4 ოქტომბერი 2008
სახელმწიფო მდივანმა, კონდოლიზა რაისმა თვის ბოლო გამოსვლაში საქართველოსა და რუსეთს შორის, სეპარატისტული რეგიონების, სამხრეთ ოსეთისა და აფხაზეთის გამო წამოჭრილი კონფლიქტის დახასიათებისას თქვა, რომ კრიზისის მიზეზები რთულია და ყველა მხარემ დაუშვა: "შეცდომები".
მაგრამ არც ერთი ამ შეცდომათაგანი არ ამართლებს რუსეთის ქმედებებს, რომელმაც სრულმასშტაბიანი შეტევა წამოიწყო, გადალახა საყოველთაოდ აღიარებული საზღვრები, ათასობით უდანაშაულო ადამიანი იძულებული გახადა მიეტოვებინა საკუთარი სახლები. რუსეთის ლიდერებმა, განაცხადა სახელმწიფო მდივანმა, კონდოლიზა რაისმა, მოახდინეს საქართველოს ტერიტორიის სამხედრო ოკუპაცია და დაარღვიეს საფრანგეთისა და ევროპის კავშირის პრეზიდენტის, ნიკოლა სარკოზის შუამავლობით დადებული ხელშეკრულება ცეცხლის შეწყვეტის შესახებ.
"რუსეთის მიერ ამ კონფლიქტის მსველობისას გადადგმული ყველა დანარჩენი ნაბიჯიც სერიოზულ შეშფოთებას იწვევს: საგანგაშო განცხადებები ქართველთა მიერ მოწყობილი "გენოციდის" შესახებ, სრულიად დაუსაბუთებელი ბრალდებები აშშ-ს როლზე კონფლიქტში, სუვერენული ქვეყნის დაშლის მცდელობები და აფხაზეთისა და სამხრეთ ოსეთის დამოუკიდებლობის აღიარება, მისი განცხადებები "პრივილეგირებული ინტერესების" სფეროებზე და დამოკიდებულება მეზობელი დამოუკიდებელი ქვეყნებისადმი, აფხაზეთისა და სამხრეთ ოსეთის ტერიტორიებზე არასამთავრობო ორგანიზაციებისა და დამკვირვებელთა შესვლის დაბლოკვა,მიუხედავად იმისა, რომ მილიცია იქ უდანაშაულო ქართველთა უფლებებს არღვევს, დევნის მათ".
სახელმწიფო მდივანმა განაცხდა, რომ რუსეთის ქმედებები სავსებით შეესაბამება ქცევის იმ მოდელს,რომელიც მან ამ ბოლო დროს აირჩია.
"ყველა სხვა ფაქტთან ერთად, მე ვგულისხმობ რუსეთის მიერ სუვერენული მეზობლების დაშინების პრაქტიკას, იმას, რომ ნავთობსა და გაზს პოლიტიკურ იარაღად იყენებს, ცალმხრივად აფერხებს C-F-E-ს მუშაობას, მშვიდობიან სახელმწიფოებს ბირთვული იარაღის გამოყენებით ემუქრება, აწვდის იარაღს სახელმწიფოებსა და ჯგუფებს, რომელნიც საერთაშორისო უსაფრთხოებას ემუქრებიან, სდევნის რუს ჟურნალისტებს, დისიდენტებს და ა.შ. ქცევის ეს მოდელი ადასტურებს, რომ რუსეთის ქვეყნის შიგნით და მის საზღვრებს გარეთ სულ უფრო და უფრო იხრება ავტორიტარიზმისკენ".
რუსეთის შეჭრით საქართველოში - განაცხადა სახელმწიფო მდივანმა - მოსკოვმა ვერ მიაღწია და ვერც მომავალში მიაღწევს თავის სტრატეგიულ მიზნებს. ამერიკის შეერთებული შტატების უმთავრესი ამოცანაა: "გააგებინოს რუსეთის ლიდერებს, რომ მათ მიერ არჩეული გზა საერთაშორისო ურთიერთობათა კონტექსტში ირელევენტურია და მას ქვეყანა თვითიზოლაციისკენ მიყავს".
No comments:
Post a Comment