მეთ რობინსონი
2 ოქტომბერი 2008
თბილისი - საქართველოში ევროპის კავშირის მეთვალყურეთა მისიის ხელმძღვანელის აზრით, იმის მოლოდინი, რომ რუსეთის შეიარაღებული ძალები სეპარატისტულ რეგიონში, სამხრეთ ოსეთში ევროპის სამეთვალყურეო მისიას უახლოეს მომავალში მუშაობის ნებას დართავენ, არარეალისტურია.
გერმანელმა დიპლომატმა ჰანსოირ ჰარბერმა როიტერთან ინტერვიუში განაცხადა, რომ მეთვალყურეთა მისია შეეცდება დე ფაქტო საზღვარი სამხრეთ ოსეთთან ვაჭრობისა და ორივე მხარის სამართალდამცავთა ურთიერთქმედებისთვის უფრო მოქნილი გახადოს.
მაგრამ რუსეთის მიერ საქართველოს ორი სეპარატისტული რეგიონის დამოუკიდებლობის აღიარება იმას ნიშნავს, რომ: "ჩვენ, ალბათ, სამხრეთ ოსეთსა და აფხაზეთში პატრულირების საშუალება არ მოგვეცემა" - თქვა ჰარბერმა.
"ჩვენი მისია სამოქალაქოა, შეიარაღება არ გვაქვს და მხოლოდ იქ შევძლებთ შესვლას, სადაც ნებას დაგვრთავენ". მისიის ხელმძღვანელთან, 55 წლის ჰარბერთან ინტერვიუ მისიის შტაბ-ბინაში, თბილისში, სტალინის საიდუმლო სამსახურის შეფის, უსასტიკესი ლავრენტი ბერიას ყოფილ ვილაში ავიღეთ.
"... არ მგონია, რომ იქ მალე შეგვიშვან"
"იმედი გვაქვს, რომ ჩვენი მეშვეობით და ორივე მხარის სამართალდამცავების დახმარებით, საზღვარი უფრო მოქნილი გახდება. ეს უფრო ბუნდოვანი წარმოდგენაა, ვიდრე კონკრეტული სამოქმედო გეგმა".
200-მა მეთვალყურემ ოთხშაბათს რუსების კონტროლირებად ბუფერულ ზონებში, სამხრეთ ოსეთთან პატრულირება დაიწყო.
ფრანგების შუამავლობით დადებული შეთანხმების თანახმად, რუსული ჯარები არასადავო ქართული ტერიტორიებიდან, ე.წ. უსაფრთხოების ორი ზონიდან, 10 ოქტომბრისთვის საბოლოოდ უნდა გავიდნენ. ეს ზონები გასული თვის აგვისტოს ხუთდღიანი ომის შემდეგ შეიქმნა.
ჰარბერის სიტყვებმა, როგორც ჩანს, საქართველოს ხელისუფლებაში იმედგაცრუება გამოიწვია. ისინი ამტკიცებენ, რომ ევროკავშირის მანდატი საქართველოს მთელ ტერიტორიაზე, მათ შორის რუსების მიერ აღაირებულ სეპარატისტულ რეგიონებშიც, პატრულირების უფლებას იძლევა.
”სადღაც შუაში”
ორმხრივი ცეცხლი სეპარატისტებსა და ქართულ შეიარაღებულ ძალებს შორის ომში მაშინ გადაიზარდა, როდესაც ქართულმა ჯარმა სამხრეთ ოსეთზე კონტროლის აღდგენა სცადა. სამხრეთ ოსეთი საქართველოს დაქვემდებარებიდან 1991-1992 წ.წ. გამოვიდა.
რუსეთმა ძლიერი კონტრშეტევით უპასუხა და ქართული ჯარი სამხრეთ ოსეთიდან გამოაძევა. რუსული შეირაღებული ძალები ქართულ ტერიტორიაზე ღრმად შემოიჭრნენ, რასაც იმით ასაბუთებდნენ, რომ შესაძლო ქართული კონტრშეტევის პრევენცია მხოლოდ ასეა შესაძლებელი.
დასავლეთის ურთიერთობა მოსკოვთან ახალ ეტაპზე გადავიდა. მან რუსეთი "არაპროპოციული პასუხისთვის" დაგმო და "ბუფერული ზონებიდან" რუსული ჯარების სასწრაფო გასვლა მოითხოვა.
რუსეთი სამხრეთ ოსეთსა და აფხაზეთში 7600 მეომარს ტოვებს და აცხადებს, რომ ევროკავშირის სადამკვირვებლო მისია აქ საჭირო არ არის.
ჰარბერმა, რომელიც 1999-2002 წ.წ. მოსკოვში გერმანიის საელჩოში მუშაობდა, გვითხრა, რომ რუსულმა სამხედროებმა მიანიშნეს იმაზე, თუ რომელ საკონტროლო პუნქტს როდის დატოვებენ, მაგრამ "ჩვენ აქამდე არ გვაქვს მათი ზუსტი სამოქმედო გეგმა".
მისია კოორდინაციას გაუწევს საქართველოს მილიციის შემოსვლას ამ არეალში, სადაც უფლებადაცვითი ორგანიზაციების თქმით, შეიარაღებული დაჯგუფებანი თავს ესხმიან ეთნიკურ ქართველებს, ძარცვავენ მათ კარ-მიდამოს და საცხოვრებელი ადგილების მიტოვებას აიძულებენ.
"ჩვენ დაახლოებით წარმოდგენილი გვაქვს, როგორ განვითარდება მოვლენები" - ამბობს ჰარბერი - "სირთულე იმაში მდგომარეობს, რომ თუ ისინი პირველ რიგში საკონტროლო პუნქტებს დატოვებენ, ჩვენ ჯერ შედარებით უსაფრთხო ტერიტორიებზე შევალთ და მერე გადავინაცვლებთ ადმინისტრაციული საზღვრისკენ, სადაც ვითარება გაცილებით რთულია".
"რუსებს, როგორც ჩანს, უნდათ, რომ მათსა და ქართულ ძალებს შორის უსაფრთხო დისტანცია შეინარჩუნონ, ასე რომ ჩვენ სადღაც შუაში ვიდგებით" - გვითხრა ჰარბერმა.
მან ისიც თქვა, რომ რუსული მხარე შფოთავს იმ ქართული პოლიციის შენაერთებთან დაკავშირებით, რომლებიც ამ მიდამოებში უნდა დისლოცირდენ - ექნებათ თუ არა მათ ჯავშანტექნიკა, შედიან თუ არა მათ შემადგენლობაში სპეცდანიშნულების შენაერთები.
საქართველოს შინაგან საქმეთა მინისტრმა განაცხდა, რომ პოლიცია "ასე თუ ისე ნორმალურად იქნება შეიარაღებული", მაგრამ აქვე დაამატა "...იმისთვის, რომ კანონი დავიცვათ ჩვენ ერთი შეიარღებული პოლიციელის იმედად ვერ დავრჩებით".
No comments:
Post a Comment