24 სექტემბერი 2008
მან ასევე ხაზი გაუსვა იმას, რომ ირანის ბირთვული პროგრამა საერთაშორისო უსაფრთხოებას ემუქრება.
ნიუ-იორკი - ამერიკის პრეზიდენტის სტატუსში ჯორჯ ბუშის ბოლო გამოსვლა გარეოს გენერალურ ასამბლეაზე ყველასთვის ნაცნობ თემას, საერთაშორისო ტერორიზმის წინააღმდეგ ბრძოლას მიეძღვნა.
ექსტრემიზმის საფრთხეს პრეზიდენტმა ბუშმა სამშაბათს "ჩვენი დროის უძირითადესი გამოწვევა" უწოდა და შეახსენა მსოფლიოს ლიდერებს, რომ: "ყველა ერს ამ დარბაზში თავისი წილი პასუხისმგებლობა ეკისრება" ტერორიზმთან ბრძოლაში.
ბუში ჩვეულ ტონში ლაპარაკობდა, მაგრამ, როგორც ჩანს, აცნობიერებდა, რომ მაინცდამაინც კეთილგანწყობილ გარემოში არ გამოდიოდა. როდესაც ამერიკის პრეზიდენტი, რომელსაც ყველაზე კარგად ახსოვს, რომ ერაყზე ლაშქრობისას გაეროს მისთვის გზა არ დაულოცია, წარმოსთქვამდა: "ერაყის ტრანსფორმაცია", დარბაზი დუმილს ინარჩუნებდა. "ერაყი და ავღანეთი" - ამბობდა ბუში, სადაც "რეჟიმები, რომლებიც ტერორიზმს უჭერდნენ მხარს, შეიცვალა დემოკრატიებით, რომლებიც ებრძვიან ტერორს".
პირქუში განწყობა ფინანსური კრიზისის გამო, რომელიც ბუშს ვაშინგტონში არ ასვენებდა ნიუ-იორკშიც, 192 სახელმწიფოს ასამბლეაზეც თვალს თვალში უყრიდა. ბუშმა ეს იცოდა: "მე ვიცი, თქვენ თვალს ადევნებთ იმას, თუ როგორ დავძლევთ ჩვენ ფინანსური სისტემის წინაშე წამოჭრილ გამოწვევებს" და დაამატა: "გარწმუნებთ, რომ ადმინისტრაცია და კონგრესი მუშაობს", იმისთვის რომ კრიზისი ჩვეულ რეჟიმში გადაწყდეს.
ტერორიზმთან ბრძოლაში მიღწეული შედეგების ჩამოთვლისას, ბუში შეეხო ლიბანს, რომელმაც მასობრივი განადგურების იარაღზე უარი თქვა. მან ჩრდილო კორეა და ირანი მსოფლიო უსაფრთხოების გამოწვევებად დაასახელა და გაეროს წევრებს მოუწოდა ამ ორი ქვეყნისთვის სანქციების დაწესებისთვის გაორმაგებული ძალით ებრძოლათ.
პრესასთან შეხვედრის შემდეგ, სამშაბათს, გენერალურ ასამბლეას ირანის პრეზიდენტისთვის, მაჰმუდ აჰმედინიჯადისთვის უნდა მოესმინა. სიტყვით გამოსვლამდე მან ფინანსური კრიზისი თავისი ანტიამერიკული ლიტანიის ნაწილად აქცია და ჟურნალისტებს უთხრა, რომ ერაყის ომში დახარჯულმა დეფიციტმა კრიზისის წინაპირობა შექმნა. მერე კი და დაამატა, რომ მსოფლიო ვეღარ აიტანს აშშ-ს ბიუჯეტის მავნე პრაქტიკებს.
ბუშმა, თავის მხრივ, კიდევ ერთხელ გაუსვა ხაზი ირანის ბირთვული პროგრამის მავნებლობას.
გენერალურ ასამბლეაზე ბუშის გამოსვლამდე ერთი დღით ადრე, ატომური ენერგიის სააგენტოს ხელმძღვანელმა, განაცხადა, რომ ირანმა ვერ წარმოადგინა დამამტკიცებელი არგუმენტები იმისა, რომ მისი ბირთვული პროგრამა მშვიდობიანი ხასიათისაა. მუჰამედ ელ-ბარადეიმ, ჟენევაში აღნიშნა, რომ ეს სერიოზულ შეშფოთებას იწვევს და ირანის ბირთვული პროგრამის არასამშვიდობო მიზნების შესახებ სპეკულაციებს კვებავს.
უშიშროების საბჭოს ხუთმა მუდმივმა წევრმა და გერმანიამ, რომლებიც აწარმოებდნენ მოლაპარაკებებს ირანის ურანის გამდიდრების პროგრამებზე, ამ კვირას შეხვედრები დაგეგმეს. მაგრამ ირანისთვის სანქციების დაწესება, ალბათ, ვერ მოხერხდება, აღიარებენ აშშ-ს ოფიციალური პირები. რუსეთი და ჩინეთი, რომლებიც ისედაც ძლივს ეთანხმებოდნენ უშიშროების საბჭოს მესამე რეზოლუციის მიღებას, ახლაც დიდი ენთუზიაზმით არ გამოირჩევიან.
ბუშმა გაეროს 21-ე საუკუნის გადამწყვეტი ძალა უწოდა - სწორედ მას შეუძლია თვალი გაუსწოროს 21-ე საუკუნის ისეთ გამოწვევებს, როგორიცაა ექსტრემიზმი, სიღარიბე, ავტორიტარული მართვა და ადამიანის უფლებათა დარღვევა. მაგრამ მისი დაპირებები ძალიან ხშირად შეზღუდულია - თქვა მან - რადგან წევრი ქვეყნები ვერ იბრძვიან საერთო ინტერესებისათვის.
No comments:
Post a Comment