხეს უქმნის.
სახელმწიფო მდივანმა კონდოლიზა რაისმა თავის კოლეგას, სერგეი ლავროვს ნიუ-ორკში, გაეროში გამართულ შეხვედრაზე ნოტაცია წაუკითხა და უთხრა, რომ ახლა რუსეთი იზოლაციაშია მოქცეული. რაზეც ლავროვისგან შემდეგი პასუხი მიიღო - მისი უბის წიგნაკი არასდროს ყოფილა ისე გადატვირთული შეხვედრების განრიგით, როგორც დღეს.
კარგად გათვლილ, ერთი შეხედვით რბილ პასუხში ის იკითხებოდა, რაც რუსეთის ქუჩებში უკვე კარგა ხანია ისმის - დასავლეთი რუსეთისადმი იმ პატივისცემას არ იჩენს, რომელსაც ეს ქვეყანა რეალურად იმსახურებს. მტრული განწყობები, რომლებსაც ადრე ყველა კომუნიზმსა და კაპიტალიზმს შორის არსებული იდეოლოგიური განსხვავებებით ხსნიდა, უკან ისეთი ძალით ბრუნდება, რომელსაც არავინ ელოდა.
რუსეთის განაწყენება საქართველოს ომთან დაკავშირებით ერთმა ფაქტორმა განაპირობა - დასავლეთის სახელმწიფოთა უმრავლესობა საჯაროდ არ აღიარებს იმას, რასაც პრივატულ საუბრებში აცხადებს - კონფლიქტი თბილისმა დაიწყო.
რუსეთისთვის დამატებითი დარტყმა ისიც იყო, რომ დასავლეთი საქართველოს ლიდერის მიხეილ სააკაშვილის (რომელსაც მოსკოვი ვერ იტანს) დასაცავად გაერთიანდა, ხოლო დასავლური მედია კონფლიქტის მიმდინარეობას მთლიანად საქართველოს სასარგებლოდ აშუქებდა.
"ბოლო 25 წლის განმავლობაში აღარ ყოფილა, რომ რუსეთსა და დასავლეთს ერთი და იმავე მოვლენის ამდენად განსხვავებული ინტერპრეტაცია ჰქონოდა" - წერდა ახალი ამბების საიტზე გაზეტა.რუ-ში, სტატიაში "განქორწინება დასავლეთთან" პოლიტიკური კომენტატორი ჯორჯ ბოვტი . "დასავლურ მედიაში გაკეთებული შეფასებები, არასდროს დაშორებია ასე რადიკალურად მოვლენათა აღქმას, აქ, რუსეთში".
დასავლეთის ყოველი შემდეგი სვლა, რომლებიც მოსკოვის მიერ მტრულ ნაბიჯებად განიხილება, კიდევ უფრო ძაბავს სიტუაციას და უფო მეტად აღაშფოთებს რუსებს.
რუსეთის თვალთახედვით, დასავლეთმა მოსკოვი არად ჩააგდო, როცა კოსოვოს დამოუკიდებლობა აღიარა, როდესაც აშშ-მ არ შეისმინა მისი საპროტესტო განცხადებები და აღმოსავლეთ ევროპაში სარაკეტო დანადგარების განთავსება გადაწყვიტა, იმ დროსაც, როცა ერაყში შეიჭრა და, რაც მთავარია მაშინ, როდესაც რუსეთისთვის 90-იანებში მიცემული პირობა დაარღვია და ნატოს აღმოსავლეთით გაფართოება დაიწყო. როგორც ჩანს, რუსებს მოთმინების ფიალა აევსოთ.
დამარცხებული რუსეთი
მოსკოვში მცხოვრები მაღალი რანგის დიპლომატებიდან ერთმა-ერთმა პრობლემა ასე ჩამოაყალიბა: "ჩვენ რუსეთი საქართველოს გამო აბსოლუტურად დავკარგეთ. პროდასავლურად განწყობილმა ინტელექტუალებმა და საელჩოს თანამშრომლებმაც კი ზურგი მოგვაქციეს".
"ამ საზოგადოებაში არავინაა ისეთი, ვინც მოვლენებს ჩვენი თავლით ხედავს" - გააკეთა კომენტარი ერთ-ერთმა მაღალი რანგის დასავლელმა დიპლომატმა. "რუსეთი 18 წლის განმავლობაში დაგროვილ წყენაზე რეაგირებს, დასავლეთი კი სრულ იგნორირებას უკეთებს. მეტის მოთმენა აღარ უნდათ".
პრეზიდენტმა დიმიტრი მედვედევმა 12 სექტემბერს დასავლელ ანალიტიკოსებთან შეხვედრის დროს ასეთი შეჯამება გააკეთა: "მე ვფიქრობ, რომ ჩვენი მოსახლეობის დიდ უმრავლესობას კავკასიაში განვითარებულმა მოვლენებმა ის ილუზიები დააკარგვინა, რომლითაც ამ ბოლო წლების განმავლობაში ვიკვებებოდით" - მედვედევი 90-იან წლებზე მიანიშნებდა, როდესაც რუსეთს დასავლეთთან თაფლობის თვე ჰქონდა.
იმას, რომ რუსეთმა საქართველოს გამო დასავლეთის რწმენა დაკარგა, სერიოზული შედეგები შეიძლება მოყვეს. აქვეა უკრაინა, რომელიც შემდეგი ბრძოლის ველად შეიძლება იქცეს შეშინებულ, უნდობლობით განმსჭვალულ დასავლეთსა და გაბრაზებულ, გულზე მოსულ რუსეთს შორის.
აშშ-ს ყოფილი ელჩი მოსკოვში ჯეკ მეტლოკი საქართველოსა და უკრაინის ნატოში გაწევრიანების მცდელობას აკრიტიკებს. ამ პოლიტიკამ შეიძლება უკრაინა ორად გაყოს. მანამდე, სანამ დასავლეთი მსგავს კურსს მიყვება, სტრატეგიული თანამშრომლობა რუსეთთან ვერ შედგება.
"ჩვენ ღრმა კრიზისში ვართ" - გვითხა კიდევ ერთმა მაღალი რანგის დიპლომატმა მოსკოვში - "ჩვენ კონფრონტაციაზე წავედით, უკან დაბრუნება ძალიან გაგვიჭირდება".
დასავლეთს რუსეთთან კოოპერაცია ბევრ საკითხში სჭირდება, დაწყებული ირანის ბირთვული პროგრამიდან და ისლამისტთა მიერ კავკასიიდან, ავღანეთამდე შექმნილი პრობლემებით დამთავრებული.
რუსეთმა "ცივი ომის" ჟესტი გაიმეორა, როდესაც კარიბის ზღვაში, ამერიკის ცხვირწინ საომარი ფლოტი გაგზავნა და ვენესუელის ანტიამერიკელ პრეზიდენტთან, ჰუგო ჩავესთან ერთად მანევრები ჩაატარა. მოგვიანებით, რუსეთმა დასავლეთის დიდ სახელმწიფოებს კიდევ ერთი სიგნალი გაუგზავნა და მიანიშნა, რომ გაეროში ირანის ბირთვულ პროგრამასთან დაკავშირებით მათ მხარს აღარ დაუჭერს.
საზოგადოებრივი კვლევა ადასტურებს, რომ საქართველოში ჯარების გაგზავნას, მოსახლეობა ემხრობა, დიმიტრი მედვედევის გადაწყვეტილებები უზომოდ პოპულარულია, ხოლო დასავლეთისადმი დამოკიდებულება უკიდურესად ნეგატიური.
კრემლი და მედიაკონტროლი
დამოუკიდებელი ცენტრის, "ლევადას" მიერ ჩატარებული კვლევის შედეგები აჩვენებს, რომ აშშ-სადმი დამოკიდებულება რუსეთში ივლისიდან სექტემბრამდე 40 პუქტით დაეცა და 1997 წლის შემდეგ ყველაზე ნეგატიურ ნიშნულამდე დავიდა. ევროპისადმი მხარდამჭერმა პოზიციამ მხოლოდ 29 პუნქტით დაიწია.
"ძალიან ძნელია დღევანდელ ვითარებაში პროდასვლური პოზიცია შეიანრჩუნო" - გვითხრა ფიოდორ ლუკიანოვმა, საგარეო პოლიტიკური ჟურნალის რედაქტორმა. "რუსეთში თანხმობა იმის თაობაზე, რომ დასავლეთი ტყუის, შედგა". ამავე დროს დასავლური მედიაც "ცივი ომის" სტერეოტიპებს დაუბრუნდა და გაუთავებლად აგრსიული საშიში დათვის ხატ-სურათს ხატავს.
"მე მესმის ამ ადგილზე ჩადებული ინვესტიციების ფასი, მაგრამ ყველაზე დიდი პობლემა ისაა, რომ როცა სახლში ვბრუნდები, იმ ადამიანებს ვხვდები, ვინც CNN-ს უყურებს და ფიქრობს, რომ რუსეთი ისეთივეა, როგორც ჩრდილო კორეა"- გვითხრა ერთმა იმედგაცრუებულმა ამერიკელმა ინვესტორმა.
ენდრიუ სომერსმა, ამერიკულ-რუსული სავაჭრო პალატის ხელმძღვანელმა აღნიშნა, რომ უამრავმა ამერიკულმა კორპორაციამ, რომელიც რუსეთში აქტიურად ოპერირებდა, ბიზნესი შეაჩერა, ნაწილობრივ სწორედ ნეგატიური მედიის გამო.
პრეზიდენტმა ვლადიმერ პუტინმა, რომელიც ცნობილია დასავლეთზე თავისი გესლიანი გამოთქმებით, 11 სექტემბერს, დასავლელ ანალიტიკოსებთან შეხვედრაზე დასავლური მედია საშინლად გააკრიტიკა. "გამაოცა დასავლეთის პროპაგანდისტული მანქანის ძლევამოსილებამ" - განაცხდა მან - "ვულოცავ ყველას, ვინც ამ პროცესში მონაწილეობდა. გადასარევი ნამუშევარი იყო. მაგრამ შედეგი ცუდი მიიღეთ და ყოველთვის ასე მოხდება იმიტომ, რომ უპატიოსნოდ, ამორალურად მუშაობდით".
სიმართლე რომ ვთქვათ, საზოგადოების ანტიდასავლური განწყობა მთლიანად სპონტანური როდია. კრემლის მიერ კონტროლირებული ტელევიზიები ყველაფერს აკეთებენ იმისთვის, რომ ხალხის რისხვა არ ჩაცხრეს. დანგრეული სახლების და დაღუპული ადამიანების ხატები ეკრანზე არ წყდება. ახალ ამბებში "ქართულ ნაციზმს" გმობენ და თბილისის მხარდამჭერ დასავლეთს ამხელენ.
მედია ომმა ერთი შედეგი გამოიღო: დასავლეთის მიერ რუსული საინფორმაციო საშუალებების კრიტიკა თავის მიზანს ვეღარ აღწევს, რადგან ბევრი მიხვდა, რომ დასავლური მედიაც ისეთივე მიკერძოებულია, როგორც რუსული.
"დისკუსიები სიტყვის თავისუფლებაზე აქ საბოლოოდ შეწყდა" - გვითხრა მეორე დიპლომატმა. "ჩვენი რუსი კოლეგები გვეუბნებიან, რომ ცხადად დაინახეს როგორ მანიპულირებს, როგორ ამახინჯებს დასავლური პრესა რეალობას საქართველოს ამბების გაშუქებისას. ასე რომ, გვეუბნებიან ისინი, თქვენი გაკვეთილები პრესის თავისუფლებაზე აქ აღარავის სჭირდება".
No comments:
Post a Comment