15 ოქტომბერი 2008
ჟენევა – დღეს აქ ქართველი და რუსი დელეგატები მშვიდობიანი მოლაპარაკეკების დასაწყებად დახურულ შეხვედრაზე, აგვისტოს ომის შემდეგ, პირველად შეიკრიბებიან. მაგრამ გარემო მძიმეა - სავსე ბრაზით და უნდობლობით.
ჟენევის მოლაპარაკებებს ქართველების და რუსებისთვის ფორუმის დატვირთვა აქვს. ისინი ერთად უნდა დასხდნენ და გადაწყვიტონ, ზამთრის მოახლოებასთან ერთად როგორ დაეხმარონ დევნილებს და კონფლიქტის მოგვარებისთვის სრულმაშტაბიანი პროცესი დაიწყონ.
”საერთაშორისო დისკუსია, რომელიც ხვალ გაიმართება, მხოლოდ დასაწყისია, და ის არ უნდა გავიგოთ როგორც მოლაპარაკებების დასასრული. ამას დრო დასჭირდება, ამიტომ მოთმინება უნდა ვიქონიოთ”, განაცხადა ჟურნალისტებთან სამშაბათს საღამოს გაეროს გენერალურმა მდივანმა ბან გიმუნმა.
პრეზიდენტმა სააკაშვილმა წარმატების მიღწევის შანსი ეჭვქვეშ დააყენა და აჯანყებული რეგიონების წარმომადგენლებს "ეთნიკური წმენდის” მომწყობები უწოდა.
"ჩვენ ვფიქრობთ, რომ ეს ადამიანები პოლიტიკოსები არ არიან, მათ ეთნიკური წმენდა მოაწყვეს, ისინი კრიმინალები არიან”, უთხრა სააკაშვილმა რეპორტიორებს ბრუსელში, ევროკომისიის ხელმძღვანელთან ჟოზე მანუელ ბაროზოსთან შეხვედრის შემდეგ.
ჟენევის შეხვედრებში აფხაზეთის და სამხრეთ ოსეთის წარმომადგენელთა მონაწილეობა მოლაპარაკებების დაწყების წინ უთანხმოების მთავარი მიზეზი იყო, და მოუგვარებელ საკითხად რჩებოდა სამშაბათის საღამომდე.
"ეს საკითხები ხვალისთვის გადავიტანეთ”, უთხრა ჟურნალისტებს საფრანგეთის საგარეო საქმეთა მინისტრმა, ბერნარ კუშნერმა, როდესაც მას ჟენევის მოლაპარაკებათა მონაწილეების ვინაობა კითხეს.
"ხვალ ვნახავთ როგორი რეაქცია ექნებათ მთავარ მონაწილეებს”, დაამატა მან.
ეს აზრი ფინეთის საგარეო საქმეთა მინისტრის ალექსანდრე სტუბის კომენტარებშიც აისახა, რომელიც ევროპაში უსაფრთოხებისა და თანამშრომლობის ორგანიზაციას ხელმძღვანელობს და გაეროსთან და ევროკავშირთან ერთად ჟენევის მოლაპარაკებების ორგანიზატორია.
"ჩვენ ვიცით, რომ ეს გრძელი პროცესია, ამიტომ წინსვლას ნაბიჯ-ნაბიჯ ვაპირებთ”.
რუსეთმა განაცხადა, რომ ის გავა მოლაპარაკებებიდან, თუკი შეხვედრაზე საქართველოს ტერიტორიის ყველა მხარე თანაბარი სტატუსით არ იქნება წარმოდგენილი.
საქართველოს თქმით, მოლაპარაკებების ოფიციალური ფორმატი მასში მხოლოდ საქართველოს, რუსეთის, შეერთებული შტატების, ევროკავშირის, გაეროსა და ეუთოს მონაწილეობას ითვალისწინებს.
AFP-თან საუბრისას, ორშაბათს საქართველოს საგარეო საქმეთა მინისტრის მოადგილემ გიგა ბოკერიამ განაცხადა, რომ თბილისი სეპარატისტული რეგიონების ლიდერებთან შეხვედრაზე მხოლოდ არაოფიციალურ ფორმატში დათანხმდებოდა, და თუკი ამ შეხვედრაში რეგიონის პროქართულად განწყობილი წარმომადგენლებიც ჩაერთვებოდნენ.
მართალია, სამშვიდობო გეგმის თანახმად რუსეთმა დატოვა უშუალოდ საქართველოს ტერიტორია, მაგრამ თბილისი აპროტესტებს 7 600 რუსი სამხედროს დარჩენას სეპარატისტული აფხაზეთის და სამხრეთ ოსეთის ტერიტორიაზე.
მაგრამ რუსეთის პრეზიდენტი მედვედევი დაჟინებით ამტკიცებს, რომ მოსკოვმა სამშვიდობო ხელშეკრულების პირობები სრულად შეასრულა, და რომ რუსეთი შეხვედრაზე საქართველოსთვის იარაღის მიყიდვაზე ემბარგოს დაწესებას მოითხოვს.
ბრიუსელის ერთ-ერთი დიპლომატის ინფორმაციით, რომელიც პრობლემას კარგად იცნობს, სამხრეთ ოსეთის და აფხაზეთის წარმომადგენლებმა მოლაპარაკებებში მონაწილეობა შეიძლება არა პლენარულ სხდომებზე, არამედ სამუშაო ჯგუფის ფარგლებში მიიღონ.
ევროპული დელეგაცია ამერიკულმა არასამთავრობო ორგანიზაციამ Human Rights Watch–მა დაარწმუნა, რომ საჭიროა კონცენტრაცია სამოქალაქო პირების უფლებების დაცვაზე და ამ მხრივ ვალდებულებების შესრულება ყველა მხარეს უნდა დაეკისროს.
"ამ კონფლიქტით მთავარი დარტყმა მშვიდობიანმა მოსახლეობამ მიიღო”, განაცხადა HRW-ის წარმომადგენელმა რეიჩელ დენბერმა. "ათობით ათასი ადამიანი დევნილი გახდა. ახლა მათ უსაფრთხოება და პირობების შექმნა სჭირდებათ, იმისთვის რომ საკუთარ სახლებს დაუბრუნდენ”.
რუსეთმა საქართველოზე შეტევა 8 აგვისტოს დაიწყო, რათა ქართული ჯარი მოსკოვის მხრიდან მხარდაჭერილი, სეპარატისტული სამხრეთ ოსეთის ტერიტორიიდან გენედევნა.
მოსკოვმა განაცხადა, რომ ის რუსეთის მოქალქეებს ქართული აგრესიისგან იცავდა, მაგრამ თბილისი მოსკოვს კონფლიქტის პროვოცირებაში ადანაშაულებს, რომლის მიზანიც გახლდათ რეგიონზე კონტროლის გამყარება და საქართველოს პროდასავლური მთავრობის დამხობა.
ორიგინალი
No comments:
Post a Comment