მედვედევი ევიანში – შერიგების მისია

ფაბრის ნოდე-ლანგლუა
8 ოქტომბერი 2008

რუსეთის პრეზიდენტი ნიკოლა სარკოზის ხვდება. საერთაშორისო კონფერენციაზე, რომელიც საფრანგეთის საერთაშორისო ინსტიტუტის ორგანიზებით ტარდება, იგი საკუთარი პროექტის "შეთანხმება ევროპული უსაფრთხოების საკითხებზე" დაცვას შეეცდება.

დღეს, ჟენევის ტბის სანაპიროზე, საქართველოში ომის დაწყების შემდეგ ნიკოლა სარკოზი მესამედ შეხვდება თავის რუს კოლეგას დიმიტრი მედვედევს. მსოფლიო პოლიტიკის საკითხებისადმი მიძღვნილი კონფერენციის პირველ შეხვედრაზე, კრემლის ხელმძღვანელი "აქტუალური საერთაშორისო პრობლემების მოგვარების" საკუთარ გეგმას წარმოადგენს. იგი ევროკავშირის მოქმედ თავმჯდომარესთან ქართულ საკითხსაც განიხილავს.

ვლადიმერ პუტინის მემკვიდრე, რომელმაც სულ რაღაც ორი თვეა რაც მთავარსარდლის სამოსი მოირგო და სულ უფრო ხშირად აკრიტიკებს დასავლეთს, ევიანში შერიგების სურვილით ჩადის. "ყველა ჩვენთაგანს სჭირდება უსაფრთხოების მყარი გარანტიები და ურთიერთნდობა" - განაცხადა მან, საფრანგეთში გამგზავრებამდე. ამისთვის მედვედევმა ახალ ფორმას მიმართა: ეს განცხადება კრემლის ვებ-გვერდზე მის ვიდეობლოგში განთავსდა და ინგლისური სუბტიტრებით იყო აღჭურვილი. ვიდეორგოლი, რომლის ხანგრძლივობა 2 წუთი და 22 წამია ასე იწყება: ახალგაზრდა (43 წლის) "კიბერპრეზიდენტი", საკუთარი მაგიდის მონიტორებზე რაღაცას ყურადღებით აკვირდება, შემდეგ სავარძლით მოტრიალდება და კამერას შეჰყურებს.

ევროკავშირის თავშეკავებული დამოკიდებულება

"უსაფრთხოების სისტემა, რომელიც აქამდე არსებობდა, არაეფექტური გამოდგა. არსებული შეთანხმებები ვეღარ პასუხობენ მსოფლიოში შექმნილ რეალურ სიტუაციას. ამის ნათელი მაგალითებია – ერაყი, კოსოვო, კავკასიია, ავღანეთი და სხვა კონფლიქტურ რეგიონებში განვითარებული მოვლენები", - ამბობს რუსეთის პრეზიდენტი. ის აცხადებს, რომ ოთხშაბათს კვლავ ისაუბრებს "ახალ ევროპულ შეთანხმებაზე", რომელიც მან ივნისში, პრეზიდენტის რანგში ევროპაში მისი პირველი ვიზიტის დროს, ბერლინში წარადგინა. ჯერჯერობით არანაირი ოფიციალური წინადადება "უსაფრთხოების ახალ შეთანხმებაზე" შემოთავაზებული არ ყოფილა. მაგრამ ერთ-ერთი ინფორმირებული ევროპელი დიპლომატის თქმით, მოსკოვი, ქვეყნის მეთაურთათვის ღია სამიტის ორგანიზებას გეგმავს - "ვანკუვერიდან - ვლადივოსტოკამდე".

დიპლომატებს მოლაპარაკებების წარმოების უფლებამოსილება მიენიჭებათ, რომ პროცესში მათ "იურიდიულად სავალდებულო შეთანხმებას" მიაღწიონ. აი რას ამბობს ამ საკითხზე დიპლომატი: "ეს ხელშეკრულება, რომელიც კოლექტიურ მმართველობას გულისხმობს, შეუძლებელს გახდის ისეთ ინიციატივებს, როგორებიცაა მაგალითად, ამერიკული რაკეტსაწინააღმდეგო ფარი, ან ნატოს გაფართოვება". მოსკოვი ცდილობს "ჩრდილოატლანტიკური ხელშეკრულების მე-5 მუხლის" ექვივალენტი შექმნას, რომლის მიხედვითაც ალიანსის ერთ წევრზე თავდასხმა მის ყველა წევრზე თავდასხმას ნიშნავს.

პარიზი და ევროკავშირი ამ ინიციატივას თავშეკავებულად შეხვდნენ. ევროკავშირის განცხადებით, საქართველოს ომის და რუსეთის "არაზომიერი რეაქციის" შემდეგ, ევროკავშირს ამ პაკტის მიმართ პოზიტიური დამოკიდებულება არ გასჩენია. მით უფრო, რომ მოსკოვი, რომელიც თითქოს კოლექტიური მმართველობის ინიციატივით გამოდის, პერიოდულად იმუქრება. `გონივრული მრავალმხრივი დიალოგის არარსებობის შემთხვევაში, ჩვენ თავად მოვახდენთ რეაგირებას”, - განაცხადა გასულ თვეს საგარეო საქმეთა მინისტრმა, სერგეი ლავროვმა.

ფინანსური კრიზისის მოთოკვა

მაგრამ დიმიტრი მედვედევი, თავისი წინადადების დაცვას მაინც აპირებს. ევიანში ის კიდევ ერთი ინიციატვით გამოვა - ევროკავშირს საერთო ფინანსური კრიზისის დაძლევის მიზნით თანამშრომლობას შესთავაზებს. მედვედევის მრჩევლის იგორ იურგენსის აზრით, რომლის ციტირებასაც Financial Times ახდენს, კრემლი დასავლელი ინვესტორების ნდობის აღდგენას შეეცდება. ივლისში ვლადიმერ პუტინის მიერ კომპანია "მეჩელის" დევნამ, საბანკო კრიზსმა და საქართველოს კონფლიქტმა უცხოელები ისე შეაშინა, რომ 18 სექტემბრის შემდეგ მოსკოვის ბირჟიდან მათ, ფინანსთა სამინსიტროს ცნობით 10-15 მილიარდი დოლარი, ხოლო Financial Times-ის ცნობით - 56 მილიარდი დოლარი გაიტანეს.

დიმიტრი მედვედევს ასევე სურს აჩვენოს სარკოზის, რომ 8 სექტემბრის ხელშეკრულების პირობებს იცავს და პარასკევისთვის რუსული ჯარები საქართველოს ტერიტორიიდან გაყავს (აფხაზეთი და სამხრეთ ოსეთი არ იგულისხმება). დღეს კიდევ ექვსი რუსული ბლოკპოსტი გაუქმდება. იმავდროულად, "ორმა ათეულმა ოსმა შეაიარაღებულმა პირმა" ევროპელი დამკვირვებლები მცირე დროით დააკავა. ქართული მხარე აცხადებს, რომ ისინი ოსები იყვნენ, ევროპული მისია ამბობს - "უცნობი პირები". რუსეთის პრეზიდენტის მრჩეველმა განაცხადა, რომ საქართველოს მხრიდან პროვოკაციების შემთხვევაში პასუხიმგებლობა ევროკავშირს ეკისრება.

ორიგინალი