ქრისტიან ეში
10 ოქტომბერი 2008
4 ტელეფონი, 4 მონიტორი, 2 კომპიუტერული "მაუსი", უზარმაზარი პულტი ღილაკებით – ეს დიმიტრი მედვედევის სამუშაო კაბინეტია, რომელშიც იმდენი ტექნიკაა, რომ დარაჯის ჯიხურს მოგაგონებთ. ეს ადამიანი ხომ არამხოლოდ მეთაურია, იგი საკუთარი ქვეყნის პირველი მსახურია. ამიტომ, რაღაც სიახლე შექმნა, ყოველ შემთხვევაში – სიახლე რუსეთისთვის: ვიდეობლოგი. ის ვინც ინტერნეტში კრემლის ვებ-გვერდზე შედის, პრეზიდენტს ხედავს, რომელიც მოძრავ სავარძელში მოკალათებული მონიტორებს თვალს აშორებს და კამერისკენ ბრუნდება. შემდეგ ოდნავ შესამჩნევად თავს ხრის, დამთვალიერებელს ესალმება, წარმოთქვამს "ძვირფასო მეგობრებო" და იწყებს მსოფლიო პრობლემების ჩამოთვლას, რომლებზეც საუბარს ფრანგულ ევიანში შეხვედრაზე აპირებს.
ვიდეობლოგი სხვა ქვეყნის მეთაურებსაც აქვთ – მაგალითად, ანგელა მერკელი ამ საშუალებას უკვე ორ წელზე მეტია იყენებს. მაგრამ მისი გამოჩენა ინტერნეტში სწორედ იმას ადასტურებს, თუ რამდენად მოსაწყენია ბლოგის ფორმატში სახელმწიფო რიტორიკის მოსმენა. მაგრამ კრემლის შემთხვევაში ვიდეობლოგი მაყურებელთა ორიენტირების თამამ ცვლილებებზე მიუთითებს. დღემდე რუსეთის ხელისუფალთა ნახვა, მხოლოდ გვერდიდან შეიძლებოდა. მედვედევის და პუტინის ნახვა შესაძლებელია თითქმის ყოველდღე, საღამოს საინფორმაციო გამოშვებებში. საკუთარ კაბინეტებში ისინი მაღალი რანგის ჩინოვნიკებს იღებენ. სასახლის ცერემონიალი შემდეგ წესებს ითვალისწინებს: პრეზიდენტი ან პრემიერ-მინისტრი ყოველთვის მარცხენა მხარეს სხედან და ტანით, მსუბუქად ეყრდნობიან სავარძლის ზურგს. მაგიდის მარჯვენა მხარეს მინისტრი ზის, რომელიც მოსწავლესავით წინ იხრება და უფროსს ანგარიშს აბარებს.
საუბარი, როგორც წესი იწყება სიტყვებით "მე გავეცი ბრძანება". და ასევე ტრადიციულად სრულდება "კარგით, აღსრულების პროცესს თვალი პირადად მიადევნეთ".
რა თქმა უნდა, გვერდიდან ხელისუფლება უფრო მომგებიანად გამოიყურება, ვიდრე ანფასში: სხეულის მდგომარეობით ტელემაყურებელი უკეთ ხვდება, თუ რამდენად გავლენიანია მისი მფლობელი. გარდა ამისა, ხედი გვერდიდან მათ საკუთარი თავის შეფთან იდენტიფიცირების საშუალებას აძლევს – ისიც მსმენელის როლშია, რომელიც სკეპტიკურად ისმენს მონათხორობს მის სახელმწიფოში მიმდინარე მოვლენებზე. და აი ახლა, მედვედევმა ხალხთან პირდაპირი საუბარი გადაწყვიტა; ძველმა ფორმატმა, როგორც ჩანს საკუთარი თავი ამოწურა, თან აქ მას ყოვლისშემძლე კონკურენტი ჰყავს – მედია ვარსკვლავი ვლადიმერ პუტინი, რომელმაც არ იკმარა ის, რომ სულ ცოტა ხნის წინ ციმბირელი ვეფხვი დაძლია და პრეზიდენტ მედვედევს ისევ გაასწრო ერთი ნაბიჯით: სანკტ-პეტერბურგში DVD-ის პრეზენტაცია გამართა, სახელწოდებით "ვსწავლობთ ძიუდოს ვლადიმერ პუტინთან ერთად", სადაც ის მნიშვნელოვანი ილეთების დემონსტრირებას ახდენს და ბრძოლის ხელოვნებაზე ფილოსოფოსობს: "ბრზოლის პრაქტიკა კომპრომისებს და დათმობებს ითვალისწინებს, მაგრამ მათი დაშვება მხოლოდ იმ შემთხვევაში შეიძლება, თუკი გამარჯვებასთან მიყავხარ".
ორიგინალი
No comments:
Post a Comment