სააკაშვილი ომის დროს ქართველთა მიერ სამხედრო დანაშაულებების ჩადენის ფაქტს უარყოფს

მაიკლ ჰესი
29 ოქტომბერი 2008

პრეზიდენტი მიხეილ სააკაშვილი უარყოფს იმ ფაქტს, რომ საქართველომ მისი უშიშროების ჯარების მიერ სეპარატისტულ რეგიონზე, სამხრეთ ოსეთზე განხორცილებული შეტევისას სამხედრო დანაშაულებანი ჩაიდინა. განცხადება ბრიტანული სამაუწყებლო კორპორაციის მიერ გაკეთებული ბრალდებების საპასუხოდ გაკეთდა.

BBC აცხადებს, რომ მოწმეთა ჩვენებების თანახმად, ტანკები სამხრეთ ოსეთის დედაქალაქში, ცხინვალში პირდაპირ უხსნიდნენ ცეცხლს საცხოვრებელ უბნებს და დამიზნებით ესროდნენ მშვიდობიან მოქალაქეებს, როდესაც ისინი გაქცევას ცდილობდნენ. Human Rights Watch-მა ასევე განაცხადა, რომ შეტევისას ქართველები ძალას არაპროპორციულად და განურჩევლად იყენებდნენ.

“ჩვენ კატეგორიულად უარვყოფთ სამხედრო დანაშაულთან დაკავშირებულ ყოველგვარ ბრალდებას” - განაცხადა BBC-ის ვებგვერდზე გამოქვეყნებულ ვიდეოკლიპში სააკაშვილმა. მან აქვე დაამატა, რომ საქართველო: “ღიაა ნებისმიერი გამოძიებისთვის”.

ძალის განურჩეველი გამოყენება ჟენევის კონვენციის თანახმად დარღვევად ითვლება, ხოლო სერიოზული დარღვევები სამხედრო დანაშაულად განიხილება. კონფლიქტი 7 აგვისტოს დაიწყო მაშინ, როდესაც ქართულმა არტილერიამ სამხრეთ ოსეთზე კონტროლის აღდგენის მიზნით ცხინვალზე საარტილერიო შეტევა განახორციელა.

რუსეთმა ტანკები, ჯარები და ავიაცია სამხრეთ ოსეთში 8 აგვისტოს გააგზავნა. დაიწყო შეტაკება, რომელიც საქართველოს ტერიტორიაზე გავრცელდა, რასაც შედეგად ხუთდღიან ომში ქართული ჯარის დამარცხება მოყვა. აშშ-მ, საქართველოს მოკავშირემ, რუსეთი კონფლიქტის მსვლელობისას ძალის არაპრორციულ გამოყენებაში დაადანაშაულა.

BBC-მ განაცხადა, რომ მტკიცებულებები ომის დასრულების შემდეგ სამხრეთ ოსეთში პირველი, შეუზღუდავი ვიზიტის დროს შეაგროვა. ვიზიტის თარიღი დასახელებული არ ყოფილა.

პირდაპირ ყელში

BBC-ის ტაია სიტნიკის, კოლეჯის 45 წლის პედაგოგის შემთხვევა მოყავს, მისი ვაჟი 9 აგვისტოს სისხლისდენით მას შემდეგ გარდაიცვალა, რაც ქართული ტანკის მიერ ნასროლი ჭურვის ფრაგმენტი პირდაპირ ყელში მოხვდა. ისინი თავს საცხოვრებელი კორპუსის სარდაფს აფარებდნენ.

სიტნიკი ყვება, რომ მოგვიანებით მან ნახა, თუ როგორ ესროდა საცხოვრებელი კორპუსიდან რამდენიმე მეტრში მდგომი ტანკი თითოეულ სართულს - გადმოსცემს BBC. აქვეა ნათქვამი, რომ დაზიანებები, რომლებიც საცხოვრებელ სახლს აღენიშნება, ადასტურებს სიტნიკის ვერსიას.

დედა ამბობს, რომ მისი ვაჟი ტელევიზორს უყურებდა, როდესაც ქართველებმა დაბომბვა დაიწყეს - აღწერილია რეპორტაჟში. ”ჩვენ წამოვხტით, გამოვრთეთ სინათლე და დაბლა, სარდაფში გავიქეცით” - ყვება სიტკინი. ”იქ, სარდაფში ყოფნისას გვეგონა, რომ დაბომბვა მალე გაჩერდება”.

”მაგრამ ცეცხლი ძლიერდებოდა და ძლიერდებოდა” - ამბობს ის - ”ხანდახან პაუზა ჩამოვარდებოდა ხოლმე და ჩვენ ნატოს ფორმებში ჩაცმულ ქართველ ჯარისკაცებს ვხედავდით, ქუჩებს მიუყვებოდნენ”.

ექიმი მიზანში ამოიღეს

მარინა კოჩიევამ, ცხინვალის მთავარი ჰოსპიტალის ექიმმა BBC-ის უთხრა, რომ ის და მისი სამი ნათესავი 9 აგვსტოს გაქცევის მცდელობისას მიზანში ამოიღეს. ტანკმა მის ავტომობილსა და ორ სხვა მანქანას ცეცხლი გაუხსნა, მანქანები მთლიანად განადგურდა. ისინი მიწაზე იწვნენ, სროლა კი გრძელდებოდა.

კოჩიევამ BBC-ის მანქანის დამწვარი ნარჩენები აჩვენა - მთლიანად დაცხრილული მანქანა ქალაქის გზაზე იდგა, უფრო დიდი დაზიანება მანქანის წინა კარზე, სატანკო ყუმბარის ნაკვალევზე მიანიშნებდა. კოჩიევამ განაცხადა, რომ მედდა, მისი ჰოსპიტალიდან, ცხინვალიდან გაქცევის მცდელობის დროს მსგავს გარემოებებში მოკლეს.

იმ მოსაზრებას, რომ შესაძლოა ქართულმა ჯარებმა კოჩიევას მანქანას ესროლეს, რადგან იქ ოსი მებრძოლები ეგულებოდათ, ის უარყოფს.

”მებრძოლები ქალაქიდან არ გარბოდნენ, ისინი ქალაქისკენ მოემართებოდნენ” - უთხრა მან BBC-ის. ”ქართველებმა იცოდნენ, რომ ეს გზა ოსებისთვის სიცოცხლის გზა იყო. ისინი ისხდნენ და მოსაკლავად გველოდნენ” - ამბობს კოჩიევა.

რუსეთმა 26 აგვისტოს სამხრეთ ოსეთისა და მეორე სეპარატისტული რეგიონის, აფხაზეთის დამოუკიდებლობა აღიარა. რეგიონებთან სეპარატისტული ომები 1990 წლების დასაწყისში დაწყო.

სააკაშვილმა BBC-ის რეპორტაჟის პასუხად განაცხდა, რომ სამხრეთ ოსეთის ის რაიონები, რომლებიც ომამდე საქართველოს კონტროლს ექვემდებარებოდნენ, მთლიანად იმ ეთნიკური ოსებით იყო დასახლებული, რომლებიც თბილისის მთავრობასთან იყვენენ დაკავშირებულნი და სწორედ ეს სოფლებია 100%-ით განადგურებული. Human Rights Watch-მა დაადსატურა, რომ ქართული სოფლები კონფლიქტის მსვლელობისას გაძარცვეს და გადაწვეს.

”აქ, რა თქმა უნდა სამხედრო დანაშაულია ჩადენილი, მაგრამ დანამდვილებით, ჩვენს მიერ - არა” - განუცხადა სააკაშვილმა მაუწყებელს.

დიდი ბრიტანეთის საგარეო უწყების მდივანმა დევიდ მილიბენდმა BBC-ის უთხრა, რომ ქართველთა თავდასხმა სამხრეთ ოსეთზე ”უგუნურება” იყო, მან ქართველთა ”სამხედრო ქმედებებისა და სამხედრო დანაშაულებათა” საკითხი თბილისში ვიზიტის დროს წამოჭრა.

თუმცა მილიბენდმა ისიც თქვა, რომ ”რუსეთის პასუხი არაპროპორციული და არასწორი იყო”.

ორიგინალი