არსებობს მოსაზრება, რომ საბჭოთა კავშირი ქსეროქსის გამოგონებამ დაანგრია: ინფორმაციის ტირაჟირება გაადვილდა, მისი ცირკულირება რეპრესიულმა ინსტიტუტებმა ვეღარ გააკონტროლეს, სიტყვა გათავისუფლდა, რასაც შედეგად ზოგადად თავისუფლების გამარჯვება მოჰყვა.
მანამდე, უფრო დიდი ხნით ადრე, ასეთივე პარადიგმული ცვლილება გუტენბერგის მიერ გამოგონილმა ბეჭდურმა სიტყვამ გამოიწვია. მოკლედ, ყველასთვის ცხადია, რომ ხელმისაწვდომი, მრავალფეროვანი, პლურალისტული ინფორმაცია თავისუფალი საზოგადოების ერთ-ერთი საფუძველთაგანია. მოცემული ბლოგის ავტორებს ეს კარგად ესმით.
დღეს ყველას რთულ, დაძაბულ ვითარებაში გვიწევს ცხოვრება. იმისთვის, რომ ინფორმაციის დეფიციტმა დამატებითი შფოთის საბაბი არ მოგვცეს, გადავწყვიტეთ ინტერნეტში საქართველოსთან დაკავშირებული ინფორმაცია მოგვეძია და ყველაზე სიმპტომატური, ყველაზე ნიშნეული, ძირითადი ტენდენციების ამსახველი მასალა ქართულად გვეთარგმნა. მას, ვისაც ასეთი ძიების დრო არ აქვს, ვფიქრობთ, მცირედით მაინც დავეხმარებით.
ვცდილობთ, სტატიების შერჩევისას ყველა პოზიცია ავსახოთ - ისეთი, რომელსაც ვეთანხმებით და ისეთიც, რომლის კითხვისას აღშფოთებას ვერ ვმალავთ. მაგრამ ჩვენ მტკიცედ გვჯერა, რომ თუ მიმდინარე მოვლენების (თუნდაც უცხოეთიდან დანახულის) გაანალიზებას ახლავე არ დავიწყებთ, კიდევ ბევრჯერ მოგვიწევს ერთსა და იმავე წყალში შესვლა - ჰერაკლიტეს ცნობილი თეზის საპირისპიროდ.
ჯერჯერობით სულ ორნი ვართ, რის გამოც მოვლენათა თავბრუდამხვევ კასკადს ხშირად ჩამოვრჩებით, ამიტომ ჩვენთვის პრიორიტეტულად ანალიტიკური პრესა დავასახელეთ, რადგან მისი მოცულობა შედარებით მცირეა. მთარგმნელობითი საქმიანობის დიდი გამოცდილება არ გვაქვს, თან ხშირად ვჩქარობთ, ამიტომ ლაფსუსებისთვის წინასწარ გიხდით ბოდიშს. მთავარი მაინც ისაა, რომ ავტორის ტექსტს პატიოსნად მივყვებით და მთელი გულით ვცდილობთ კონტექსტი არ შევცვალოთ.
გარკვეული ტექნიკური პრობლემების გამო, ტექსტის ვრცელ ვარიანტში მხოლოდ იმ თარიღს მიაქციეთ ყურადღება, რომელიც სათაურის ქვეშაა მითითებული. აქვე შეგიძლიათ მოძებნოთ ორიგინალური პუბლიკაციის ბმული.
იმიჯები ბლოგზე, YouTube-იდან იტვირთება და შესაბამისად იცვლება ისე, როგორც ორიგინალურ საიტზე.
ქართულ ინტერნეტ სივრცეში ასეთი ტიპის გამოცემა პირველია, ყოველ შემთხვევაში, უფასო და ყველასთვის ხელმისაწვდომი. უახლოეს მომავალში ჩვენი ბლოგი დიდ ვებ-პორტალად გარდაიქმნება. ცნობისთვის: საავტორო უფლებები დაცულია.
მოკლედ ინტერნეტ საზოგადოებას, ჩვენს ბლოგზე ვიწვევთ. ველოდებით თქვენს გამოხმაურებებსა და შენიშვნებს.
პატივისცემით,
ბლოგ-ტანდემი
სურვილის შემთხვევაში დაგვიკავშირდით Email: foreignpressgeo@gmail.com
1 comment:
rogor unda dagikavshirdet adamiani? :))))
Post a Comment