ფილიპა რუნერი
15 ოქტომბერი 2008
ბრიუსელი - რადგან ევროკავშირის ლიდერები ბრიუსელში რუსეთთან ურთიერთობის საკითხებზე იკრიბებიან, ხოლო ჟენევაში დიპლომატები საქართველოს უსაფრთხოებაზე მსჯელობენ, ერთ პოლონელ ექიმს სურს პოლიტიკურ ლიდერებს კონფლიქტის ფაქტები განადგურებული დროშის საშუალებით შეახსენოს.
ჰენრიკ ვლასზჩიკს – არ სურს EUobserver–ს საკუთარი საქველმოქმედო ორგანიზაციის სახელწოდება გაუმხილოს, რადგან ამით შეიძლება საბრძოლო მოქმედებებში მუშაობის უფლება დაკარგოს – საქართველოში ის კონფლიქტის დროს 11 აგვისტოს ჩავიდა. მისი ბაზა გორში იყო. ის სამხრეთ ოსეთის სასაზღვრო რაიონებში მოგზაურობდა.
"რუსებმა გორის უნივერსიტეტი მძიმე არტილერიით დაცხრილეს", თქვა მან. "როდესაც ჩვენ შენობაში შევედით ყველაფერს ცეცხლი ეკიდა, გარშემო წიგნები ეყარა. მაშინ შევნიშნეთ, თუ როგორ დაესხნენ თავს რუსი ჯარისკაცები უნივერსიტეტის და ევროკავშირის დროშებს, რომლებიც საგანგებოდ იყო დაცხრილული. ევროკავშირის და საქართველოს მისწრაფების ეს სიმბოლო ფიზიკური ზიზღის ობიექტი გახდა”.
სამედიცინო მოსამსახურემ დროშა შეინახა და ახლა ცდილობს ის ევროპარლამენტის პრეზიდენტს ჰანს-გერტ პოტერინგს უახლოეს დღეებში გადასცეს და აჩვენოს მას, რომ ომი მხოლოდ საქართველოს მიწებისთვის არ მომხდარა, ეს იყო შეტაკება ორ მოსაზღვრე იდეოლოგიას და “იმპერიას” – ევროკავშირს და რუსეთს შორის.
"პარლამენტმა ის სამუზეუმო ექსპონატის სახით უნდა შეინახოს", განაცხადა ვლასზჩიკმა. "ეს რუსეთის მოსახლეობის ნაწილის ევროკავშირის მიმართ დამოკიდებულებაზე მეტყველებს. ევროკავშირის ქვეყნებმა უნდა გაიგონ, რომ ეს არის კონფლიქტი ორ იმპერიას შორის”.
ის როგორც ფაქტების თვითმხილველი, რომელსაც ქართველ დევნილებთან უშუალო შეხება ჰქონდა, მის საავადმყოფოში კი დაჭრილ პაციენტებს მკურნალობენ - რუსულ ძალებს ქართულ სახლებში ხაფანგების მოწყობაში ადანაშაულებს. ისინი გადიოდნენ, მაგრამ სახლებში ასაფეთქებელ ნივთებს ტოვებდნენ, ხშირად ბავშვების სათამაშოებშიც კი.
მაგრამ მისი ყველაზე დიდი შთაბეჭდილება რუსეთის ავიაციის მიერ გორის საბავშვო ბაღის დაბომბვას უკავშირდება. ბაღის სახურავი მთლიანად დაინგრა.
"ყველაზე დიდი ფასი მშვიდობიანმა მოსახლეობამ გადაიხადა. მე ვნახე ცხედრების ძებნის დროს დედები როგორ ტიროდნენ. მამები კი დანგრეული შენობების ირგვლივ უპატრონო ძაღლებს აგროვებდნენ, რომლებსაც სუნით გარდაცვლილების პოვნა შეეძლოთ. ამ ომის სურათი არასდროს დამავიწყდება: დედები რომლებიც ტირიან და უპატრონო ძაღლები გარშემო".
ვლაზჩიკი ორივე მხარეს ადანაშაულებს. ის ამბობს რომ ქართულმა ხელისუფლებამ სამედიცინო ტვირთზე, რომელიც ქვეყანაში საქველმოქმედო ორგანიზაციებს ჩაჰქონდათ მაღალი საბაჟო გადასახადები დააწესა. მათ დევნილების რეალურ დახმარებაზე მეტად, მათი პოლიტკური ფასი აინტერესებდათ.
"ორივე მხარემ ჯეროვნად არ შეაფასა დაღუპულ სამოქალაქო პირთა რეალური რიცხვი", თქვა მან. "რუსები ერიდებიან იმის გამჟღავნებას, რომ მათ აგრესიას ამხელა ადამიანური მსხვერპლი მოჰყვა. ქართველებისთვის კი ომს გაცილებით მეტი ხარჯი აღმოჩნდა, ვიდრე ისინი ვარაუდობდნენ”.
ბევრი ლაპარაკი, მცირე მოლოდინი
15 ოქტომბერს ბრიუსელში ევროკავშირის უმაღლესი დონის შეხვედრა იმართება. საეჭვოა ამ შეხვედრაზე რუსეთთან პარტნიორობის ხელშეკრულებაზე მოლაპარაკებების განახლების საკითხი გადაწყდეს, რადგან დიდი ბრიტანეთი, შვედეთი, პოლონეთი და ბალტიისპირეთის ქვეყნები ამტკიცებენ, რომ რუსეთის არმიას 12 აგვისტოს სამშვიდობო შეთანხმების პირობები ბოლომდე არ შეუსრულებია.
ჟენევის მოლაპარაკებებზე, რომლებიც ასევე 15 ოტომბერს იმართება, აქცენტი უსაფრთხოების აღდგენაზე და დევნილებისთვის სახლებში დაბრუნების პირობების შექმნაზე გაკეთდება, საქართველოს ტერიტორიული მთლიანობის საკითხს მომავლისთვის გადადებენ. განხილვები დაბალ დიპლომატიურ დონეზე იმართება და მასში სამხრეთ ოსეთის და აფხაზეთის დელეგატებიც მონაწილობენ.
"ამ მოლაპარაკებებიდან განსაკუთრებულს ნურაფერს ელით", განაცხადა სამშაბათს ბიუსელში საქართველოს ყოფილმა საგარეო საქმეთა მინისტრმა და ამჟამად მიხეილ სააკაშვილის ოპოზიციის ერთ-ერთმა გამოჩენილმა ფიგურამ სალომე ზურაბიშვილმა.
ქალბატონმა ზურაბიშვილმა, რომელიც ახლა საფრანგეთში ცხოვრობს, თქვა, რომ ომი რუსეთსა და საქართველოში დემოკრატიის დეფიციტს მოჰყვა. საქართველოში სააკაშვილმა მთელი ენერგია ჯარის მომზადებას მოახმარა და არა დემოკრატიული ინსტიტუტების მშენებლობას.
ჟენევის მოლაპარაკებებზე იმედებს არც საქართველოს პრეზიდენტი ამყარებს, რომელიც ევროკავშირის სამიტის წინა დღეს ასევე ბრიუსელში იმყოფებოდა. "ჩვენ არ ვფიქრობთ რომ ისინი (აფხაზეთის და ოსეთის დელეგატები) პოლიტიკოსები არიან", თქვა მან ევროკომისიის ხელმძღვანელთან ჟოზე მანუელ ბაროზოსთან ერთად გამართულ პრესკონფერენციაზე. "ისინი დამნაშავეები და ეთნიკური წმენდის ორგანიზატორები არიან".
ორიგინალი
No comments:
Post a Comment