საქართველო აშშ-ს პოლიტიკურ სივრცეში თავის ფსონებს აორმაგებს

რობერტ უინდერმი, NBC-ის პროდიუსერი
23 სექტემბერი 2008

რუსეთის 8000 კაციანი სამხედრო კონტინგენტი დღემდე საქართველოს ტერიტორიაზეა. დახმარების მისაღებად საქართველოს ხელისუფლება ყველაფერს აკეთებს, მათ შორის აშშ-ს ორივე პოლიტიკური პარტიის ლობისტებს ქირაობს.

იუსტიციის დეპარტამენტის უცხოური რეგისტრაციების სამსახურში არსებული დოკუმენტები ადასტურებს, რომ კონტრაქტები მომგებიანი უნდა იყოს. ქართველებმა 2004 წლიდან დღემდე ორ ლობისტურ ფირმას მილიონ დოლარზე მეტი გადაუხადეს. ორივე ფირმის ხელმძღვანელი საპრეზიდენტო კამპანიების ცნობილი მრჩევლები არიან.

ერთ-ერთი კონტრაქტის ამბავი უკვე ყველასთვის ცნობილია. 2004 წლიდან დღემდე საქართველომ Orion Strategies ლობირებისთვის $800,000 გადუხადა. Orion-ი მაკკეინის საგარეო პოლიტიკის საკითხებში მრჩევლის, რენდი შუნემანის მიერაა დაფუძნებული. საარჩევნო კამპანიის დაწყების შემდეგ შუნემანი Orion-იდან წამოვიდა და უკვე ამ წლის დასაწყისში საქართველოსთან თანამშრომლობა შეაჩერა.

მაგრამ 17 აპრილს, შუნემანისა და ქართველების კონტრაქტის შეჩერებიდან თვენახევრის შემდეგ, მისმა პარტნიორმა საქართველოსთან ახალ შეთანხმებას მოაწერა ხელი. კონტრაქტი $200,000-ზე დაიდო და მისი პირობების თანახმად Orion-ი ყოველთვიურად $25,000 იღებს.

კონტრაქტში ღიადაა მითითებული, რა სახის მომსახურებას უწევს ფირმა საქართველოს: "კონსულტაცია და რეკომენდაციები დასავლურ ინსტიტუტებში საქართველოს სრული ინტეგრაციისათვის, მათ შორის ნატოში გაწევრიანების თაობაზე".

მაკკეინმა რუსეთი გააფრთხილა, რომ საქართველოში მისი ქმედებებისთვის დიდი საზღაურის გადახდა მოუწევს, მგალითად: "ვეღარ ისარგებლებს ცივილიზებულ სამყაროში არსებობის უპირატესობებით" და შემდეგ რეგიონში საერთაშორისო სამშვიდობო ძალების შეყვანაც მოითხოვა. მაკკეინის მხრიდან საქართველოსადმი გამოხატულმა მტკიცე მხარდაჭერამ შუნემანთან დაკავშირებით კითხვები გააჩინა - ხომ არ აქვს ადგილი ინტერესთა კონფლიქტს.

ამ კითხვების მიუხედავად, ერთი რამ ცხადია, საქართველოს პრეზიდენტს მაკკეინთან ურთიერთობაში ლობისტების დახმარება არ სჭირდება. როგორც ამას წინათ "ნიუსვიკი" იუწყებოდა, მაკკეინი სააკაშვილით დიდი ხნის წინ მოიხიბლა.

მათი ურთიერთობა 90-იანების შუა წლებში დაიწყო და მას შემდეგ სულ უფრო მტკიცდებოდა და იფურჩქნებოდა. ისინი 1995-ში შეხვდნენ ერთმანეთს, როდესაც სააკაშვილი 28 წლისა იყო, კოლუმბიის უნივერსიტეტში ბაკალავრისა და ჯორჯ ვაშინგტონის უნივერსიტეტში ადვოკატის ხარისხები მიიღო და შინ დაბრუნებისთვის ემზადებოდა.

"სენატორ მაკკეინს პირველად წლების წინ შევხვდი - უთხრა საქართველოს პრეზიდენტმა სამშაბათს ბრაიან ვილიამსს, NBC-იდან - "90-აინებში მე ახალგაზრდა პარლამენტარი ვიყავი. ის უკვე - ძალიან გავლენიანი სენატორი. ძალიან დაინტერესდა ჩვენი სასამართლო, საკანონმდებლო რეფორმით. ამ საკითხებთან დაკავშირებით მასთან რეგულარული კონტაქტები გვქონდა".

მაგრამ სააკაშვილს ყველა სჭირდება, მათ შორის დემოკრატებიც.

The Glover Park Group ქართველთა ახალი ლობისტია. ჯგუფთან, რომელიც კლინტონებთან მჭიდროდაა დაკავშირებული, კონტრაქტი 22 აგვისტოს დაიდო. რუსების შემოჭრიდან სულ ორი კვირა იყო გასული, რუსული ჯარი საქართველოს დედაქალაქთან, თბილისთან იდგა. ქართველები Glover Park-ს "საკომუნიკაციო და მედია სტრატეგიის" შემუშავებისთვის თვეში $100,000 უხდიან. კონტრაქტს ვადა ოქტომბერში გასდის, მაგრამ მისი განახლება შესაძლებელია.

Glover Park-ის ერთ-ერთი პარტნიორი ჰოვარდ ვოლფსონი, სენატორ ჰილარი კლინტონთან მუშაობდა. Glover Park-ის ხელმძღვანელთა შორის არიან ჯო ლოკჰარტი, თეთრი სახლის პრესმდივანი პრეზიდენტ კლინტონის დროს, კარტერ ისკიუ, გორის მთავარი სტრატეგი 2000 წელს.

ორიგინალი