სიმუს მაილნი
31 ოქტომბერი 2008
დასავლეთი საქართველოში კონფლიქტის გამო რუსეთის წინააღმდეგ ბრალდებებს ახვავებდა, ქართველთა აგრესიულ დანაშაულთა ახალ მტკიცებულებებზე კი არანაირად რეაგირებს.
კავკასიის მოკლე, მაგრამ სისხლისმღვრელი ომის შემდეგ სულ ორი თვე გავიდა. დასავლელი პოლიტიკოსები და მასთან ერთად მედიაც კონფლიქტის გამო რუსეთს საშინლად ადანაშაულებდა, მაგრამ BBC-ის მიერ ჩატარებულმა სერიოზულმა გამოძიებამ განსხვავებული სურათი წარმოაჩინა. ტიმ ჰიუს რეპორტაჟში, რომელიც ამ კვირას ღამის ახალ ამბებში და რადიო 4-ის ეთერში გადაიცა, იმის საფუძვლიანი სამხილები მოვისმინეთ, რომ საქართველო, რომელსაც დასავლეთი ასე უჭერდა მხარს, 7 აგვისტოს აგრესორივით მოქმედებდა. აქვე იყო წარმოდგენილი თვითმხილველთა ჩვენებებიც, რომელთა თანახმად ქართულმა არმიამ, სადავო ტერიტორიაზე, სამხრეთ ოსეთზე შეტევისას ფართომასშტაბიანი სამხედრო დანაშაულებანი ჩაიდინა.
ეს ეპიზოდები შემდეგ მომენტებს შეიცავს: საცხოვრებელი შენობების სარდაფებს, სადაც მშვიდობიანი მოსახლეობა თავს აფარებდა, სატანკო და გრადის ჭურვებს ესროდნენ, საცხოვრებელ უბნებში განურჩეველი სროლა მიმდინარეობდა, ხოლო მშვიდობიან მოსახლეობას, მათ შორის მათაც, ვინც სამხრეთ ოსეთის დედაქალაქის, ცხინვალის დატოვებას ცდილობდა, გამიზნულად კლავდნენ. ზედმიწევნით დაბალანსებულ რეპორტაჟი, რომელშიც სამხრეთ ოსეთის არაფორმალური შეიაღარებული შენაერთების მიერ ჩატარებულ ეთნიკურ წმენდებზეც დეტალური სამხილებია წარმოდგენილი, ქართველთა იმ განცხადებებს, რომელთა მიხედვით მათ სამხრეთ ოსეთზე შეტევა რუსული არმიის შემოჭრის საპასუხოდ დაიწყეს, საფუძველს აცლის.
საქართველოს ხელისუფლება აცხადებს, რომ მან შეტევა ცხინვალზე ”კონსტიტუციური წესრიგის” აღსადგენად და სამხრეთ ოსეთის არაფორმალური შეიარაღებული ჯგუფების პროვოკაციათა საპასუხოდ დაიწყო. მოგვიანებით, ქართულმა სპეცსამსახურებმა სატელეფონო საუბრების ჩანაწერებიც გამოქვენეს, რომელსაც რუსეთის შემოჭრის ვერსია უნდა დაედასტურებინა. მაგრამ საქართველოს მოკავშირეებმაც კი ეს ჩანაწერები, რომელთა მიზანი საქართველოს შერყეული საერთაშორისო პოზიციის გამყარება იყო, უყურადღებოდ დატოვეს.
კაცმა, რომელმაც სამხრეთ ოსეთზე შეტევის დაწყების ბრძანება გასცა, პრეზიდენტმა მიხეილ სააკაშვილმა, სამხედრო დანაშაულთან დაკავშირებული ბრალდებები უარყო. მაგრამ რა პოზიცია აქვთ მის ანგლო-ამერიკელ სპონსორებს, რომლებიც სულ იმას ამტკიცებენ, რომ რუსეთის აგრესია უპასუხოდ არ უნდა დარჩეს?
ბრიტანეთის საგარეო საქმეთა მდივანი, დევიდ მილიბენდი დღეს უკვე უშვებს, რომ ქართველები უპასუხისმგებლოდ მოიქცნენ და ამბობს, რომ სამხედრო დანაშაულებებთან დაკავშირებული ბრალდებებს ის ”უკიდურესად სერიოზულად” ეკიდება. აშშ-ს სახელმწიფო მდივნის მოადგილე დენიელ ფრიდი ამასობაში აღიარებს, რომ ქართველთა შეტევა ცხინვალზე ”არასწორი” იყო, თუმცა სამხედრო დანაშაულებებზე დისკუსიას, როგორც ”არც თუ ძალიან სასარგებლოს” თავს არიდებს.
ქართველების შეტევის შემდეგ რუსული ჯარი საქართველოს ტერიტორიაზე შევიდა, გაანადგურა საქართველოს შეიარაღებული ძალების აღჭურვილობა და პროცესში თავადაც გამოიწვია მშვიდობიანი მოსახლეობის მსხვერპლი, განსაკუთრებით გორში. ამ თვის დასაწყისში მათ საქართველოს ბუფერული ზონებიდან საკუთარი ჯარები ნომინალურად დამოუკიდებელ სამხრეთ ოსეთში დააბრუნეს.
აგვისტოს ომის დაწყებისას დასავლური მედია შედარებით მიუკერძოებელი იყო, მაგრამ სწრაფად გადაერთო ცივი ომის მოდელზე, როდესაც რუსეთი საქართველოს აშშ-ს კლიენტ რეჟიმსა და რეგიონში ნატოს ექსპანსიაზე ალაპარაკდა. თავდაპირველად სრულიად ცხადი მტკიცებულებები ომის დაწყებისა და ცხინვალში ქართული ჯარის მომაკვდინებელი აქტივობების შესახებ თბილისის საოცრად ეფექტური PR ოპერაციის წყალობით დავიწყებულ და უარყოფილ იქნა.
მაგალითისთვის, საგარეო საქმეთა ოფისის ყოფილი მრჩეველი დევიდ კლარკი ”ფაქტების სერიოზულ გაყალბებაში” მდებდა ბრალს, რადგან რუბრიკაში ”თავისუფალი კომენტარი” ცხინვალში ქართველების მიერ ასეულობით მოკლულ მშვიდობიან მოქალაქეზე ვწერდი. მე მაშინ რამდენიმე, მათ შორის, მეთვალყურეთა ანგარიშს ვეყრდნობოდი. კლარკი დაჟინებით ამტკიცებდა, რომ დამოუკიდებელი წყაროებით ბრალდებები არ დასტურდება. მაგრამ, როგორც კვირას BBC-ის რეპორტაჟში ითქვა, Human Rights Watch-ს მიაჩნია, რომ, საწყისი მონაცემებით, ცხინვალში 300-400 მშვიდობიანი მოქალაქეა მოკლული. ამასობაში, ჰიუს უმნიშვნელოვანეს მტკიცებულებებს იმის თაობაზე, თუ რა მოხდა კონფლიქტის მსვლელობისას Independent-ში გამოქვეყნებული პატარა სტატიის გარდა, არავინ გამოეხმაურა - მედიის მეინსთრიმმა ის უბრალოდ უგულვებელყო.
No comments:
Post a Comment