სლობადან ლეკიჩი
26 იანვარი 2009
ბრიუსელი- ნატო და რუსეთი ტვირთის მიწოდების ახალ მარშრუტებს ორშაბათს განიხილავდნენ. შეხვედრამ ხელი შეუწყო იმ კავშირების გაუმჯობესებას, რომლებიც საქართველოსთან რუსეთის აგვისტოს ომის მერე შეჩერდა.
ნატოს სასწრაფოდ ესაჭიროება ალტერნატიული გზა რუსეთის გავლით იმისთვის, რომ 62 000 კაციან დასავლურ ჯარს, რომელიც ამჟამად ავღანეთშია დისლოცირებული და 30 000 კაციან დამატებით ძალას, რომლის შეყვანასაც წელს პრეზიდენტი ბარაკ ობამა გეგმავს, ტვირთი მიაწოდოს. უსაფრთხოების გაუარესებული პირობების გამო, პაკისტანზე გამავლი არსებული მარშრუტი სულ უფრო არასაიმედო ხდება.
პრეზიდენტმა დიმიტრი მედვედევმა განაცხადა, რომ მისი მთავრობა მზადაა ნება დართოს აშშ-სა და სხვებს გადაკვეთონ რუსეთის ტერიტორია იმ ტვირთის გადასატანად, რომელიც ავღანეთში დისლოცირებულ კოალიციურ ჯარს სჭირდება.
ნატოს სპიკერმა ჯეიმს აპატურაიმ ორსაათიანი შეხვედრის შემდეგ განაცხადა, რომ რუსეთისა და 26 ნატოს წევრი ქვეყნის წარმომადგენელი ” უფრო მეტად ავღანეთთან დაკავშირებულ” საერთო ინტერესებზე ფოკუსირდა.
”ჩატარდა ძალიან პოზიტიური დისკუსია, ძალიან პოზიტიური სულისკვეთებით განმსჭვალული, ერთმანეთის ბრალდებებისა და წარსული უთანხმოებების წამოძახების გარეშე” - განაცხადა მან.
მიუხედავად ნატოს გაფართოვებასა და აშშ-ს თავდაცვითი სარაკეტო სისტემების გეგმასთან დაკავშირებული წარსული მწვავე დაპირისპირებისა, მოსკოვმა ავღანეთის ომში დახმარების სურვილი ბევრჯერ გამოთქვა, რადგან ავღანეთის ხელისუფლებაში თალიბი ექსტრემისტების დაბრუნება, ცენტრალურ აზიაში დესტაბილიზაციას გამოიწვევს, რაც რუსეთის უსაფრთხოებას შეუქმნის პრობლემებს.
იმის გამო, რომ რუსეთი უშუალოდ არ ესაზღვრება ავღანეთს, ნატომ ავღანეთის ჩრდილო საზღვრებისკენ უასფრთხო ტრანზიტის უზრუნველსაყოფად ცენტრალური აზიის რამდენიმე ქვეყანასთანაც ჩაატარა მოლაპარაკებები.
კავშირები ნატოსა და მომძლავრებულ რუსეთს შორის საქართველოსთან აგვისტოს ხუთდღიანი ომის მერე შეჩერდა. ნატოს წევრმა ქვეყნებმა რუსეთი საქართველოს ჯარების წინააღმდეგ ძალის არაპროპორციულ გამოყენებაში დაადანაშაულეს. ქართულმა ჯარმა სეპარატისტული რეგიონის, სამხრეთ ოსეთის დედაქალაქი დაბომბა და დაიკავა. სამხრეთ ოსეთი 1990-ინი წლების დასაწყისიდან რუსეთის მხარდაჭერით იმართება.
შეერთებულმა შტატებმა და ზოგიერთმა აღმოსავლეთ ევროპულმა ქვეყანამ რუსეთს იმაში დასდო ბრალი, რომ სისხლისღვრა წამოიწყო, მაგრამ მოსკოვმა განაცხადა - მისი სამხედრო ქმდებები თავდაცვითი და საქართველოს აგრესიის საპასუხო იყო.
მას შემდეგ, რაც თვეების მანძილზე მიმდინარე დაპირისპირება ჩაცხრა, გასულ თვეს ნატოს საგარეო საქმეთა მინისტრები შეთანხმდნენ იმაზე, რომ მაღალ დონეზე ურთიერთობებს ეტაპობრივად განაახლებდნენ. ნატოს გენერალური მდივანი იაპ დე ჰოოპ სხეფერი გასულ თვეს ალიანსში მოსკოვის ელჩს, დიმიტრი როგოზინს შეხვდა. ეს ურთიერთობათა განახლებისკენ მიმავალი პირველი ნაბიჯი იყო.
ორშაბათის შეხვედრამ შესაძლოა გზა გაუხსნას ნატო-რუსეთის საბჭოს ოფიციალურ შეხვედრას. ნატო-რუსეთის საბჭო საკონსულტაციო ორგანოა, რომელიც 2002 წელს, პოსტ ცივი ომის ერაში ყოფილი მტრების ურთიერთობათა გასაუმჯობესებლად შეიქმნა.
აპატურაიმ განაცხადა, რომ თანამშრომლობის განახლების პროცესში შემდეგი ნაბიჯი, ალბათ, იაპ დე ჰოოპ სხეფერისა და რუსეთის ლიდერების შეხვედრა იქნება. ამ შეხვედრის შესაძლებლობა მომავალ თვეს გაჩნდება, როდესაც რუსეთის სამთავრობო დელეგაცია მიუნჰენში, უასფრთხოების ყოველწლიურ კონფერენციას დაესწრება, განაცხადა როგოზინმა.
დასავლეთის შეიარაღებული ძალები ავღანეთში, რომელსაც ზღვაზე გასასვლელი არა აქვს, დამოკიდებულნი არიან, პაკისტანის საპორტო ქალაქიდან, ყარაჩიდან მომავალ დახლართულ, მთიან გზაზე, საიდანაც საწვავის, საკვებისა და სხვა სახის ტვირთის 75%-ზე მეტს იღებენ.
ავღანეთში, სადაც 7 წლის წინ აშშ-ს თაოსნობით დაწყებული ოპერაციის შედეგად, თალიბების რეჟიმი დაემხო, დღეს შეტაკებებმა უფრო მწვავე ხასიათი მიიღო და შეიარაღებული რაზმები რეგულარულად ესხმიან თავს ტვირთის თანმხლებ ესკორტს.
მეორე მარშრუტი პაკისტანის დასავლეთ პროვინციიდან, ბალუჩისტანიდან ასევე თალიბებით სავსე ავღანურ რეგიონზე გადის.
”ნატოს ცენტრალურ აზიაზე გამავალი დამატებითი მარშრუტი სჭირდება, აქ კი რუსეთის მეფობს” - აცხადებს სტრატფორი ტეხასური კვლევითი ორგანიზაცია თავის რაპორტში, რომელიც ორშაბათს გამოქვეყნდა - ”ნაბიჯები აგრსეულია, რადგან ვაშინგტონს ახალი მარშრუტის გახსნა დღეს და არა მოგვიანებით სჭირდება”.
ნატოს წევრი რამდენიმე სახელმწიფო, მათ შორის საფრანგეთი, გერმანია და კანადა უკვე იყენებს რუსეთს ავღანეთში თავისი კონტიგენტისათვის ტვირთის მისაწოდებლად. გასულ კვირას შეერთებულმა შტატებმა რუსეთთან ამავე მარშრუტის გამოყენების შესახებ შეთანხმებას მიაღწიეს . რუსეთი ნატოს თავისი ტერიტორიის გავლით იარაღისა და სამხედრო აღჭურვილობის გადატანის ნებას არ რთავს.
No comments:
Post a Comment