27 სექტემბერი 2008
სენატორმა ჰილარი როდჰემ კლინტონმა კანონპროექტი წარმოადგინა, რომელიც საფუძვლად დაედება ქართულ-რუსული კონფლიქტის შემსწავლელი კომისიის შექმნას. კომისიის მიზანი იქნება რუსეთსა და საქართველოს შორის კონფლიქტის მიზეზების გამოძიება და რეკომენდაციების შემუშავება, რომლითაც აშშ-მ მომავალში - რუსეთის, საქართველოს და რეგიონის სხვა ქვეყნების მიმართ - თავის პოლიტიკა უნდა აწარმოოს.
"რუსეთ-საქართველოს კონფლიქტმა მოქმედი ადმინისტრაციის პოლიტიკის მიმართ სერიოზული კითხვები გააჩინა. ჩვენ გვჭირდება გავერკვეთ რა როლი ვითამაშეთ ამ კონფლიქტში და მომავალში რა ნაბიჯები უნდა გადავდგათ. კომისია ძალისხმევის ფოკუსირებას კონფლიქტის არსებითი ფაქტების შესწავლაზე მოახდენს და მოამზადებს რეკომენდაციებს, როგორ უნდა იმოქმედოს აშშ-მ მომავალში რუსეთის და მისი მეზობლების მიმართ" - განაცხადა სენატორმა კლინტონმა.
კომისია 9 წევრისგან დაკომპლექტდება. მასში შევლენ ცნობილი კონგრესმენები. კომისიას კონფლიქტის ირგვლივ მოსმენების მოწვევის, ჩვენებების მიღებისა და მტკიცებულებათა მოპოვების უფლებამოსილება ექნება. კომისია შეისწავლის: რუსეთის პოლიტიკას საქართველოსთან და რეგიონებთან, სამხრეთ ოსეთთან და აფხაზეთთან მიმართებაში - კონფლიქტის დაწყების დღიდან ანუ 1991 წლიდან, ასევე ჩრდილო ატლანტიკური ორგანიზაციის და 2008 წლის ბუქარესტის სამიტის როლს კონფლიქტის განვითარების საქმეში, აშშ-ს პოლიტიკას რუსეთთან და საქართველოსთან მიმართებაში, რუსეთის მშვიდობისმყოფელების როლს სამხრეთ ოსეთში და ურთიერთობას მათსა და საქართველოს შორის, ასევე რუსეთის და საქართველოს სამხედრო მზადებას კონფლიქტის დაწყებამდე. ამის შემდეგ კომისია შეიმუშავებს რეკომენდაციებს ამერიკის პოლიტიკური კურსის განსაზღვრისთვის - რუსეთის, საქართველოს და რეგიონის სხვა ქვეყნების მიმართ.
ამ თვის დასაწყისში, სენატის სამხედრო კომიტეტში გამართული მოსმენის დროს, სენატორი კლინტონი უკვე გამოვიდა ამ კომისიის შექმნის წინადადებით.
No comments:
Post a Comment