კიმ მერფი
12 ოქტომბერი 2008
გამოძიების მასალების თანახმად, “პირველი ჯენტლმენი” ოფიციალურ წერილებს ეცნობოდა და შეუფერხებლად ესწრებოდა კაბინეტის დახურულ სხდომებს.
2006 წლის დეკემბერში სარა პეილინი ალასკის გუბერნატორის პოსტზე სულ ორი კვირის დანიშნული იყო, როდესაც უსაფრთხოების კომისრის, მონეგანის მდივანმა პეილინის ოფისიდან შემოსულ უცნაურ სატელეფონო ზარს უპასუხა: პირველ ჯენტლმენს მის ბოსთან შეხვედრა სურდა.
”ასეთი გამოთქმა, ”პირველი ჯენტლმენი” გაგონილი არ მქონდა და გადავწყვიტე, რომ მდივანს რაღაც ეშლებოდა, ამიტომ რამდენჯერმე გავუმეორე ”ვინ?”. კასანდრა ბაირნიმ, რომელმაც ახლახანს მისცა ჩვენება ბოლოს უპასუხა ”ტოდ პეილინი”.
შეხვედრა დაინიშნა და მონეგანი გუბერნატორის ოფისში მივიდა. დაკუნთული მეთევზე და ალასკაში ცნობილი სნოუმობილისტი უზარმაზარ საკონფერენციო მაგიდასთან მარტო იჯდა. მაგიდაზე დოკუმენტების მთელი გროვა იყო დახვავებული. ერთ-ერთს მონეგანის ოფისის ლოგო ერტყა.
საუბრის საგანი მალე გაირკვა, ის ალასკის პოლიციის ერთ-ერთ თანამშრომელს, მაიკ ვუტენს ეხებოდა. ვუტენი ალასკის გუბერნატორის დის ყოფილი ქმარი და განქორწინების ბინძური პროცესის ერთ-ერთი მთავარი პერსონაჟი იყო. ტოდმა ღიად განაცხდა, რომ ვუტენის სამსახურიდან დათხოვნა უნდა. მიზეზად მისი ის ქმედებები დაასახელა, რომელიც პოლიციის ოფიცრისთვის შეუფერებელი იყო.
”ის მუდმივად ხმარობდა სიტყვას ”ჩვენ” ”ჩვენ წავედით მოლაპარაკებებზე, ჩვენ, ჩვენ”. ჰოდა, დავასკვენი, რომ საკუთარ თავს და სარას გულისხმობდა” - ნათქვამია მონეგანის ჩვენებებში.
შეხვედრაზე ”თავს უხერხულად ვგრძნობდი” - ამბობს მონეგანი - ”გუბერნატორის ოფისში ვიყავით, ის კი გუბერნატორი არ იყო. ვიფიქრე, რომ სახელისუფლებო ატრიბუტებს პირადი მიზნების მოსაგვარებლად იყენებს”.
ტოდ პეილინის ხმა პეილინის ადმინისტრაციაში უკვე ყველას ეცნობოდა. დამოუკიდებელი გამომძიებელის, სტეფან ბრენჩფლაუერის ანგარიშში ნათქვამია, რომ მოგვიანებით მონეგანის თანამდებობიდან გაშვება ნაწილობრივ იმანაც განაპირობა, რომ ვუტენის სამსახურიდან დათხოვნას არ დაეთანხმა. ანგარიშში ისიცაა აღნიშნული, რომ ტოდ პეილინი ცოლის ადმინისტრაციას ყოველდღე სტუმრობდა.
ყველა ეს მასალა დამოუკიდებელი გამოძიების პროცესშია მოძიებული, მაგრამ The Times-მა საკუთარი კვლევა ჩაატარა და ალასკის მთავრობის ელექტრონული მიმოწერაც შეისწავლა, რამაც კიდევ ერთხელ დაადასტურა, რომ ტოდი მეუღლის ოფისის ერთგვარ მუდმივ ატრიბუტად იქცა და თავისუფალი დროის დიდ ნაწილს სწორედ აქ ატარებდა. ტოდ პეილინი ესწრებოდა ადმინისტრაციის დახურულ შეხვედრებს, ხოლო ადმინსტრაციის მაღალჩინოსნები მას თავისი საქმიანი წერილების ასლებს უგზავნიდნენ. მიმოწერა საკითხთა ფართო წრეს ეხებოდა: საკონტრაქტო მოლაპარაკებებს პოლიციის ოფიცერთა კავშირთან, ალასკის ლოკალურ პრობლემებს, პრივატიზაციას და ა.შ.
საარჩევნო კამპანია
ის, რომ გუბერნატორის მეუღლე მუდმივად ესწრებოდა კაბინეტის სესიებსა და შტატის ბიუჯეტის განხილვებს, პეილინის საარჩევნო კამპანიის მსჯელობის საგნად იქცა. გაჩნდა კითხვები, ხომ არ ირგებს ტოდ პეილინი ჰილარის კლინტონის როლს, რომელიც მისი მეუღლის პრეზიდენტობის პირველ წლებში მეუღლე-აქტივისტის ფუნქციით გვევლინებოდა.
”ის ისე იქცევა, თითქოს ლობისტი იყოს” - ამბობს ანდრი მაკლეოდი, აქტივისტი ენქორიჯიდან. მან მთავრობის იმ ელექტრონული წერილების სრული ტექსტები მოიპოვა, რომელიც პეილინის ქმარს ეგზავნებოდა.
”პეილინის მეუღლე მაღალი დონის ძალიან ბევრ შეხვედრაში მონაწილეობდა და ზოგადად პოლიტიკურ პროცესებშიც იყო ჩართული. ის ოჯახური ინტერესების გამო იქცეოდა ასე. ადგილობრივ კორპორაციებთან ურთიერთობაშიც მონაწილეობდა”.-ამბობს მაკლეოდი - ”საინტერესოა, ვისი სახელით მოქმედებდა” .
გასულ კვირას ტოდ პეილინმა ადმინისტრაციის საქმიანობაში საკუთარი მონაწილეობის გამართლება სცადა. ბრენჩფლაუერისადმი მიცემულ წერილობით ჩვენებებში პეილინი აცხადებს, რომ მისი პერსონისადმი ასეთი გამძაფრებული ყურადღება მხოლოდ ერთი რამითაა განპირობებული- ის მაღალი თანამდებობის მქონე ქალის მეუღლეა.
”ძალიან ხშირად მაკრიტიკებენ იმის გამო, რომ ცოლის საქმიანობაში ვერევი. მე და ჩემს მეუღლეს ძალიან ახლო ურთიერთობა გვაქვს. ჩვენ საუკეთესო მეგობრები ვართ. მე მას სამსახურეობრივ წინსვლაში ვეხმარებოდი, ის კი მე” - წერს პეილინი.
”ნენსი მურკოვსკი თავის მეუღლეს ფრენკ მურკოვსკის (ყოფილი გუბერნატორი) ეხმარებოდა, მაგრამ ამას თითქმის არავინ აპროტესტებდა. მურკოვსკიმ ისიც კი დაწერა, რომ მისი ცოლი საუკეთესო მრჩეველი იყო და ყველა მოგზაურობაში დაყვებოდა” - აცხადებს პეილინი - ”უსამართლობაა, როცა ჩემს ცოლთან მიმართებაში ორმაგ სტანდარტებს იყენებენ, მხოლოდ იმიტომ რომ ის პირველი გუბერნატორი ქალია”.
ოფიციალური გამოძიების მასალები სარა პეილინის მეუღლის როლს ასე აღწერენ - ”პირველი ჯენტლმენის” გავლენა იმდენად ყოვლისმომცველი იყო, რომ ადმინისტრაციის მაღალი თანამდებობის პირები შეწუხდნენ კიდეც მისი დაჟინებული ზარებით. ანგარიშში დაფიქსირებულია, მაგალითად ტოდ პეილინის გამუდმებული ზარები ჩინოვნიკ ჯონ ბიტნისთან.
”ტოდი... დღეში ერთხელ მაინც მირეკავდა, ხანდახან დღეში ორჯერ, ან სამჯერ. უამრავ საკითხთან დაკავშირებით” - უფრო ხშირად კი ვუტენის გამო, ნათქვამია ბიტნის ჩვენებებში.
”თქვენ პროცესებში ჩართული იყავით?” - ეკითხება მას ბრანჩფლაუერი.
”ჰო, მაგრამ მისთვის არაფრის თქმა არ მინდოდა, არ ვაპირებდი არაფრის გაკეთებას... მიმაჩნდა, რომ ეს მიზანშეწონილი არ იყო, მაგრამ ტოდისთვის არაფერი მითქვამს”.
ბიტნიმ ბოლოს სამსახური დაკარაგა. მისთვის მიზეზი არ აუხსნიათ, მაგრამ ის დარწმუნებულია, რომ იცის რატომაც - პეილინის მეგობრის ცოლთან რომანი ჰქონდა, მოგვიანებით ცოლადაც შეირთო.
მაღალი თანამდებობის პირთა ნაწილმა ბრენჩფლაუერს დაუდასტურეს, რომ პეილინს ძალიან ხშირად ნახულობდნენ გუბერნატორის ოფისში. ნაწილი მის ხშირ ვიზიტებს ერთი რამით ხსნის - წყვილის უმცროსი ბავშვი მისახედი იყო, ტოდიც მოდიოდა და მეუღლეს ეხმარებოდა.
მაგრამ, მაგალითად, გენერალურ პროკურორს პეილინის მეუღლის ხშირი ვიზიტების მიზეზის ახსნა გაუჭირდა. ანგარიშში ის ასე პასუხობს შეკითხვებს:
”კაბინეტის სხდომები საჯარო იყო?”
”რამდენადაც ვიცი, არა”
”ტოდი სახელმწიფო მოსამსახურეა?
”არა”
”იცით, რატომ ტოვებდნენ მას ამ სხდომებზე?”
”არა”.
მაკკეინისა და პეილინის კამპანიის სპიკერი აცხადებს, რომ მარტივად ახსნის ტოდის ჩართულობას პეილინის საქმიანობაში. სარა პეილინი თავის ქმარს, რომელიც სახლში ბავშვებს უვლიდა, ხშირად სთხოვდა, ოფიციალური მიმოწერის ამობეჭდვას იმისთვის, რომ შინ მისულს ღამე წერილები გადაეკითხა.
”ტოდი სავსებით შესაფერისად იქცეოდა, აკეთებდა იმას, რასაც მთელი ქვეყნის მასშტაბით, სხვა გუბერნატორების მეუღლეები აკეთებენ” - ამბობს გრიფინი.
ტოდს უამრავი საქმიანი წერილის ასლს უგზავნიდნენ, მაგალითად კანონპროექტს აბორტის დროს მამის თანხმობის აუცილებლობის შესახებ; წერილებს პოლიციის ოფიცერთა კავშირთან დასადებ კონტრაქტებზე და ა.შ.
ორიგინალი
No comments:
Post a Comment