20 თებერვალი 2009
ნატოს თავდაცვის მინისტრები, რომლებიც პოლონეთში არაფორმარულ შეხვედრაზე შეიკრიბნენ, იმაზე ფიქრობდნენ, როგორ გადაერჩინათ ყოფილი საბჭოთა რესპუბლიკების, საქართველოსა და უკრაინის ნატოში გაწევრიანების იმედი.
უკრაინის თავდაცვის მინისტრმა იური იეხანუროვმა ჟურნალისტებს განუცხადა, რომ ნატოს ახალი წევრებისთვის კარის ღიად დატოვებას სთხოვს.
”ჩვენთვის უკიდურესად მნიშვნელოვანია იმის განცდა, რომ ვინარჩუნებთ ნატოს ღია კარის პრინციპს. ეს ყველა ქვეყანას არა მარტო იმის შანსს აძლევს, რომ უზრუნველყოს საკუთარი უსაფრთხოება კოლექტიური უსაფრთხოების სისტემის ფარგლებში, არამედ, რაც კიდევ უფრო მნიშვნელოვანია, გაინაწილოს ერთობლივი პასუხისმგებლობა წესრიგსა და უსაფრთხოების გარანტიებზე” - განაცხადა იეხანუროვმა.
დღევანდელი შეხვედრების ფარგლებში ჩატარდა ნატო-უკრაინისა და ნატო-საქართველოს კომისიების სხდომებიც. კომისიაში შედიან ნატოს 26 წევრი ქვეყნის თავდაცვის მინისტრები და მათ კოლეგები კიევიდან და თბილისიდან.
ნატოს გენერალურმა მდივანმა იაპ დე ჰოოპ სხეფერმა ნატო-უკრაინის კომისიის სხდომის დაწყებამდე კიევის ნატოში გაწევრიანების შესახებ ილაპარაკა.
”ჩვენ დღეს დროულად მოგვეცა შესაძლებლობა გადავხედოთ უკრაინის თავდაცვისა და უსაფრთხოების სექტორის რეფორმირების ძალისხმევას. ჩვენ უნდა ვიმსჯელოთ გზებზე, რომელთა მეშვეობითაც ალიანსი დაეხმარება უკრაინას ნატოში გაწევრიანებისთვის მოსამზადებლად” - განაცხადა ჰოოპ დე სხეფერმა.
”ნატო მზადაა დაეხმაროს უკრაინას თავდაცვისა და უსაფრთხოების სტრუქტურების ყოვლისმომცველ რეფორმირებაში. ჩვენ მონდომებულნი ვართ ამ სტრატეგიული პარტნიორობის განვითარებაში” - დაამატა მან.
აგვისტოს შემდეგ
ნატო-საქართველოს კომისიის მოლაპრაკებების დროს, საქართველოს ხელისუფლების წარმომადგენლებმა და ნატოს თავდაცვის მინისტრებმა აგვისტოს რუსულ-ქართული ომის შემდგომი ვითარება განიხილეს. მოლაპარაკებებზე ყურადღება დაეთმო დახმარებას საქართველოსთვის აღდგენის პროცესში და ასევე რუსულ სამხედრო ბაზებს საქართველოს ტერიტორიაზე.
უკრაინისა და საქართველოს გაწევრიანებასთან დაკავშირებით რუსეთის წინააღმდეგობის გამო ნატომ თავი შეიკავა ორივე ქვეყნისთვის ალიანსში გაწევრიანების ფორმალური გეგმის შეთავაზებისგან. მოსკოვი ნატოს გაფართოვებას აღმოსავლეთისკენ თავისი ისტორიული გავლენის სფეროებში შეჭრად განიხილავს.
მაგრამ მიუხედავად ამისა ნატომ კიევსა და თბილისს საბოლოოდ ალიანსში გაწევრიანების მიზნის მისაღწევად სამხედრო და პოლიტიკური თანამშრომლობის ინტენსიფიკაცია შესთავაზა.
დე ჰოოპ სხეფერმა აღნიშნა, რომ საქართველო-რუსეთის ომის გამო ნატოსა და რუსეთს შორის უთანხმოება გრძელდება. მაგრამ დე ჰოოპ სხეფერმა თქვა, რომ ეს უთანხმოება არ შეაჩერებს ნატოს შეხვედრებს რუსეთის ხელისუფლების წარმომადგენლებთან ნატო-რუსეთის საბჭოს ფარგლებში.
”ჩვენ გავხდით მოწმენი (მოსკოვის მიერ) სამხრეთ ოსეთისა და აფხაზეთის დამოუკიდებლობის აღიარებისა. ჩვენ ვხედავთ, რომ (რუსებს) ბაზების დაფუძნება უნდათ. ჩვენ დღემდე გვაქვს აფხაზეთში და სამხრეთ ოსეთში შეღწევის პრობლემა, საქართველოს ტერიტორიაზე, სხვათა შორის. ნება დამრთეთ, ხაზი გავუსვა ამ პრინციპს. და აბსოლუტურად ცხადია, რომ ჩვენ არ ვეთანხმებით რუსეთს. ჩვენ მას ფუნდამენტურად არ ვეთანხმებით” - განაცხადა დე ჰოოპ სხეფერმა.
”ნიშნავს, თუ არა ეს იმას, რომ გარკვეული სახის თანამშრომლობა ამ მიზეზით უნდა შეჩერდეს? აი, ჩემი პასუხი ”არ არ უნდა შეჩერდეს”. ჩვენ უნდა გამოვიყენოთ ნატო-რუსეთის საბჭო არა მხოლოდ, როგორც ინსტიტუტი, არამედ იმიტომაც, რომ განვიხილოთ საკითხები, რომლებშიც ფუნდამენტური უთანხმოება გვაქვს” - დაამატა მან.
აშშ-ს თავდაცვის მდივანმა, რობერტ გეითსმა ჟურნალისტებს უთხრა, რომ საჭიროა მუშაობა ქვეყნის შიგნით უკრაინის ნატოში გაწევრიანებასთან არსებული განხეთქილების გადასალახავად.
” მომავალ ნაბიჯებთან დაკავშირებით აუცილებელია უკრაინის ხელისუფლების მეტი ერთსულოვნება, აღარაფერს ვამბობ უკრაინის ჯარის მოდერნიზაციის რესურსებზე”
”არსებული ურთიერთობები”
გეითსმა განაცხადა, რომ მოსკოვის წინააღმდეგობის მიუხედავად აშშ-მაც და ნატომაც უნდა გააფართოვონ თანამშრომლობა საქართველოსთან.
”ჩვენ საქართველოსთან უსაფრთხოების საკითხებში თანამშრომლობას ვაგრძელებთ. ჩვენ ვმონაწილეობთ წვრთნებში. ჩვენ ვმონაწილეობთ საქართველოში მიმდინარე სამხედრო რეფორმებში” - განაცხადა გეითსმა - ”ასეთია მიმდინარე ურთიერთობები და ეს არის ურთიერთობები, რომელსაც განვაგრძობთ, როგორც ორმხრივ კონტექსტში, ასევე ნატოს ფარგლებში”.
მაგრამ გერმანიის თავდაცვის მინისტრმა ფრანც ჯოზეფ იანგმა, ეჭვი გამოთქვა იმის თაობაზე, რომ უკრაინა და საქართველო მზად არიან ნატოში გაწევრიანებისთვის. მან თქვა, რომ ვერ ხედავს პირობებს იმისას, რომელიც გაამართლებს ორივე ქვეყნისთვის ნატოში გაწევრიანების გეგმის მინიჭებას, ალიანსში გაერთიანების ოფიციალურ გზას.
ნატოს თავდაცვის მინისტრები განიხილავდნენ აგრეთვე ალიანსის რეფორმირების საკითხს.
ნატო კრიტიკის ობიექტად იქცა იმის გამო, რომე დღევანდელ მსოფლიოში, რომელიც მნიშვნელოვნად განსხვავდება მეორე მსოფლიო ომის შემდგომი და ცივი ომის დროინდელი რეალობისგან, რელევანტობა დაკარაგა. დე ჰოოპ სხეფერმა ყველას მოუწოდა ახალი ”სტრატეგიული კონცეპციის” შექმნისკენ. ეს კონცეფცია უნდა დაეხმაროს ალიანსს 21-ე საუკუნის საფრთხეებთან, ტერორიზმთან, კლიმატის ცვლილებებთან და კიბერ შეტევებთან გამკლავებაში.
ნატო არაფორმალურ შეხვედრას ატარებდა, რამაც საშუალება მისცა მინისტრებს შეკრებილიყვნენ დახურულ კარს მიღმა და ნატოს მომავალი სამიტის, სადაც სახელმწიფოების მეთაურები შეიკრიბებიან, გეგმა მოემზადებინათ.
No comments:
Post a Comment