მიხეილ სააკაშვილი
23 სექტემბერი 2008
თბილისი, საქართველო- როდესაც ათეულობით ათასმა რუსმა ჯარისკაცმა და ჯავშნატრანსპორტიორმა გასულ თვეში ჩვენს ქვეყანას გამანდგურებელი დარტყმა მიაყენა, საერთაშორისო საზოგადოება ჩვენს დასაცავად გაერთიანდა. საქართველო, რომ რუსეთის საზღვრებთან განლაგებული რომელიმე ავტორიტარული ქვეყანა ყოფილიყო, მსოფლიოს ამდენი ლიდერი თბილისში, ქართველი ხალხის მხარდასაჭერად არ ჩამოვიდოდა.
სოლიდარობის ასეთმა გამოვლინებამ კიდევ უფრო დაგვარწმუნა იმაში, რომ საქართველოს გადარჩენა მხოლოდ დემოკრატიულ, ღია საზოგადოებას შეუძლია, ისეთ საზოგადოებას, რომელიც თავისუფალი ერების რიგებში მყარად ჩადგება.
საქართველო კორუმპირებული, ჩამორჩენილი ქვეყანა იყო და მხოლოდ რამდენიმე წელიწადში ლიბერალურ, იმედის მომცემ სახელმწიფოდ იქცა. ჩვენი დემოკრატია დღესაც პროგრესირებს. მაგრამ ის მხოლოდ შუქურაა, მსოფლიოს ურთულეს რეგიონში. და სწორედ იმის გამო, რომ საქართველო ენერგეტიკული გზაჯვარედინის გულშია განლაგებული, საციცოხლოდ მნიშვნელოვანია, რომ მას ღია, ტრანსპარენტული ხელისუფლება ყავდეს.
საქართველო დარწმუნებულია, რომ თავისუფალი სამყარო სათანადოდ უპასუხებს მოსკოვს, რომელიც ცდილობდა ძალის გამოყენებით დაემარცხებინა ჩვენი დემოკრატია, ხელახლა განეცხადებინა იმპერიული პრეტენზიები და გაეკონტროლებინა ევროპის ენერგეტიკული რესურსები.
ჩვენი ორი რეგიონის, სამხრეთ ოსეთისა და აფხაზეთის დამოუკიდებლობის აღიარებით, მოსკოვმა წაშალა საყოველთაოდ აღიარებული საზღვრები და არად ჩააგდო სუვერენულობის ცნება, რომელიც საერთაშორისო სამართლის საფუძველია. რუსეთმა შენიღბა ეთნიკური წმენდები, რომელიც თვითონ და მისმა თანამზრახველებმა ჩაატარეს.
დასავლეთმა გამოწვევა მიიღო-ის უნდა წინა აღუდგეს რუსეთის ქმედებებს, მაგრამ ისე რომ ბრუტალური ტაქტიკის გამოყენების საშუალება არ მისცეს. ჩვენ გვიცავს ჩვენი იდეალები და ფასეულობები, რომლებიც ერთა თანამეგობრობის გზამკვლევია.
. ჩემს მთავრობას კარგად ესმის, რომ ჩვენს ქმედებებზე არა მარტო ჩვენი ქვეყნის ბედია დამოკიდებული, არამედ ჩვენი მოკავშირეებისაც. ჩვენ ვაცნობიერებთ, რომ რუსეთი, რომელიც დაჟინებით იყენებს ძალას იზოლაციაში მოექცა და ეკონომიკურადაც დაზარალდა.
ჩვენი რწმენა ტრანპარენტულობისა მხოლოდ რიტორიკა არ არის. მიუხედავად იმისა, რომ რუსების აგრესიის შემდეგ დაგვრჩა ნანგრევები, ასობით დაღუპული, 200 000-მდე იძულებით გადაადგილებული მოქალქე (გაეროს ცნობის თანახმად) და დაზარალებული ეკონომიკა, ჩემი მთავრობა თავის რწმენას საქმედ აქცევს.
ტრანსპარენტულობა ისაა, რომ გავაცნობიეროთ, როგორ დაიწყო ომი. წლების მანძილზე რუსეთი ცილს სწამებდა საქართველოსა და ჩემს ხელისუფლებას, ბლოკავდა სეპარატისტებთან მოლაპარაკებების ყველა მცდელობას. ეს იმ კამპანიის ნაწილი იყო, რომელსაც საერთაშორისო საზოგადოების მხარდაჭერა ჩვენდამი უნდა შეესუსტებინა და შემოჭრისთვის საფუძველი მოემზადებინა. როგორც უკვე იყო ნათქვამი, რუსეთმა ორივე კონფლიქტურ ზონაში ამ გაზაფხულს განაახლა სამხედრო მშენებლობა ხოლო ზაფხულში სეპარატისტების მილიციამ შეიარაღებული თავდასხმები დაიწყო. შვიდი აგვისტოს გამთენიისას, რუსეთის შეიარაღებული ძალები საქართველოში შემოიჭრნენ, ხოლო მეორე დღეს მძიმე დაბომბვები დაიწყეს, რომელსაც შეეწირნენ მშვიდობიანი მოქალაქეები და ქართველი მშვიდობისმყოფელნი. ზუსტად ამ დროს, რუსეთმა განაცხადა, რომ ქართველებმა სამხრეთ ოსეთში 2100 მშვიდობიანი მოქალაქე მოკლეს, რამაც აიძულა მოსკოვი განეხორცილებინა ”ჰუმანიტარული სამხედრო ოპერაცია”. ეს ცნობა უარყო Human Rights Watch-მა (სულ 44 ადამიანი იყო მოკლული) და სხვა ორგანიზაციებმა, ვინც ცდილობს რუსეთის ჭეშმარიტი მოტივაციები ახსნას.
17 აგვისტოს, გერმანიის კანცლერის, ანგელა მერკელის გვერდით მდგომმა, მე მოვითხოვე საერთაშორისო გამოძიება ომის რეალიების გამოსაკვლევად. ჩემი ხელისუფლება მზადაა, მიაწოდოს თითოეული სამხილი, მოწმის თითოეული ჩვენება გამომძიებლებს. გააკეთებს იგივეს რუსეთი?
ტრანსპარენტულობა საკუთარ სახლშიც მთავარ პირობად უნდა ვაქციოთ. გასულ კვირას მე გამოვაცხადე იმ ზომათა შესახებ, რომლებიც გააძლიერებენ ქართულ დემოკრატიას, მივანიჭე ოპოზიციურ პარტიებს ცენტრალური როლი ჩვენს აღმშენებლობით და თავდაცვით გეგმებში. ჩვენ ვმუშაობთ იმისთვის, რომ განვავითაროთ პლურალიზმი მედიასა და სამოქალაქო საზოგადოებაში, ოპოზიციას მივეცი საშუალება მეტი გავლენა მოახდინოს საზოგადოებრივ მაუწყებელზე. ერთ-ერთი ინიციატივის მიზანი კი სასამართლო სისტემისთვის მეტი დამოუკიდებლობის მინიჭებაა.
ჩვენს პარტნიორებთანაც ტრანპარენტულობის ერთგულნი ვართ. ჩემმა მთავრობამ შექმნა მექანიზმი, რომელიც უზრუნველყოფს ჰუმანიტარული დახმარების გამოყენების კონტროლს. ეს დახმარება ჩვენ პირველ რიგში შეერთებულმა შტატებმა, ევროპამ, იაპონიამ, კანადამ, ავსტრალიამ და სხვებმა გადმოგვცეს.
მაგრამ რუსეთს დასავლეთმაც უნდა უპასუხოს. ჩვენ ვერ დავეთანხმებით სამხრეთ ოსეთისა და აფხაზეთის ანექსიას. არ შეიძლება, რომ მოსკოვი მუდმივად არღვევდეს ცეცხლის შეწყვეტის შეთანხმების პირობებს, რომლებსაც ბევრჯერ დაეთანხმა.
ჩემი მთავრობა მიესალმა ევროკავშირის გადაწყვეტილებას დააჩქაროს საქართველოს ინტეგრაცია ევროპულ ინსტიტუტებში. გასულ კვირას ჩვენ აღგვაფრთოვანა ნატოს დელეგაციის პირველმა ოფიციალურმა ვიზიტმა საქართველოში და იმედი მოგვცა, რომ ალიანსი გაითვალისწინებს ჩვენს განაცხადს ორგანიზაციაში ინტეგრაციაზე.
ჩვენ, ქართველები განვაგრძობთ ჩვენი დემოკრატიული მომავლის მშენებლობას. ჩვენ ფოკუსირებული ვართ იმაზე, რომ გავაძლიეროთ დემოკრატიულ ერთა ერთობა. ჩვენ არ უნდა დავუშვათ, რომ რუსეთმა ან ვიმემ სხვამ, განაცხადოს პრეტენზია გავლენის სფეროებზე და ხელი შეუშალოს თავისუფალ ადამიანებს, შეურთდნენ თანამოაზრე სახელმწიფოთა რიგებს.
No comments:
Post a Comment