სარა მარკუსი
23 თებერვალი 2009
საქართველოს ლიდერი სატელევიზიო შოუში, რომელიც, მისი თქმით, ძალიან უყვარს, ყოველდღიურ კრიტიკას ისმენს. შესაძლოა, რომ ეს მისი დასასრული გახდეს?
საქართველოს პრეზიდენტზე ქვეყნის შიგნით რუსეთთან გასული აგვისტოს ხანმოკლე ომის შემდეგ ზეწოლა ძლიერდება - მას გადადგომას სთხოვენ. ერთმა კაცმა ოპოზიციური მოძრაობა სანახაობად აქცია, საკუთარი თავი ინსცენირებულ ციხის საკანში ჩაკეტა და ფიცი დადო, რომ იქიდან მანამდე არ გამოვა, სანამ პრეზიდენტი თავის სამსახურზე უარს არ იტყვის.
გიორგი გაჩეჩილაძეს, მომღერალს, პოეტს და პოლიტიკურ სატირიკოსს თავის საკანში 24 საათის განმავლობაში იღებენ. საკანი სატელევიზიო სტუდიაში მდებარეობს, შოუ მთელი ღამის განმავლობაში გადის პირდაპირ ეთერში, ხოლო საღამოობით პროგრამის მნიშვნელოვანი ეპიზოდები გადაიცემა.
”საკანი #5”, ასე ეწოდება გადაცემას, რომელიცეთერში გასვლის მომენტიდან თბილისში მსჯელობის საგნად იქცა. ერთი თვის მანძილზე გიორგი გაჩეჩილაძესთან სადისკუსიოდ 150-ზე მეტი ადამიანი მივიდა. მათ შორის იყვნენ საქართველოს ომბუდსმენი, სოზარ სუბარი და თეატრის დირექტორი, რობერტ სტურუა.
შოუს ვარსკვლავი იმ ოჯახიდანაა, რომელსაც პრეზიდენტის ოპონირებაში დიდი დამსახურება მიუძღვის. მისი ძმა, ლევან გაჩეჩილაძე ბოლო საპრეზიდენტო არჩევნებში, რომლის მეშვეობითაც 2008 წლის იანვარში სააკაშვილმა ძალაუფლება დაიბრუნა,ოპოზიციის კანდიდატი იყო.
სააკაშვილმა არაერთხელ გაიმეორა, რომ თანამდებობაზე დარჩენას მეორე და ბოლო ვადის დასრულებამდე, 2013 წლამდე აპირებს, რაც იმას ნიშნავს, რომ გაჩეჩილაძეს ”სატუსაღოში” დარჩენა დიდი ხნით მოუწევს.
”სააკაშვილი ჰიტლერად და სტალინად გვექცა და ჩვენ ამ გადაცემით საქართველოში დემოკრატიის დამყარებისთვის ვიბრძვით” - ამბობს მამუკა ღლონტი საკაბელო ტელეკომპანიის ”მაესტროს” ხელმძღვანელი. სწორედ ამ ტელევიზიით გადაიცემა ”საკანი #5”.
მამუკა ღლონტი იმასაც ამბობს, რომ სახელისუფლებო პოლიტიკოსის, გივი თარგამაძის საჯაროდ გაკეთებულ კომენტარებს, რომლებშიც ის გადაცემაში მონაწილეებს ”ნარკომანებს” და ”რუსეთის აგენტებს” უწოდებს, მუქარად აღიქვამს. ”მე ამ კომენტარებს საფრთხედ აღვიქვამ, რადგან სწორედ ასე ახასიათებდა ხელისუფლება ტელეკომპანია ”იმედს” - ამბობს მამუკა ღლონტი.
იმედი, რომლის ერთ-ერთი მფლობელი ფინანსური მაგნატი ბადრი პატარკაციშვილი იყო და რომელიც ხელისუფლებისადმი კრიტიკულად იყო განწყობილი, 2007 წლის ნოემბერში დაარბიეს და დროებით ეთერიდან გათიშეს.
პრეზიდენტის არაკეთილმოსურნეები თავის მთავარ პრეტენზიათა შორის საქართველოში მედიის თავისუფლების საკითხს ხშირად ასახელებენ, მაგრამ ის მტკიცედ უარყოფს ამ ბრალდებებს.
საზოგადებრივი მაუწყებლის წევრებთან კითხვა-პასუხის სეანსში, რომელიც ამას წინათ საქართველოს ტელევიზიით გადაიცა, პრეზიდენტმა ”საკანი #5” საქართველოში მედიის თავისუფლების ნიმუშად დაასახლა. მან განაცხადა, რომ შოუს ”ერთგული მაყურებელია”. ალბათ, სახალისოა, როგორც ეს სააკაშვილს შეიძლება მიაჩნდეს, რომ სხვაგანაც ის სულ უფრო მზარდი კრიტიკის ობიექტი ხდება და მას სულ უფრო სერიოზულად სთხოვენ გადადგომას, რამაც იანვარში, 12 ოპოზიციური პარტიის მიერ ხელმოწერილ დეკლარაციაშიც ჰპოვა ასახვა. პარლამენტის ყოფილმა სპიკერმა და ერთ დროს სააკაშვილის მოკავშირემ, ნინო ბურჯანაძემ, რომელმაც გასულ წელს საკუთარი პარტია დააფუძნა, ოპოზიციას უთანხმოებების დავიწყებისკენ მოუწოდა, მოუწოდა იმისკენ, რომ საპროტესტო გამოსვლების მეშვეობით პრეზიდენტის გადადგომას ერთად მიაღწიონ.
ამასობაში ირაკლი ალასანიამაც, რომელმაც გაეროში საქართველოს ელჩის თანამდებობაზე უარი თქვა და რომელიც საქართველოში პატივსაცემი ფიგურაა, პრეზიდენტს წასვლა მოსთხოვა. ”სააკაშვილი უნდა გადადგეს არა მხოლოდ იმიტომ, რომ ქვეყანა პროვოკაციულ ომში ჩაითრია, არამედ იმიტომაც, რომ მას არა აქვს ქვეყნის გამოყვანის უნარი... მიმდინარე სამხედრო-პოლიტიკური და ეკონომიკური კრიზისიდან” - განაცხადა მან ამას წინათ ტელევიზიით.
ალასანიამ საკუთარი პოლიტიკური გუნდი ჩამოაყალიბა და რეფერენდუმის ჩატარებას მიემხრო. რეფერენდუმმა უნდა დაადგინოს სურთ, თუ არა ამომრჩევლებს ვადამდელი საპრეზიდენტო არჩევნების ჩატარება.
მაგრამ სააკაშვილი მისი გადაყენების ყველა მცდელობას ეწინააღმდეგება და ამტკიცებს, რომ ის ქვეყნის აღმშენებლობასა და ეკონომიკის განმტკიცებაზეა ფოკუსირებული.
No comments:
Post a Comment