ფაბრის ნოდე-ლანგლუა
23 მარტი 2009
ინგუშეთის გენერალურმა პროკურატურამ მაგომედ ევლოევის, ჟურნალისტისა და ყოფილი პრეზიდენტის პრინციპული მოწინააღმდეგის მკვლელობის გარემოებათა ხელახალი გამოძიების დაწყებაზე ბრძანება გასცა. ეს ქმედება სიახლეა, ცვლილებების დაწყების სიმბოლო, რომელიც ჩეჩნეთის მეზობელ ამ პატარა კავკასიურ რესპუბლიკაში ბოლო რამდენიმე კვირაა შეიმჩნევა.
უკანასკნელ წლებში ინგუშეთი დაღესტანთან ერთად კავკასიის ყველაზე მშფოთვარე რეგიონი გახდა - სისხლიანი თავდასხმების, მკვლელობებისა და ანგარისწორების ადგილი.
მოკლედ შეგახსენებთ მაგომედ ევლოევის სიკვდილთან დაკავშირებულ ფაქტებს: ადგილობრივი ხელისუფლებისადმი კრიტიკულად განწყობილი ინტერნეტ საიტის (რომელიც Ingushetia.org-ის ფარული სახელით მოქმედებდა) დამაარსებელი, პრეზიდენტ მურატ ზიაზიკოვის ოპონენტი მაგომედ ევლოევი 2008 წლის 31 აგვისტოს დააპატიმრეს და თავში ტყვიის გასროლით მოკლეს. ოფიციალური ვერსია: უბედური შეთხვევა წინააღმდეგობის გაწევის ან გაქცევის მცდელობის დროს. არც ერთ მის ახლობელს, ადამიანის უფლებების არცერთ დამცველს, ამ ვერსიის არ სჯერა.
რადგან პროკურატურამ ხელახალი გამოძიების დაწყებაზე ბრძანების გაცემით ფაქტობრივად აღიარა, რომ არსებული ვერსია შეთხზული იყო. ინგუშეთში ჟურნალისტ ევლოევის დაღუპვის შემდეგ, ვითარება შეიცვალა. დიმიტრი მედვედევმა ოქტომბერში ახალი პრეზიდენტი დანიშნა, რომელმაც ზიაზიკოვი შეცვალა. ეს უკანასკნელი ადგილობრივ სამოქალაქო საზოგადოებაში ცნობილი იყო, როგორც კორუფციის საყრდენი და ტერორიზმის წამხალისებელი, ადამიანი რომელიც თვალს ხუჭავდა უამრავ უკანონო დაპატიმრებებზე, ძალოვანთა მიერ ჩადენილ მკვლელობებზე, ადამიანთა გატაცებებსა და ანგარიშსწორებებზე.
ინგუშეთის ახალი პრეზიდენტი ლუნუს-ბეკ ევკუროვი ძველი პარაშუტისტია, ოფიცერი, რომელმაც 1999 წელს კოსოვოს აეროპორტი პრიშტინა ნატოს წარმომადგენლებს თვალსა და ხელს შუა ააცალა. ის ამბობს, რომ კორუფციას უნდა შეუტიოს: “უბედურების სათავე სწორედ ადგილობრივი ხელისუფლების წარმომადგენელთა უპატიოსნობაა,” განუცხადა მან კვირას უცხოეთის მედიის წარმომადგენლებს, მათ შორის როიტერის სააგენტოს. “დაუსაქმებლად დარჩენილი მოსახლეობის ნახევარზე მეტი, რომელსაც პატიოსანი შრომით სარჩო- საბადებლის მოპოვება არ შეუძლია, ფარული ცხოვრებით ცხოვრობს და კანონსაწინააღმდეგო მოქმედებას იწყებს,” გვიხსნის პრეზიდენტი.
ჩანს ახალი, მტკიცე ადამიანი ინგუშეთში მართო სიტყვებით არ კმაყოფილდება. მისი მოსვლის დღიდან კორუმპირებული ჩინოვნიკების წივააღმდეგ ოცამდე სადამსჯელო ღონისძიება განხორციელდა. თავისი ჩეჩენი კოლეგის რამზან კადიროვის მსგავსად, ევკუროვი იმ აჯანჭებული მებრძოლების შეწყალების ინიციატივით გამოდის, რომლებსაც მძიმე დანაშაულები არ ჩაუდენიათ.
13 მარტს ინგუშეთში კიდევ ერთი პოლიციელი მოკლეს. ძალადობა გრძელდება. განვითარებისა და განახლების მცდელობა დიდია. ასე რომ, პრეზიდენტ მედვედევის მიერ კორუფციის წინააღმდეგ გამოცხადებული ბრძოლისა და ქვეყანაში არაკეთილსინდისიერ ჩინოვნიკებთან მიმართებაში წესრიგის დამყარების საქმეში ინგუშეთი პირველი ექსპერიმენტია.
No comments:
Post a Comment