24 სექტემბერი 2008
The Associated Press
სერბეთის პრეზიდენტი, რომელიც საერთაშორისო სასამართლოში კოსოვოს დამოუკიდებლობაზე სარჩელის შეტანას იმედოვნებს, გაეროს წევრ ქვეყნებს მხარდაჭერას სთხოვდა.
ტადიჩმა განაცხადა, რომ კოსოვოს მიერ თებერვალში ცალმხივად გამოცხადებული დამოუკიდებლობა გაეროს პრინციპებისთვის გამოწვევაა.
"კოსოვოს ცალმხრივად აღიარების შემდეგ გაეროს წევრი ქვეყნების ტერიტორია შეიძლება დაიყოს მათი სურვილის საპირისპიროდ და უშიშროების საბჭოს აზრის გაუთვალისწინებლად" - განაცხადა ტადიჩმა თავის გამოსვლაში გაეროს ასამბლეის 63-ე სესიაზე.
გენერალურმა ასამბლეამ უახლოეს დროში კენჭი უნდა უყაროს სერბეთის სარჩელის გადაგზავნას ჰააგის ტრიბუნალში.
სერბეთი ეძიებს პასუხს კითხვაზე, რამდენად შეესაბამება საერთაშორისო სამართლის ნორმებს დამოუკიდებლობის ცალმხრივად გამოცხადება.
კოსოვოს დამოუკიდებლობა აშშ-მ და ევროპის თითქმის ყველა ქვეყანამ აღიარა. მაგრამ გაეროს წევრთა სამი მეოთხედი ამ ფაქტს არ დაეთანხმა. ბევრი ქვეყანა შიშობს, რომ კოსოვოს (2 მილიონი მოსახლეა და აქედან 90% ალბანელია), აღიარება მთელს მსოფლიოში სეპარატისტული მოძრაობების გააქტიურებას გამოიწვევს.
ვაშინგტონი ამტკიცებს, რომ კოსოვო განსაკუთრებული შემთხვევაა და რომ მისი დამოუკიდებლობის აღიარება არ ქმნის პრეცედენტს საერთაშორისო სამართლისთვის.
"ჩვენ მოვისმინეთ არგუმენტები, რომელთა თანახმადაც კოსოვოს საქმე უნიკალურია" - თქვა ტადიჩმა - "მაგრამ ეს იმას ნიშნავს, რომ კოსოვო საერთაშორისო სამართლის მიღმა რჩება, რომ ის გამონაკლისია და იმ წესებზე მაღლა დგას, რომელიც მსოფლიო საზოგადოებას მართავს".
ტადიჩმა იმაზეც მიანიშნა, რომ დასავლეთის მიერ კოსოვოს დამოუკიდებლობის აღიარება ორი სეპარატისტული რეგიონის, სამხრეთ ოსეთისა და აფხაზეთის გამო რუსეთსა და საქართველოს შორის ატეხილი ომის ერთ-ერთი მიზეზი იყო.
რუსეთის პრემიერ-მინისტრი ვლადიმერ პუტინი აცხადებს, რომ კოსოვოს დამოუკიდბლობის აღაირებით, დასავლეთმა სამხრეთ ოსეთისა და აფხაზეთის აღიარების საწინააღმდეგოდ არგუმენტი აღარ დაიტოვა.
"ჩვენ ყველამ ვიცით, გარშემო უამრავი კოსოვოა, რომლებიც უბრალოდ ელოდებიან დროს, როდესაც თავის გამოყოფას დააკანონებენ" - განაცხადა ტადიჩმა - "ბევრი არსებული კონფლიქტი (მათ შორის გაყინულიც) გამწვავდება".
No comments:
Post a Comment