24 სექტემბერი 2008
პარიზი - საფრანგეთი მაინც იმედოვნებს, რომ მიმდინარე კვირას ექვსი სახელმწიფოს შეხვედრა ირანის ბირთვულ პროგრამაზე ერთობლივი პასუხის შესამუშავებლად, რუსეთის წინააღმდეგობის მიუხედავად, მაინც შედგება - განაცხადა საფრანგეთის საგარეო მინისტრმა ოთხშაბათს.
პარიზმა მოუწოდა ბრიტანეთის, ჩინეთის, გერმანიის, რუსეთისა და აშშ-ს საგარეო საქმეთა მინისტრებს საფრანგეთთან ერთად ნიუ-ორკში, გაეროს გენერალური ასამბლეის თანმდევი შეხვედრების ფარგლებში კრიზისთან დაკავშირებით მოლაპარაკებები გაემართათ.
მაგრამ საქართველოში მის ქმედებებზე დასავლეთის რეაქციით გაღიზიანებულმა რუსეთმა, სამშაბათს განაცხადა, რომ ვერ ხედავს მოლაპარაკებების დაუყოვნებლივ ჩატარების საჭიროებას. ამ მოლაპარაკებებზე თეირანის წინააღმდეგ ახალი სანქციები უნდა განეხილათ.
"ჩვენ იმედი გვაქვს, რომ შეხვედრა მაინც შედგება" - განაცხადა საფრანგეთში საგარეო საქმეთა სამინისტროს სპიკერმა, ამტკიცებდა რა, რომ ექვსი სახელმწიფოს მიერ შექმნილი ჯგუფი სწორედ ის ფორუმია, რომელსაც შეუძლია ირანის ბირთვულ ამბიციებს ადეკვატურად უპასუხოს.
მან დაამატა, რომ დისკუსიები ნიუ-ორკში ექვსი სახელმწიფოს საგარეო უწყებათა წარმომადგენლებს შორის გაგრძელდება.
სამშაბათს რუსეთმა განაცხადა, რომ ვერ ხედავს მინისტერიალის ჩატარების საჭიროებას და აშშ-ც დაეთანხმა მოლაპარაკებების გაუქმებას.
ე.წ. P5+1 ჯგუფი შედგება გაეროს უშიშროების საბჭოს მუდმივი წევრებისგან, პლუს გერმანია. ის თეირანის მიერ ურანის გამდიდრების პროგრამის პრობლემის გადაწყვეტისთვის დაფუძნდა, რადგან არსებობს ეჭვი, რომ ირანი ატომური ბომბის შექმნაზე მუშაობს.
ირანი ამტკიცებს, რომ ის უბრალოდ სამშვიდობო ბირთვულ პროგრამას ამუშავებს.
რუსეთი ირანს სამშვიდობო ბირთვული პროგრამის განხორციელებაში ეხმარებოდა, ამიტომ ექვსთაგან ის ყველაზე ნაკლებადაა დაინტერესებული მკაცრი სანქციების შემოღებაში.
დასავლეთის დიპლომატიური ურთიერთობები რუსეთთან მას შემდეგ გამწვავდა, რაც აგვისტოში რუსული ჯარი საქართველოსა და მის სეპარატისტულ რეგიონს შორის ატეხილ კონფლიქტში ძალისმიერად ჩაერია.
No comments:
Post a Comment