24 სექტემბერი 2008
რუსეთმა, რომელიც დასავლეთმა საქართველოს კონფლიქტის გამო დაადანაშაულა, ნიუ-ორკში საპასუხო დარტყმა განახორციელა, როდესაც ირანის ბირთვულ პროგრამასთან დაკავშირებული მინისტერიალი ჩაშალა.
ექვსი ქვეყნის მთავარ დიპლომატებს ირანის ურანის გამდიდრების პროგრამის შეჩერებასთან დაკავშირებით, გაეროს გენერალური ასამბელის პარალელურად, სამშაბათს დებატები უნდა გაემართათ და ირანისთვის დასაწესებელ ახალ სანქციებზე ემსჯელათ - გვითხრა საფრანგეთის საგარეო საქმეთა მინისტრმა.
მაგრამ რუსეთის საგარეო საქმეთა მინისტრს არ მიაჩნია, რომ მსგავსი შეხვედრის ჩატარება სასწრაფოა.
"ჩვენ ვერ ვხედავთ იმის საჭიროებას, რომ ყველაფერი გვერდზე გადავდოთ გაეროს გენერალური ასამბლეის ისედაც გადატვირთულ განრიგში და ირანის ბირთვულ პროგრამაზე დისკუსია ჩავსვათ" - ნათქვამი იყო მინისტრის განცხადებაში.
ამერიკის შეერთებულმა შტატებმა განაცხადა, რომ შეხვედრა გადაიდო.
"ხუთი მინისტრის პლუს ერთის შეხვედრა არ აშედგება" - უთხრა სახელმწიფო დეპარტამენტის სპიკერმა შონ მაკკორმაკმა ჟურნალისტებს.
ჯგუფი P5 პლუს ერთი, გაეროს უშიშროების საბჭოს 5 მუდმივი წევრისგან შედგება: აშშ, რუსეთი, ჩინეთი, ბრიტანეთი და საფრანგეთი. მათ ემატება გერმანიაც. ეს ჯგუფი ცდილობს დაითანხმოს ირანი ურანის გამდიდრების პროგრამის შეჩერებაზე.
დასავლეთს ეჭვი აქვს, რომ ირანი ფარულად ატომური ბომბის შექმანზე მუშაობს, ამიტომ ჯგუფი გაეროს უშიშროების საბჭოს მიერ ირანის საწინააღმდეგო ახალი სანქციების შემოღებაზე მუშაობს. ირანი ამტკიცებს, რომ მისი ბირთვული პროგრამა სამშვიდობოა.
გერმანიის საგარეო საქმეთა მინისტრმა შტეინმეირმა, რომელიც ნიუ-იორკში გაეროს ასამბლეას ესწრება, განაცხადა, რომ შეშფოთებულია შეხვედრის გადავადებით.
"ასეთი შეხვედრების გარეშე, რომელთა ჩატარებაც დაუყოვნებლივაა საჭირო, ერთობლივი საერთაშორისო ზომების შემუშავება გართულდება" - თქვა შტეინმეირმა.
რუსეთთან უთანხმოების გამო ევროპამ გააუქმა მაღალი დონის მოლაპარაკებები ჟენევაში, რომელიც მომავალ თვეში საქართველოს კონფლიქტთან დაკავშირებით უნდა გამართულიყო, განაცხადეს საგარეო საქმეთა მინისტრებმა.
შეხვედრები ჩატარდება მხოლოდ ექსპერტების დონეზე.
სახელმწიფო დეპარტამენტის მაღალი თანამდებობის პირმა გვითხრა, რომ სწორედ რუსეთმა ჩაშალა P5 პლუს ერთის შეხვედრა და ეს ყველაფერი საქართველოს კრიზისს უკავშირდება.
"ახლა ცხადი გახდა, რომ P5-ის, როგორც მინიმუმ, ორი წევრი, რუსეთი და ჩინეთი მზად არ არიან ახალ სანქციებთან დაკავშირებული რეზოლუციის შემუშავების პროცესში აქტიური თანამშრომლობისთვის" - თქვა მან.
"ჩინეთი მზადაა მოლაპარაკებებისათვის", მაგრამ რუსეთმა შეხვედრა კითხვის ქვეშ დააყენა "ისინი სიტუაციის სიმწვავეს ვერ ხედავენ" - გვითხრა ოფიციალურმა პირმა.
"რუსეთთან ჩვენი ურთიერთობები დამძიმდა... ეს ყველა საზღვარს გასცდა".
დაძაბულობამ მოსკოვთან, რომელიც საქართველოს ომის შემდეგ დაიწყო, გაეროს გენერალურ ასამბლეაზეც დატოვა კვალი.
თავის დასამშვიდობებელ გამოსვლაში გაეროს ასამბლეაზე, ჯორჯ ბუშმა რუსეთი გაეროს ქარტიის დარღვევაში დაადანაშაულა. მის ადმინისტრაციას მიაჩნია, რომ საქართველოში, ყოფილი საბჭოთა რესპუბლიკის ტერიტორიაზე, რუსეთის შეჭრა წინასწარგანზრახული იყო.
ამავე დროს, მიხეილ სააკაშვილი, გაეროს თავისი პრინციპების დაცვისკენ მოუწოდებდა.
"ან ეს ინსტიტუტი თავისი პრინციპების დასაცავად იბრძოლებს, ან ნებას დართავს მათ ტანკებითა და ეთნიკური წმენდებით ეს პრინციპები გათელონ" - განაცხადა სააკაშვილმა ასამბლეაზე.
სააკაშვილი ამბობს, რომ რუსეთის თავდასხმა, რომელიც ორი პრორუსული რეგიონიდან ქართული ჯარის გამოსვლით დასრულდა, "მთავარი გამოწვევაა".
რაისი და სააკაშვილი ასამბელის მიმდინარეობისას ერთმანეთს შეხვდნენ.
სახელმწიფო დეპარტამენტმა გამოსცა განცხადება: "საქართველოს აღდგენასთან დაკავშირებული დისკუსიების თაობაზე, სადაც მოკლევადიან, საშუალოვადიან და გრძელვადიან პერსპექტივაში საქართველოს აღდგენის საკითხები განიხილება".
აქვე განიხილება ჟენევის მოლაპარაკებები და ევროკავშირის დონორთა კონფერენციაც.
დისკუსიებზე ასევე იმსჯელებენ "ცეცხლის შეწყვეტის შესახებ შეთანხმების პირობების შესრულებაზე და საქართველოს ეკონომიკური აღორძინების გრძელვადიან პერსპექტივაზე" - ნათქვამია განცხადებაში.
No comments:
Post a Comment