29 ოქტომბერი 2008
თეირანი – საგარეო საქმეთა მინისტრი მანუჰერ მოთაქი ორშაბათს კავკასიის ერებს არწმუნებდა საომარი კონკურენცია "მშვიდობიანი თანამშრომლობით" შეცვალონ.
ცენტრალური აზიისა და კავკასიის საკითხებზე გამართულ მე-16 საერთაშორისო კონფერენციაზე საუბრისას მოთაქმა განაცხადა "კავკასიის რეგიონში დღეს არსებული ატმოსფერო უსაფრთხოებაზე კონკურენციას ეფუძნება, ის მშვიდობიანი თანამშრომლობით უნდა შეიცვალოს".
კონფერენცია ირანის საგარეო საქმეთა სამინისტროს სტრატეგიული კვლევების დეპარტამენტის ორგანიზებით ჩატარდა და მთლიანად საქართველო-რუსეთის შვიდ დღიანი ომის შედეგებს მიეძღვნა. კონფერენციის შეფასებით ეს იყო ყველაზე მნიშვნელოვანი მოვლენა აშშ-ზე 11 სექტემბერს განხორციელებული თავდასხმის შემდეგ.
სამხედრო კონფლიქტი სიტყვიერ ომში გადაიზარდა რუსეთსა და დასავლეთს შორის, რომლებიც საბჭოთა კავშირის დაშლის შემდეგ რეგიონში საკუთარი გავლენის გაფართოებას ცდილობდნენ.
ომი მას შემდეგ გაჩაღდა, რაც საქართველომ 7 აგვისტოს აჯანყებულ რეგიონზე სახმელეთო და საჰაერო შეტევა მიიტანა. ქართული მხარე სეპარატისტული რეგიონების სამხრეთ ოსეთის და აფხაზეთის ქვეყნის შემადგენლობაში დაბრუნებას შეეცადა. ამ ნაბიჯს რუსეთმა სამხრეთ ოსეთში ჯარების გაგზავნით და ღრმად საქართველოს ტერიტორიაზე შეჭრით უპასუხა.
მოთაქმა თქვა, რომ კავკასიის კონფლიქტთან მიმართებაში მისმა ქვეყნამ "დაბალასებული" პოზიცია დაიკავა. მთავარმა დიპლომატმა დასძინა, რომ ირანის ნაციონალური უსაფრთხოება კავკასიის რეგიონის უსაფრთხოებასთანაა დაკავშირებული. "ჩვენ მიგვაჩნია, რომ ირანის ნაციონალურ უსაფრთხოებას რეგიონში მშვიდობა, სტაბილურობა და უსაფრთხოება აძლიერებს".
"ირანს, როგორც კავკასიის მოსაზღვრე ძლიერ სახელმწიფოს, ესმის მისი როლი კავკასიის რეგიონის სტაბილურობის საქმეში. შესაბამისად, ის არაფერზე უკან არ დაიხევს იმისთვის, რომ ეს უსაფრთხოება კიდევ უფრო გაძლიერდეს".
საქართველოს მიმართ დასავლეთის მხარდაჭერაზე მან ირიბად მიანიშნა და განაცხადა, რომ ექსტრა-რეგიონალური ძალების ჩარევა ამ საქმეში სიტუაციას კიდევ უფრო "გაართულებს".
არასტაბილურობითა და არასაიმედოობით ვერცერთი ქვეყანა ვერ მოიგებს, ამიტომ კავკასიის ქვეყნებმა "ბრძნულად და წინდახედულად" უნდა იმოქმედონ, რომ გარე ძალებს არ მისცენ საშუალება რეგიონი საკუთარი კონკურენციის ველად გადააქციონ.
მან რეგიონალურ სახელმწიფოებს თანამშრომლობისკენ მოუწოდა და თხოვნით მიმართა "კოლექტიური უსაფრთხოების" გეგმაზე იმუშაონ.
ირანის საგარეო საქმეთა მინისტრი ვიზიტით იმყოფებოდა თბილისში, ბაქოში, ერევანში, ბერლინსა და მოსკოვში, რათა დახმარებოდა მათ ომით გამოწვეული უსაფრთხოების პრობლემების გადაწყვეტის გეგმის შემუშავებაში.
"ჩვენი აზრით, ასეთი ვიზიტების და მოლაპარაკებების გაგრძელება სასარგებლო იქნება და საფუძველს შექმნის დიალოგისთვის, რომელიც კავკასიის რეგიონში უსაფრთხოების ზომების შემუშავებას ხელს შეუწყობს".
მოთაქმა თქვა, რომ ნებისმიერი კრიზისი, მსოფლიოს ნებისმიერ წერტილში სხვა რეგიონებსაც შეეხებათ. "მსოფლიო ერთ მთლიან გაერთიანებად გარდაიქმნა და ეს პროცესი იზრდება”.
ორიგინალი
No comments:
Post a Comment